Талун Вöльдiнын

[ A+ ] /[ A- ]

*Сиктса 124 овмöсын 253 олысь. На лыдын 64 пенсионер, 101 уджалысь, 19 уджтöмалысь, но уджтöмалысьяслöн районса шöринын пасйöма сöмын кыкöс.
*Медся олöмаяс 93 арöса Мария Прокопьевна Игнатова да сентябрын та мындаöс жö тыртысь Анна Алексеевна Уляшева.
*Уна челядя кöкъямыс семья. Медуна, нёль челядь, Эльвира Васильевна Ляхлöн.
*Кольöм воын ворсiсны кöлысь Сергей Леонидович да Мария Витальевна Гущинъяс, Максим Альбертович да Регина Александровна Чисталёвъяс.
*Чужис вит кага. Кулiс кык морт.
*Сиктö локтiс сизим морт, бокö мунiсны кыкöн.
*Начальнöй школа-садйöн веськöдлö Н.А.Уляшева. Школаын 12 челядь, кодъясöс велöдöны нёльöн. 5-11 классаяс велöдчöны Помöсдiнын, ветлöны автобусöн. Садса 13 челядьöс могмöдöны кöкъямысöн.
*Шöр да вылыс тшупöда велöдчанiнъясын дас морт.
*Армияын служитöны кыкöн.
*Выль керка некод оз кыпöд.
*Сёян-юанöн могмöдö асшöр уджалысь Д.А.Уляшевлöн лавка. Эм нянь пöжаланiн, кодöн веськöдлö А.Д.Дик. Няньöн могмöдöны оз сöмын вöльдiнсаясöс, но и ягкöджсаясöс.
*Кутö крестьянин овмöс Михаил Николаевич Уляшев. Лидия Васильевна гöтырыскöд да Иван Михайлович пиыскöд видзöны 12 мöс-кук, кызь сайö ыж. Видз-му тырмымöн, найöс вöдитны эм колана техника. Йöв-яй иналöны медсясö сиктсаяслы.
*Скöт лыд чинö. Талун ас овмöсъяс видзöны 12 мöс, 27 öш-кук, 66 ыж-кöза.
*Фельдшерско-акушерскöй пунктöн коймöд во веськöдлö Наталья Валериевна Игнатова. Ачыс Помöсдiнысь, быд лун волö машинаöн. Висьысьясöс видлавны индöм лунъясö волö Помöсдiнса бурдöдчанiнысь терапевт. Юрсиктса бурдöдысьяс дорö веськöдчылöны Помöсдiнö налöн волiгöн.
*Сиктын «МТС» да «Мегафон» операторъяслöн йитöд, эм и «Ростелекомлöн» интернет.
*Вöльдiн пыр мунысь туй республикалöн, но сiйö дзик шогмытöм буретш сиктын. Шогмытöм и понтон, республикаса кывкутысь йöз видзöдлiсны сiйöс, да шуисны босьтны выльöс. Тöвнас сиктса туй весалiс Ягкöджысь крестьянин овмöс кутысь В.А.Черкасов. Отсасис сылы «Монди СЛПК» котыр.
*Быдтор вылö кыпалö олöмаяслöн котыр, кодöн регыд на босьтчис юрнуöдны Мария Николаевна Уляшева. Олöмаяс отсалiсны пелькöдны сикт, пасйисны май 1 лун, бура дасьтысисны Победалöн лун кежлö да отсалiсны нуöдны гаж. Найö ёртасьöны спорткöд. М.Н.Уляшева водзö дасьтö тылса уджалысьяс йылысь книга, кодöс панлiс П.А.Уляшева.
*Водзмöстчысь томъяслöн «Ритм» котыр, кодöн юрнуöдö Р.А.Андриевская. Кольöм воын петкöдчис кыдзи районса, сiдзи и республикаса нуöданторъясын, котыртiс овмöдчöминса том йöзöс, районын татшöм котыръяс пöвстын ордйысьöмын лоис мöдöн.
*Вöльдiнсаяс ёна вöралöны да кыйöны чери. На лыдын: Н.Н., В.И., А.А., И.В. да А.К.Уляшевъяс, Е.В.Мингалёв, Д.А.Игнатов, А.А.Калмыков, Е.Ф. да А.Ф.Пыстинъяс.
*2014 восянь часовня местаö, кодöс кисьтiсны 1929 воын, став сиктöн босьтчисны кыпöдны Илья Пророклысь вичко. Вöчöны нин пытшкöсса уджъяс. Юрнуöдöны Дмитрий Алексеевич да Александр Сергеевич Уляшевъяс да Ливерий Николаевич Игнатов.
*Водзтi зэв бура уджалiс культура керка, кодi важмис дзикöдз да тупкисны.
*Вöльдiн нималö зiль йöзöн. Совхозса уджалысь Мария Николаевна Уляшевалы вичмöдiсны коймöд тшупöда Трудöвöй Слава орден, Ирина Александровна Андриевскаялы — республикаса юралысьлысь пыдди пуктана грамота, Пелагея Алексеевна Уляшевалы — РСФСР-са да СССР-са народнöй просвещениеса отличниклысь, республикаса пыдди пуктана ветеранлысь нимъяс, Мария Прокопьевна Игнатовалы ВДНХ-лысь бронза медаль. Нималысьяс лыдын и В.Т. да И. И. Уляшевъяс, кодъяс велöдлiсны Сыктывкарса госуниверситетын. Öтиыс физика да математика, мöдыс филология кузя наукаясса кандидатъяс. Öнi найö абу нин ловъяöсь. Нималö и О.И.Уляшев — филологиялöн наукаясса кандидат, гижысь.
Галина НЕСТЕРОВА.


Комментарии:

Добавить комментарий

Свежий выпуск: за 18 октября