Талун Белоборскын

[ A+ ] /[ A- ]

*Белоборск — уна кывъя йöзлöн посёлок. Коркö вöлi вöр лэдзысьяслöн посёлокöн. Уджавны волiсны Молдавияысь, Украинаысь да мукöдлаысь. Уна айлов аддзис танi шудсö, гöтрасисны да кольччисны.
*Белоборск — «Югыдъяг» овмöдчöминö пырысь посёлок, кöнi пасйöма 263 мортöс, а збыльвылас олöны 170-öн. Медся уна, 67, олöма йöз. Медся ыджыд арлыда Федора Иосифовна Кулинич, кодлы февральын тырис 89 арöс.
*Уна челядя кык семья.
*Кольöм воын чужис вит кага, öти семьяын öтпырйö кыкöн.
*Посёлокса öкмыс класса школаын, кодöн веськöдлö Е.Е.Куцко, велöдчö 12 морт. Кольöм воын котыртчöмсяньыс тырис 45 во. Сад абу. Школаöдз арлыда куим кага олöны гортаныс.
*Öкмыс класс помалöм бöрын том йöз мунöны велöдчыны юркарö. Талун сэнi велöдчöны 11-öн.
*Армияын служитö öти зон.
*Кöлысьяс оз юргыны, керкаяс оз кыпавны.
*Клубöн да олöмаяслöн котырöн веськöдлö Татьяна Николаевна Жаднова. Клубын нуöдöны гажъяс, велöдчöны вöчасьны.
Öтув уджалö библиотекакöд, кодöн веськöдлö Мария Ивановна Травина. Лыддьысянiнö волывлöны и челядь, и верстьö, ставнас 147 морт.
*Кусöдчысьяслöн торъя постöн веськöдлö Сергей Евгеньевич Булышев. Сы кындзи, сэнi уджалöны кык водитель да кык кусöдчысь. Эм кусöдчан кык машина.
*Посёлоксаяс мöдысь нин старöстаöн бöрйисны Игорь Сергеевич Мингалёвöс. Сiйö топыд йитöда овмöдчöминса администрациякöд, кыпöдö йöзöс удж вылö. Кыдзи асшöр уджалысь, новлöдлö посёлоксаясöс автобусöн юрсиктöдз.
*Овмöдчöминса администрация Белоборсклы кöртымö сетiс трактор, кодöн Н.В.Паршуков весалö лымйысь посёлокса туйяс. Югыдъягсянь Белоборскöдз туйяс вöсна кывкутö «Темп» котыр.
*Воддза воясын дзоньталiсны Югыдъяг-Белоборск туйлысь юкöнъяс. Медым бура тыдалiс, колö туй пöлöнсьыс керавны пуяс.
*Фельдшерско-акушерскöй пунктöн веськöдлö Нина Николаевна Русинова. Эмöсь пелькöдчысь да водитель. Колö «тэрыб отсöг сетан» выль машина. Йöз ветлöны Югыдъягса да юрсиктса бурдöдчанiнъясö. Кольöм вося тулысын волiсны юрсиктса бурдöдысьяс.
*Кольöм воын лöсьöдiсны спутника йитöд пыр МТС операторлысь йитöд, лоис интернет, но уджалö джöмдалöмöн. Посёлокын эмöсь таксофонъяс.
*»Шоныд сетан Коми компаниялöн» Кулöмдiнса юкöнлöн ломтысянiнсянь шоныд воö школаö, клубö да кусöдчысьяслöн уджаланiнö. Тшöкыда кусласьö би да кынмавлöны ва босьтанiнъяс.
*Посёлоксаяс уджалöны «Монди СЛПК» компанияын, асшöр уджалысьяс В.В.Белый да А.С.Еремчук ордын.
*Посёлокын асшöр уджалысьяс И.Б.Гришельлöн да А.А.Кудряшовлöн эмöсь лавкаяс. И.Б.Гришель вайö нянь «Усть-Немторг» котырлöн нянь пöжаланiнысь, а А.А.Кудряшов Сыктыкарысь. Асшöр уджалысьяс карö мунiгöн босьтöны Сыктывкарö мунысьясöс.
*Спутника тасьтi пыр оз тыдавны «Юрган» да «Коми гор». Посёлоксаяс республикалысь да районлысь тöжд-могъяс тöдмалöны республикаса да «Парма гор» газетъясысь. Почталöн Югыдъягса юкöнысь воторникö да субöтаö вайöны газет-журналъяс.
*Колö весавны, сöстöммöдны да шыльöдны лöп-ёг чукöртанiн, дзоньтавны Зöридз да Ындiн юяс вомöн посъяс.
*Кöть и томъяс олöны бокын, вотчан кадö локтöны чужанiнö. Гожöм-арын посёлок уна йöза.
Марина ДАДАШОВА.

Комментарии:

Добавить комментарий

Свежий выпуск: 28 марта

Осторожно — мошенники!