Паспомын
*Паспом котыртчис 1930-öд вояс бöрын. 1956-öд воын лоис вöрын уджалысьяслöн посёлокöн. Сiйö кадсяньыс олысьыс вочасöн чинiс: 1970-öд воын артавсис 648, талун 477 морт. На лыдын 113 пенсионер.
*Уджалö 227 морт. Удж эм паспомса садйын, фельдшерско-акушерскöй пунктын, школаын, Носимса администрацияын, Кулöмдiнса учреждениеясын да организацияясын, унаöн ветлöны вахтаöн республика пасьта. Куимöн сулалöны уджöн могмöдан шöринын учёт вылын, кöть уджавтöмыс збыльвылас унджык.
*80 арöсысь ыджыдджык арлыдаыс квайт морт, уджвывса 52 ветеран, öти салдат дöва — Надежда Ивановна Кочанова.
*Таво посёлокын ворсiсны öти кöлысь: öтлаасисны Алексей Александрович Матюшин да Виктория Леонидовна Пескова. Чужис куим кага. Кулiс нёль морт.
*Выль керка кыпöдöны Михаил Дмитриевич да Анна Ивановна Тимчук гозъя. Стрöитчöм улö му юкöн босьтiсны нöшта кык семья.
*Садйö ветлö 18 челядь. Сэтчö новлöдлöны и Кулöмдiнысь кагаясöс. Ичöт классъяслöн школаын велöдчö 21 ныв-зон, туйдö найöс куим велöдысь.
*Посёлокын кык лавка ― Кулöмдiнса сельполöн да «Вакон» котырлöн.
*Уджалö фельдшерско-акушерскöй пункт, кодöс кыпöдлiсны модуль серти во кык-куим сайын. Регыд на локтiс том фельдшер Ксения Сергеевна Булышева, кодi помалiс Сыктывкарса медколледж. Ачыс Керчомъяысь. Отсалiсны оланiнöн.
*Эм почта, кöнi уджалö оператор Галина Александровна Маркина, газет-журнал разöдö Нина Егоровна Турьева.
*Эм клуб, но уджалысь абутöм вöсна выль восянь пöшти эз нин воссьыв.
*Уджалö «НордВудТрейд» котырлöн пилорама, кодöн веськöдлö Е.В.Наймушин.
*Посёлокын вочасöн лэдзчысьöны скöт видзöмысь. 169 ас овмöсын талун кутöны 12 мöс, 10 öш, 25 ыж да меж, 15 кöза, 2 порсь, 46 чипан, 77 кролик. Йöв да яй бокö оз нуны, сёйöны асьныс либö иналöны посёлокын.
*Том йöз посёлокö ёна оз кольччыны, велöдчöм бöрын мунöны овны бокö сы вöсна, мый танi абу удж ни оланiн.
*Посёлок нималö киподтуя йöзöн: Николай Васильевич Катышев вöчасьö пуысь, Александр Семёнович Батланов ― пуысь, кöртысь да мукöдторйысь, Любовь Ивановна Уляшева мичаа кысьö бисерöн, Ирина Дмитриевна Зезегова кыö уна рöмöн серлöдлöм джодждöраяс. Аслас уджъясöн петкöдчылiс районса выставкаяс вылын.
*Паспомын уджалö ветеранъяслöн сöвет, кодöн веськöдлö Людмила Ивановна Мирчевская. Котырын вит морт. Тöждысьöны олöмаяс вöсна, отсалöны венны налысь майшöгъяс. Олöмаяслöн лун водзын кытшовтасны посёлокса олысьясöс, администрация да ветеранъяслöн сöвет нимсянь уна челядя, йöр медся сöстöма кутысь, уна дзоридзьяс вöдитысь семьяяслы вичмöдасны дипломъяс да козинъяс. Праздник лунö чукöртчыласны да пукыштасны школаын чай чашка сайын. Людмила Ивановна, кыдз «Единая Россия» партиялöн меставывса котырысь секретар, ветеранъяслöн сöветкöд да сиктса администрациякöд посёлокысь быд тырмытöмтор бырöдöны öтув. Матысса кадö урчитiсны сувтöдны куим автобус виччысянiн. «Единая Россия» котыр вичмöдiс челядьлы ворсанiн, колö тэчны да сувтöдны сiйöс, но кытчö — стöча эз на индыны. Йöз да садса уджалысьяс корöны нöшта сувтöдны челядьлы жö качай. Ёна кöдздöдтöдз лöсьöдасны зонпоснилы шойччанiн.