Талун Аныбын

[ A+ ] /[ A- ]

Аныблöн тайö воыс тшупöда, артмöмсяньыс тырö 355 во. Кыпыда пасйыны шуисны августын, öнi ньöжйöникöн дасьтысьöны нин.
Талун сиктын 82 овмöс. Олö 172 морт, а гижöдöма 262-öс. Олысьыс вочасöн чинö. Кольöм воын чужис öти кага, кулiс 4 морт.
Кольöм воын Аныбын лоис ыджыд вежсьöм: сиктса администрациясö öтлаöдiсны Ручсакöд. Но сиктын колисны на социальнöй уджалысьöс, Н.Н.Панюковаöс, код дорö позьö шыöдчыны юалöмъясöн да могъясöн. Сэкжö Ручса администрацияысь быд вежон волöны специалистъяс да индöм лунъясö — сиктса юралысь Д.В.Кирушев.
Тöдчанаöн лоис и сiйö, мый восьтiсны Эжва вомöн пос, кодi йитiс районöс Кöрткерöссакöд.
Сиктын 82 пенсионер. На лыдын уджвывса 23 ветеран, тылса öти уджалысь, 2 салдат дöва. Öтка вермытöмъяс вöсна тöждысьö социальнöй уджалысь Е.Н.Пименова, могмöдö нёль мортöс. Медся олöмаыс И.Н.Пименов, кодлы 88 арöс. Эм нöшта ыджыдджык арлыда Е.Г.Казаринова, кодлы 92 арöс, но сiйö олö карын нылыс ордын.
Аныбын эм бурдöдчанiн, кöнi уна во нин тöждысьö йöзлöн дзоньвидзалун вöсна фельдшер Нина Вениаминовна Минаева. Эм сiдзжö почталöн юкöн, кöнi уджалö газет-журнал разöдысь Михаил Николаевич Пименов.
Школа танi абу. 8 ныв-зон, 1-9 классъясын велöдчысьяс, школаса автобусöн ветлöдлöны Ручö. Садйын квайт челядь. Видзöны найöс воспитатель М.А.Зюзева да сылы отсасьысь Г.К.Пименова.
Бур уджöн нималö культура керка, кодöн веськöдлö А.Ю.Панюкова. Сэтчöс «Пöлöзнича» сьылан котыр 2016 воын шедöдiс «народнöй» ним. И.В.Нестеровлöн юрнуöдöмöн сьыланкывъясöн гажöдö ас сиктсаясöс, районсаясöс да весиг карсаясöс. Оз кольччы сыысь и «Васильки» котыр. Кольöм воын на ветлiс Выльгортын мунысь «Завалинки» гаж вылö, кöнi йöзкостса сьыланкывйöн петкöдчисны Россия пасьтаысь енбиа йöз. Культура керка бердын и библиотека. Уджалö сэнi В.М.Главатских, кодi зiльö кыскыны унджык лыддьысьысьöс. Уджалö олöмаяслöн «Дзоньвидзалун» клуб. Сэтчö ветлысьяс песöны ки-кок, петалöны иславны лыжиöн, ворсöны теннисысь, петкöдчöны районса ордйысьöмъясын. Быд удж бергöдöны олöмаяслöн сиктса котыркöд, кодöн юрнуöдö В.Е.Лобанова.
Олöмаяс тöждысьöны öтка пöрысь йöз вöсна, ветлöны гортöдзныс, мыйöнкö да отсалöны, чолöмалöны гöгрöс чужан лунöн либö тöдчана лунъясöн. Петалöны сöстöммöдны сикт. Кольöм гожöмын идралiсны вичко пытшкöс, кöнi вöлi ломтысянiн. Вежа керкасö мöвпалöны ловзьöдны, но сэтчö колö сьöм. Топыд йитöд кутöны районса олöма йöзкöд, аддзысьлöны накöд. Гожöмнас Ичöт Аныбын аддзысьлiсны мöдöдысь.
Сиктса 15 морт уджалö бюджетлöн котыръясын, 4-öн — вöр вöчысь асшöр уджалысь дорын, 5-8-öн ветлöдлöны бокö. Уджтöмалöны кыкöн. Найö отсасьöны пöрысь йöзлы поткöдлыны пес, бергöдны гортгöгöрса мукöд удж.
Пескöн да стрöитчан материалöн могмöдö асшöр уджалысь С.А.Лобанов. Тавосянь асшöр уджö босьтчис и Р.Б.Мууев.
Сиктын сёян-юанöн вузасьö кык лавка: «Барс» котырлöн да асшöр уджалысь И.М.Малевалöн.
Скöт юр лыд чинö воысь воö, и талун сиктын сöмын 3 мöс, 1 вöв, 5 кукань, чипанъяс, кроликъяс да ыжъяс. Медунаöс видзöны В.Е.Лобанова — мöс, кукань да ыжъяс, да В.Л.Пименов — мöс, кукань да вöв. Бöръяыс вöлöн гöрö став сиктсалы. Ытшкöны да ваялöны тракторöн пес А.Б.Нестеров да С.А.Лобанов.
Сиктын эмöсь киподтуя йöз. Тайö Н.К.Уткина да О.К.Моторина, кодъяс мичаа кысьöны, М.Н.Афонина — вöчасьö пластик сулеяясысь, З.Н.Пименова да Г.А.Нестерова — вышивайтчöны.
Галина НЕСТЕРОВА.

Комментарии:

Добавить комментарий

Свежий выпуск: 28 марта

Осторожно — мошенники!