Сёрмöм муслун

[ A+ ] /[ A- ]

«Муслунлы восьса быд арлыд» («Любви все возрасты покорны»)… Ыджыд поэтлöн тайö кывъясыс зэв лöсялöны Кулöмдiнысь 82 арöса Михаил Ефимович Уляшевлы да 72 арöса Зарема Николаевна Нестеровалы, кодъяс аддзысисны да мусмисны öта-мöдныслы арлыдаöн нин да бура лöсялöмöн да ыджыд муслунöн олöны нин сизим во.
Ме дыр нин видзöда на бöрся да шензя тайö йöз вылас. Михаил Ефимович да Зарема Николаевна век öтлаынöсь. Аддзан кö öтисö лавкаысь, бурдöдчанiнысь, культура керкаысь, то быть матын и мöдыс. Уличöд век мунöны орччöн. Вочаасигöн чолöмася: «Кыдзи нин оланныд-выланныд, том гозъя?». Найö нюммунöны: «Ставыс бур!» да корöны волыны видзöдлыны, кыдзи олöны.
/тчыд ме ветлi на дорö. Олöны Кулöмдiнса катыдпомын Мелиораторъяслöн улича вылын. Налöн керканыс медбöръя. Но олöны оз сэнi, а пелькиник кыпöдöмторйын, сiдз шусяна гожся пусянiнын. Аслам локтöм йылысь ме висьталi водзвыв да найö виччысисны менö пызан вылын быдсяма чöскыдторйöн. Сёрнитны босьтчытöдз вöзйисны юны чай. И ставным мыйсюрö видлыштiм. А сэсся Михаил Ефимович да Зарема Николаевна висьталiсны, кыдзи олiсны водзтi, кыдзи аддзысисны да олiсны нин сизим во.
М.Е.Уляшев чужис Эжва йывланьын — важ коми Вöльдiн сиктын. Бать-мамыслöн вöлiны витöнöсь. Батьыслöн кулöм бöрын олiсны сьöкыда. Медым отсавны мамыслы, Михаил эновтiс велöдчöм.
— Квайтöд классын велöдчи сöмын январöдз, — казьтылiс сiйö, — кöть велöдчöм сетчис кокниа, торйöн нин математика. Велöдысь гижö на задача, а ме тöда нин кывкöртöдсö. Май помын менö корисны сдайтны квайтöд классысь экзаменъяс. Но ме сдайтi сöмын куим экзамен да мунi кыйсьыны вöрö. А сэсся босьтчи уджавны колхозын. Вичман кадö кыби. Дас öти арöссянь. Сэки чериыд вöлi тырыс. Тшöкыда сюрлiс чими. Ми сiйöс вежлiм пызь вылö. Кило чимиысь сетлiсны кык кило пызь.
Кöть Михаил эз помавлы сизим класс, вежöра зонмöс колхозса юралысь мöдöдiс велöдчыны бригадирö Улыс Човйö. Курсъяс помалöм бöрын велöдчис Сыктывкарса видз-му овмöс техникумын. Сэнi велöдчигöн мукöдъяскöд тшöтш мöдöдлiсны уджавны куим тöлысь кежлö лэптöм эжа вылö. Весиг вичмöдiсны медаль.
— Уджалöмысь вештысисны бура, меным сетiсны куим сюрс шайт — сiйö кадö зэв ыджыд сьöм. Москваса ГУМ-ысь ньöби еджыд сапöг да ёна и петкöдлi вежсö мукöд зонъяслысь техникумын велöдчигöн. Менö дасьтiсны веськöдлысьö да мöдöдiсны кыпöдны тöдöмлунъяс Кировса видз-му овмöс институтö. Но ме, кыдз шуласны, конйыштi Кулöмдiн районöн веськöдлысьясöс. Велöдчигöн гöтраси да кольччи Кировö. Босьтчи уджавны военнöй заводын, кöнi бергöдчис и гöтырöй. Но векжö кыскис чужанiнö да гöтыркöд шуим вуджны вöр лэдзысьяслöн Ягкöдж посёлокö, кодi Вöльдiнкöд орччöн. 1967-öд воын локтi öтнам да пыри уджавны Помöсдiнса леспромхозö, сiйö нин торйöдiс оланiн да отсалiс вайны кöлуй.
