Сувтöдiсны выльясöс

[ A+ ] /[ A- ]

Лунвыв электрическöй сетьяслöн районса юкöн дасьтысьö тöв кежлö. Талун мастер В.А. Кочановлöн электромонтёръяс уджалöны юрсиктса Солнечная улича вылын, сувтöдiсны нин 24 выль сюръя, нюжöдасны провод да югзьöдасны. Буретш тайö уличаса олысьяс нимсянь республикаса юралысь С.А.Гапликовкöд веськыд йитöд дырйи шыöдчис ань, кодi керка кыпöдны му юкöн босьтлiс 2010-öд воын, семьянас овмöдчис 2014-öдын да корис югзьöдны. Юралысь тшöктiс югзьöдны октябр панасöдз. Пасъям, сиктлöн тайö юкöнын урчитöма сетны 20 гöгöр му юкöн. Кыпöдöм кöкъямыс керкаысь квайтас олöны нин.

В.А.Кочановлöн жö котыр юрсиктлöн Сöветскöй улича вылын вежис 20 сюръя, А.В.Лютоевлöн котыр сы мында жö Ленинлöн улича вылын, Э.С.Лютоевлöн котыр 100 кымынöс Улыс да Вылыс Вочын да на костын, С.С.Лодыгинлöн уджалысьяс вежлалiсны Немдiнын да Югыдъягын. Талун Вылыс да Улыс Воч, а сiдзжö Зимстан да Улыс Воч костъясын би визь улысь юркарса «Электросетьприбормонтаж» котыр йöзöс медалöмöн кералö пуяс. Сентябрын В.А.Кочановлöн котыр би сюръяяс вежлалас Озъягын.

Биöн могмöдысьяс кытшовтiсны, видзöдлiсны став станциясö, подстанциясö, би визьяс, мед тöв кежлö ставыс вöлi лючки.

Марина Дадашова.

Гижысьлöн снимок вылын: юрсиктын Ленинлöн улича вылын (шуйгавывсянь веськыдвылö): А.А.Логинов да М.А.Гордиенко.


Комментарии:

Добавить комментарий

Свежий выпуск: за 11 октября