Сюрис мöд М.Н.Липин

[ A+ ] /[ A- ]

«Парма гор» газетлöн редакцияö волiс Кулöмдiнысь Татьяна Степановна Мишарина. Кольöм воын сылöн семьяыс босьтчис корсьны верöсыслöн мамыслысь медся ыджыд воксö, 1920 воын чужлöм Михаил Николаевич Липинöс, кодöс босьтлiсны Великöй Отечественнöй война вылö да вошлiс лы ни ку, öнöдз абу тöдса, кытчö гуалöма. Шыöдчисны Россия Федерацияса оборона министерстволöн шöр архивö. Сэтысь воис вочакыв, мый 1920 воын чужлöм Михаил Николаевич Липин йылысь некутшöм юöр абу. Сэкжö юöртiсны Кулöмдiнын жö 1904 воын чужлöм Михаил Николаевич Липин йылысь. Великöй Отечественнöй война вылö сiйö мунiс Кулöмдiнса райвоенкомат пыр (кадыс абу тöдса). Вöлi 67-öд армиялöн 16-öд Укреплённöй районын пулемётлöн медводдза номерöн, радöвöйöн. Усис 1943 вося сентябр 1 лунö. Гуалöма Ленинград обласьтса Мгинскöй (öнi Кировскöй) районын, мöдöд карсянь 4,6 километра ылнаын, кöрт туйсянь 75 метра ылнаын шуйгаланьын.
Гöтырыс Елизавета Ивановна Липина, овлiс Кулöмдiнын.
Татьяна Степановна корис йöзöдны тайö юöрсö «Парма гор» газетын. Гашкö пö, Кулöмдiнын олöны на тайö Михаил Николаевич Липиныслöн рöдвужыс, колöкö, оз тöдны, кытчö гуалöма матысса мортсö. Эмöсь кö татшöмъясыс, корам пыравны редакцияö.

Лидия ЛИПИНА.

Редакциясянь: кодкö шулöма, война пö оз помась сэтчöдз, кытчöдз оз ло гуалöма бöръя салдатöс. Победа лунсянь колис нин матö 73 во, а кымынöн на оз тöдны, кöнi пуктiсны юрнысö матыссаяс либö рöдвуж. Но оз воштыны лача, корсьысьöны водзö. Зэв гежöдлы мойвиö та мында во мысти тöдмавны, кöнi гуалöма ас вужйысь морт. Корсьысинныд кö да сюрис, гижöй газетö, висьталöй, кыдзи тiян артмис.

Комментарии:

Добавить комментарий

Свежий выпуск: 15 марта

https://www.gosuslugi.ru/help/faq/mobile_election/2100910

Осторожно — мошенники!