Леспромхозын М.Е.Уляшев вöлi веськöдлысьяс лыдын, 1990-öд воын петiс пенсия вылö. Леспромхозын уджалiс и гöтырыс. Олiсны шаня. Но гöтырыс видзчысьтöг кувсис. Челядь эз вöвны. И Михаил Ефимович колис öтнас. Но гöтыртöг кольöм мукöд айловъяс моз эз юсьы, олiс садь юрöн. Воддза моз вöдитiс ыджыд град йöр, шоныд быдтысянiн. Быдтiс картупель, öгурцы, морков, лук. Посёлокын вöлi завидьтана верöспуöн. Но олöмыс йитiс нывбабакöд, кодi олiс юрсиктын, сёысь унджык верст сайын.
Зарема Николаевна Нестерова чужис Улыс Вочын ыджыд семьяын. Сылöн вöлiны вит вок да нёль чой, ачыс медся ыджыд. Семьяыс вöлi сиктын пыдди пуктанаöн. Мамыс велöдысь, батьыс колхозын бригадир. Зарема, кыдз шулöны, мунiс мамыслöн кок туйöд: кöкъямыс класс помалöм бöрын 1962-öд воын пырис велöдчыны Сыктывкарса педучилищеö. Сэсся уджалiс Печора дорса Мутнöй Материкын, велöдiс, вöлi старшöй пионервожатöйöн. Петiс верöс сайö да локтiс Кулöмдiн районса Зимстан посёлокö, кöнi уджалiс интернатын. Чужисны куим челядь, но гозъялöн олöм эз артмы да верöсыскöд торйöдчис, вуджис овны челядьыскöд юрсиктö. Танi выльысь петiс верöс сайö. Но инфаркт вöсна верöсыс 58 арöсöн кувсис. Велöдчöм серти удж эз сюр да босьтчис сöстöммöдчыны пинь бурдöдан жырйын. Во мысти вöзйисны кассирлысь удж. Сэсся лоис районса бурдöдчанiнын бухгалтерöн да экономистöн. Тöдöмлунъяс эз тырмыны да уджалiгмоз помалiс сьöм кузя Перымса техникум. Быдтiс кык пиöс да нылöс, кодъяслöн асланыс нин семьяяс. /ти кадö быдтiсны-велöдiсны и босьтöм нылöс, кодi оз вунöд бурсö да тшöкыда волö.
Олöмад овлö быдторйыс. Зарема Николаевна ёнасö быттьö некор эз нёрпавлы, а 2011 вося майын босьтiс инфаркт да Сергей пиыс нуис республикаса кардиошöринö. Сэтчöс бурдöдчанiнын и аддзысисны Михаил Ефимовичкöд.
— Инфарктöдз на суис некор бырлытöм шог — кулiс Андрей пиöй, — казьтылiс Зарема Николаевна. — Ме тшöкыда сiйöс вöталi. Бурдöдчанiнын куйлiгöн сiйö бара усис меным вöтö да элясис, мый сюмалö кынöмыс да корис вердны. Асывнас ме ветлi кафеö да ньöби сёян. Орчча палатаын куйлiсны куим айлов. Ме нуи налы сёянсö да шуи, мед казьтыштасны пиöс. Кыкыс колисны куйлыны, а коймöдыс чеччис да матыстчис ме дорö. Юалiс, кытысь ме, да висьталiс, мый сiйö миян районысь жö. Та вылын миян медводдза аддзысьлöмным и помасис.
— А куим лун мысти ми аддзысим кафеын, — сюртчис сёрниö Михаил Ефимович. — Эн на, дерт, вунöд?
