Помöсдiн вожса Бадьёльйывлы 250 во. Талун сэнi 90 овмöс, 246 морт. Эмöсь сад, культура керка, лыддьысянiн,»Ривьера-С» котырлöн лавка, ФАП. Водзтi садкöд öтув вöлi посни челядьöс велöданiн, кык во сайын сiйöс бырöдiсны. Талун садйö ветлö 11 кага. Сэнi уджалö 8 морт. Велöдöны челядьöс Помöсдiнын, кытчöдз 12 километра. Новлöдлö автобус.
Культура керкаын уджалöны Оксана Ивановна да Виктор Иванович Уляшевъяс. Танi овлöны гажъяс, ворсан да йöктан рытъяс, сьылöны да йöктöны, корлöны гажöдысьясöс мöдлаысь да ветлöны асьныс. Танi велöдöны сьывны, йöктыны, серпасасьны, ворсöны теннисысь. Гожöмнас ворсöны футболысь да волейболысь. Виктор Иванович сиктса старöста, ставсö вöчö сы могысь, мед овсис гажаджыка.
Лыддьысянiнöн веськöдлö Нина Афанасьевна Уляшева, уна во нин чукöртö чужан му йылысь юöръяс, бура снимайтчö. Бур йитöда культура керкакöд. Лыддьысьны ёнджыка волöны челядь. Нина Афанасьевналöн юöръяс да фотояс серти найö дасьтöны петкöдчанторъяс. Унаторйöн вöдитчöны велöдысьяс. 2017 воын сиктö волiс «Юрган» телеканалса котыр. Накöд уджалiсны дзонь лун, тöдмöдiсны сикткöд. Бöрыннас ставсö видзöдiсны телевизор пыр.
Кыдзи казьтылiс Нина Афанасьевна, 100 во сайын сиктö волiс Санкт-Петербургысь учёнöй, этнограф Сергей Сергель, кодi уджалiс гожöм чöж да гижис «В зырянском крае» книга.
Поэт Виктор Кушманов нимöдiс сиктнысö 112 Уляшев йылысь «Уляшевы» гижöдöн. Сы серти 2004 воын режиссёр Нина Чадоромцева вöчис кино. Снимайтчисны Бадьёльйывса йöз.
Öнi Бадьёльйылын лöсьöдöны туристалан ордым. Медся ёна уджалö буретш Нина Афанасьевна Уляшева.
Сиктын овлiсны да олöны нималысь йöз. Сiдз, танi чужлiс да овлiс куим Георгиевскöй креста Егор Ефимович Уляшев. 2014 воын сувтöдiсны сылы казьтылан пас. 2016 воын вужвыйöн выльмöдiсны Великöй Отечественнöй войнаын усьöмъяслы пас. Декабр 29 лунö пасйисны чужöмсяньыс 90 во тырöм висьтъяс гижысь Евгений Егорович Уляшевлы, кодi абу нин ловъя.
Абу жö нин ловъя Егор Модестович Уляшев — ас му вöсна тöждысьысь, бура снимайтчысь. Ловъя на Иона Фёдорович Уляшев, кодлы бур уджысь сетöма Гöрд Знамя орден. Майын сылы тырас 90 арöс. Видз-му овмöсын уджалысь Анна Гавриловна да Валерий Иванович Уляшевъяслы сетлiсны пыдди пуктана уджалысьяслысь нимъяс. Киподтуя йöзöн нималöны Владимир Иванович Карманов, Игорь Николаевич, Василий Григорьевич, Евгений Егорович, Михаил Витальевич, Александр Афанасьевич, Михаил Адольфович, Григорий Николаевич, Иван Афанасьевич Уляшевъяс.
Велöдысь Эмма Константиновна Уляшевалы сетлiсны «Медбур велöдысь» пас. Пыдди пуктöны сиктсöветса депутат Алексей Вениаминович Уляшевöс, кодi кутö ас овмöс, сылöн герефорд вужъя мöс да кык öш. Важ керкаысь вöчис налы гид, пуктö тырмымöн турун.
ФАП-ын 10 во кымын нин уджалö небыд киа Ирина Васильевна Уляшева. Бурдöдчанторъясла ветлöдлö Помöсдiнса аптекаöдз. Кор колö, волö öдйö отсöг сетан машина. Сиктын эм социальнöй уджалысь Алёна Витальевна Карманова, кодлöн дöзьöр улын 9 морт.
Медся пöрысьöсь 92 арöса Анна Николаевна да 89 арöса Иона Фёдорович Уляшевъяс. Сиктсаяс пиысь джынйыс кымын олöмаяс, томъяс этшаöсь. Унаöн мунiсны карö. Кöлысьяс оз ворсны, кага чужö гежöда. Сиктö кольöм том йöз рытъясын волöны клубö, сёрнитыштöны да ворсöны теннисöн.
Контракт серти служитöны Степан Павлович, Дмитрий Петрович, Антон Иванович Уляшевъяс.
Медсясö уджалöны «Оптималесын», ветлöны бокиö, унаöн лысьтысьöны да идрасьöны «Помöсдiн» кооперативын. Уджалöны сiдзжö сиктса садйын, лавкаын, культура керкаын. Помöсдiнöдз вежоннас куимысь ветлö автобус.
2017 воын босьтчисны вöчны челядьлы ворсанiн, лöсьöдiсны качай. Ёна отсалö Помöсдiнса юралысь Анатолий Егорович Уляшев. Вöчöдiс ывлавывса би. Бур туй, лымйöн эз на тырлы.
Галина КЛЮЖЕВА.