Культура, туристалöм да архивлöн удж кузя министерство донъялiс культура юкöнса муниципалитетлöн котыръяслысь — культура керкаяслысь, клубъяслысь, библиотекаяслысь, музейяслысь — да сэнi бергöдчысьяслысь кольöм вося удж да пасйис медбуръясöс. . Сэтысь библиотекар Полина Борисовна Сенькиналöн водзмöстчöмöн танi удж пуöмöн пуö.
Библиотекаын уджавны босьтчис 1992 воын Кекурын, танi 15 во. Содтöд тöдöмлунъяс босьтiс Тима Вень нима культуралöн юркарса колледжын уджалiгмоз велöдчöмöн. Библиотека пыр уна йöза, волöны верстьö и челядь. Лыддьöны газетъяс да журналъяс, сьöлöм сертиныс книгаяс. Абу кö коланаыс, Полина Борисовна вайлö Кулöмдiнысь.
Библиотекаын тшöкыда овлöны унапöлöс рытъяс, тшöтш и гижысьяслы сиöмъяс. Пожöг вожысь татшöмыс петiс уна. На лыдын Пётр да Борис Шаховъяс, Александр Лужиков, эмöсь енбиа йöз и öнi. Дасьтiсны да лэдзисны налы сиöм ичöтик книгаяс. Ыдждöдлöны и районса гижысьясöс да нималысь йöзöс. Кыпыда мунöны тöдчана лунъяслы сиöм конкурсъяс, викторинаяс да ворсöмъяс. Отсасьöны культура керкаса, школаса да садса уджалысьяс.
Полина Борисовна тавосянь босьтчис нуöдны посни класса челядьлы «Том книга радейтысь» кружок, тöдмöдö книгаясöн, висьталö, мыйла найö колöны да кутшöм бур вайöны, ичöтсянь велöдö радейтны.
Чукöртö война вылын вöвлöмъяс да тылын уджалысьяс йылысь гижöдъяс, снимокъяс да мукöдтор, сюрис унакодь нин.
Ас водзас пыр сувтöдö выль могъяс, медым библиотекаö кыскыны унджык йöзöс. Водзмöстчöмсö пасйисны почёт грамотаясöн, библиотека лолiс районын медбурöн.
Галина НЕСТЕРОВА.