— Татшöмторйыд оз вун некор.
— Сэки кафеас пызан сайын ми пукалiм, тöдöмысь, быдса час, эг кö дырджык. Восьсöн, нинöм дзебтöг висьталiм ас йылысь, юксим шогöн, весиг гусяторъясöн. Тайö сёрни бöрас аддзысьлiм некымынысь на. Сэсся торъялiм, ме мунi аслам посёлокö, а сiйö Кулöмдiнö.
— Но торъявлiм эг дыр кежлö, — водзö висьталiс Зарема Николаевна. — Михаил Ефимович кутiс корсьны позянлунъяс аддзысьны мекöд. Олöмаяслöн райсöвет пыр тöдмалiс телефонöйлысь номерсö да звöнитiс. Но ме гортын эг вöв да телефон трубка босьтiс внукöй. Михаил Ефимович висьталiс, кодi сiйö сэтшöмыс. Кор локтi гортö, внукöй висьталiс, мый звöнитлiс Миш дядь, кодкöд öтлаын куйлiм бурдöдчанiнын. Меным мыйлакö тайö звöнитлöмсьыс лоис зэв нимкодь. Лун-мöд мысти ми сёрнитiм телефон пыр. Михаил Ефимович вöзйысис волыны да сёрнитны. Ме мунi воча. Сёрнитiм и со öтлаынöсь нин сизим во.
— А арлыдныд эз повзьöд? Михаил Ефимовичлы вöлi нин 75 да и Тiянлы 65. Кыдзи та вылö видзöдлiсны челядьныд да внукъясныд?
— Михаил Ефимович медводдза лунъяссянь асьсö петкöдлiс овмöс кутысь ыджыд тöжда айловöн. Весь эз ов: пыр мыйкö вöчис гожся пусянiн дорын, йöрын. Вöлi вежавидзысьöн да мелiöн, тöждысис ме вöсна. Ме кылi, мый сiйö — менам морт. Вит лун мысти сiйö вöзйис меным чукöртны челядьöс. Вердiс найöс чериöн, кодöс кыйис ачыс да вайис посёлокысь, висьталiс ас йывсьыс, аслас чери кыйöм да вöралöм, гортса овмöс йылысь. Менам челядьлы сiйö зэв воис сьöлöм выланыс да сиисны миянлы овны дыр да шудаа. Шуим овны Кулöмдiнын, кöть верöслöн Ягкöджас зэв бур керка. Танi öд районса бурдöдчанiн орччöн. Позьö шыöдчыны кöть кутшöм бурдöдысь дорö. Но посёлокын град йöр колим, идралiм сöмын шоныд быдтысянiн. Сэнi быдтам картупель да лук. Торйöн нин бура быдмö сэнi лук, овлö кабыр гырся. А танi быдтам öгурцы, помидор, капуста да сiдзжö картупель.
— Мен чайтсьö, мый танi тiян дзескыдджык.
— Велалiм нин. Ва воö, пач ломтам пескöн.
— Пенсияныд тырмö?
— Да. Ми и внучкалы на отсалам.
Ме кöсйи юавны Михаил Ефимовичлысь да Зарема Николаевналысь öтитор йылысь, но вежавидзи, и векжö мунтöдз юалi.
— Менам вöлi кык верöс, — вочавидзис Зарема Николаевна. — Но татшöм ыджыд муслунсö, татшöм шудсö ме эг на тöдлы. Ме сiйöс радейта и таысь ог яндысь. Войнас некымынысь чеччыла, видзöдла, кыдзи сiйö лолалö, лöсьöда эшкынсö.
— Ме сьöлöмöн жö кыла гöтырöс, — шуис Михаил Ефимович. — Сiдзжö садьма войнас да нимкодяся сыöн.
Кыдз шулöны, содтыны нинöм.
Николай ЛЮТОЕВ.
Снимок гижысьлöн.


Комментарии:

Добавить комментарий

Свежий выпуск: за 19 июля