Сiйö пыр дась

[ A+ ] /[ A- ]

Керчомъяысь Сергей Александрович Попов кöкъямысöд во уджалö Коми республикаысь бикöд водзсасян службалöн 14-öд отрядса юкöнын. Буретш сэксянь, кор воссис кусöдчанiн.
Вöчисны асьныс совхозлöн вöв видзанiнысь. Дзоньталiсны вужвыйöн да артмис чача кодьöн, кыпыдöн да шоныдöн. Öти вевт улын и гараж, кöнi кусöдчан кык машина. Талун квайтöнöсь: юкöнöн веськöдлысь да вит водитель.
— Ми, водительяс, уджалам öта-мöдöс вежлалöмöн сутки, мöд суткинас пукалам телефон дорын, дежуритам, — висьталiс Сергей Александрович. — Лоö кö неминуча, пыр жö кыпöдам ставнысö, медым петны öтув. Машинаяс пыр дасьöсь. Öтинас петам асьным, мöднас Кулöмдiнысь воöм водитель. Ки улынöсь и кусöдчан паськöм да коланторъяс, тшöтш и туйвывса неминуча вылö петан оборудование. Öзйылöмъяс бöръя кадö чинiсны. Кольöм воын öзйылiс сöмын кыкысь — выль во да Рöштво дырйи, таво бара выль во дырйи. Гажöдчигöн йöз, тыдалö, вунöдöны видзчысьöм йылысь. Тöлын бикöд водзсасьны зэв на и сьöкыд. Во кык-куим сайын ыпнитiс олан керка. Ывла вылын вöлi 35 градус кöдзыд. Кусöдчигöн машинаным муртса эз кынмы, асланым паськöмным йизис, гортö локтi кын чурка кодь, пöрччыси джоджö водöмöн. Ас костын шмонитлывлам: служба бур, а кыдз öзъяс — кöть пет удж вылысь.
Сергей Александровичлöн висьталöм серти, поствывса кусöдчысьяс олöны-уджалöны армияын моз, индöм кадö урчитöмторъяс лючки вöчöмöн. Школаын моз велöдчöны быд лун, быд куим тöлысь бöрын сдайтöны зачётъяс, урчитöмторъяс, петалöны «бырöдны туйвывса неминучаяс» либö «кусöдöны» öзйöмин. Кулöмдiнö ветлöмöн велöдчöны, кыдзи мортлы сетны медводдза отсöг. Öти кывйöн кö, быд боксянь паськöдöны вежöр, содтöны сям, медым тыр дасьöн лоны збыль неминучаяс лоигкежлö.
Кусöдчöм да йöзöс дорйöм — айловъяслöн збыльысь пыдди пуктана удж. И таысь Сергей Александровичлы нимкодь, кöть таöдз эз жö вöв кокни: вöлi водительöн совхозын, сельпоын да ГАИ-ын, быд индöмтор вöчис лесхозын.
Гижöд да снимок Галина НЕСТЕРОВАЛÖН.

Комментарии:

Добавить комментарий

Свежий выпуск: 28 марта

Осторожно — мошенники!