Сёрнитiс районса прокурор Сергей Алексеевич Агапов.

[ A+ ] /[ A- ]

— Прокуратураса уджалысьяс сюся видзöдöны, оз-ö торкавны мортлысь правояс, кыдзи пöртсьöны олöмö законъяс да индöдъяс, дорйöны государстволысь интересъяс, — сёрнитiс районса прокурор Сергей Алексеевич Агапов.
Кольöм воын районса прокуратураö шыöдчис 300 морт, мый воддза воын серти кык пöв унджык. Тадзи лоис велöдысьяс вöсна, кодъяслы биысь вештiсны сöмын юкöн, а эз ставсö. Элясисны и удждон вештытöм либö сёрöн сетöм, коммунальнöй овмöсын тырмытöмторъяс да мукöдторъяс вылö. Отсалiсны став шыöдчысьлы. Кыдзи республикаын, сiдзи и районын мыж вöчöм чинiс 30 процент вылö. С.А.Агапов судын уголовнöй делöяс видлалiгöн кырымалiс государство боксянь мыждöм кузя 225 кывкöртöд. Став мыжсьыс 70 процентсö вöчисны код юрöн, 80 гöгöр процентсö восьтiсны. Воддза воын кö тыр арлыдтöмъяс вöчисны 15 мыж, то кольöм воын 10-öс. Сергей Алексеевич кварталын öтчыд йöзлöн юалöмъяс вылö вочавидзö республикаса юралысьлöн районын общественнöй примитанiнын, ветлö овмöдчöминъясса администрацияясö, йöзлöн чукöртчöмъяс вылö, уджалан котыръясö. Кайлiс Зимстанö, кöнi бöбйöдлiсны удждон вештöмöн. Видзöдö, кыдзи пöртсьöны олöмö федерацияса да республикаса программаяс.
Талун районса прокуратураын уджалö прокурорлы сизим отсасьысь да водитель. Республикаса прокурорлöн шуöмöн быдöн тöжда кутшöмкö школа вöсна. Волывлöны гырысь классъясса велöдчысьяс дорö, висьталöны асланыс кывкутана удж йылысь да кöнi позьö велöдчыны юристö. Окотитысьяслы чукöртöны документъяс да ыстöны республикаса прокуратураö. Психологкöд уджалöм бöрын, ставыс кö бур, ыстöны велöдчыны да помалöм бöрын босьтöны удж вылö.
Гижöд да снимок Марина ДАДАШОВАЛÖН.

 

Комментарии:

Добавить комментарий

Свежий выпуск: 28 марта

Осторожно — мошенники!