Серамбана да варов тайö нывбабасö медводдзаысь аддзи гоз-мöд во сайын Керчомъяын серам петкöдлысь котыръяслöн петкöдчигöн, кор паськöдiс аккордеонсö да кыпöдiс видзöдысьяслысь ловнысö гажа сьыланкывйöн. 
Анфиса Васильевна Чисталёва Помöсдiнысь, но олiс юрсиктын да велöдчис Кулöмдiнса шöр да шылада школаясын. 9 класс помалöм бöрын мунiс карö. Велöдчис кык во лицейын да нёль во мöдöд номера педколледжын, бöръяас шылад велöдысьö, музыкальнöй веськöдлысьö. 
— Кöмöй век вöлi киссьöма да, дзолядырйи ёна кöсйи лоны кöм дзоньталысьöн, öчкиöй пыр жугавлiс да, öчки вöчысьöн. Кöсйи лоны и бурдöдысьöн. Но мам ышöдiс лоны шылад велöдысьöн. Сы вылö ньöти ог дузъяв, öд аддзи ачымöс олöмын, — висьталiс Анфиса. 
Велöдчöм бöрын 1999 воын босьтчис велöдны шылад Скöрöдумса школаын. Öнi школаын старшöй вожатöй да нöшта куим садйын ворсö аккордеонöн, велöдö сьывны дзолюкъясöс. Уна кад босьтö серам петкöдлöмöн петкöдчöм. Налöн «Скородумы» котыр районын нималана. Рытъяснас чукöртчöны да пыр мöвпыштöны-лöсьöдöны выльтор. Мукöддырйи зэв сёрöдз. Кыдз шмонитö Анфиса, узьны гортас волö жö. 
Удж да гаж тöдöм кындзи Анфиса Васильевна тöждысьысь мам да бур гöтыр. Алексей Алексеевич верöсыскöд тöдмасьлiсны Помöсдiнын, кор ветлöдлiсны сьылан котырö. Анфиса ворсiс клавишнöй вылын, а Алексей сьылiс да ворсiс гитара вылын. Ноябр 9 лунö пасйисны öтув олöмлы 18 во. Верöсыс рам да лöнь, уджалö ломтас-мавтасöн могмöданiнын. Водзтi дöзмылiс, мый гöтырыс öтарö гажöдчö, а öнi лэдзö пинь-зыктöг. Гозъялöн кык челядь — Ангелина да Филипп. Нылыслы 17 арöс, велöдчö Кировын автомеханикö. Школаын велöдчигöн ветлöдлiс Д.М.Филиппов дорö да ворсiс гитараöн, сьылiс сыöн лöсьöдöм котырын. Пиыслы 11 арöс, велöдчö 5-öд классын. Ветлöдлö «Дебют» драмкружокö, петкöдчылiсны нин весиг Кулöмдiнын. Кыкнан челядьыслы муса компьютер. 
Семьяöн öтув пасйöны гажъяс, кор артмö, кытчöкö ветлöны. Таво со вöлiны Казаньын. 
Филипп пыртö пес да вайö ва. Тöдö, но ковмылö казьтыштлыны. Мамыслысь велöдчö пусьыны, быдмас да ковмас. Водзтi отсасьлiс нылыс. Ангелина сы кодь жö сюсь. 
Анфиса матыссаясыслы вöчалö быдпöлöс козинъяс. Сылы ёна мусаöсь челядь: и аслас, и уджвывсаяс. Ичöтъяссянь шоналö сьöлöм, насянь мунö аслыспöлöс ру. Челядь вöснаыс и олö. Накöд 19 во нин. 
Анфиса удитö ставсö. Весиг отсалö пиыслы вöчны гортса удж. 
— Менам талун эм сöмын часöн-джынйöн. Сэсся бара «пышъя». Вай видзöдлам гортса уджтö, — пырöмсяньыс шуö пиыслы. 
Казьтыштiс тешкодьтор. Пиыскöд дасьтысисны йöз кыв велöдан урок кежлö. Сылöн эз артмы да дöзмис: 
— Кодлы тайö колö? Тэ велöдлiн да кытчöкö мöй ковмис? 
— Со тай тэныд гортса уджтö вöчны отсала. 
Чисталёвъяслöн керкаын пыр ува-ава, волöны пиыслöн ёртъясыс да чукöрмывлö нёль-вит мортöдз. Гожöмнас босьтлiсны батут да поснияс чеччалöмысь эз дугдывны. 
Нывбабалы долыд, мый челядьыс юксьöны тöжд-могъяснас да нимкодьлуннас. Овлö, мый Филипп нинöм оз висьтав, воссьö вочасöн. 
— Мед гортын вöлi ставыс бур, челядь быдмисны шудаöн, медводз колö бать-мамлы радейтны öта-мöднысö. Керкаын мед вöлi сöстöм. Сэки челядьыд лоасны тiян кодьöсь жö. Ми верöскöд ёна торъялам. Сiйö зэв лöнь, а ме гора гöлöса да быдторсьыс öдйö öзйысь. Сыкöд олiгöн кутi лоны лöньджыкöн. Менам уна ёрт. Ме шуда морт. Ачым кага кодь на, пыр топöдча мам дорö. Мамуклы отсалöмсьыс торъя аттьö. Мукöддырйи гортö локта сёрöн, а пыра да ставыс дзим-дзурк. Мамукöй, муса мамукöй, ов на да сöмын ов, аттьö тэд ставсьыс, — восьтiс сьöлöмсö Анфиса. 
Галина КЛЮЖЕВА. 
Алексей Чисталёвлöн снимок вылын: А.Чисталёва челядьыскöд да мамыскöд.