Шуд аддзис Италияын 

[ A+ ] /[ A- ]

Кулöмдiнын чужлöм, 1996-öд восянь Италияын олысь Светлана Григорьевна Нестерова кöть велöдчылiс роч классын, ылi муын сёрнитö англия да италия кывъяс вылын, аслас олöм йылысь висьталiс сöстöм коми кывйöн, сiйöс эз вунöд. 
Школа помалöм бöрын велöдчис Перымса госуниверситетлöн геология кузя факультетын, лоис инженер-геофизикöн. Кольöм нэмся 90-öд воясын специальносьт серти удж эз сюр да Перымас и кольччис. Пырис ресторанö, уджалiс квайт во. Тöдмасис сэнi жö уджалысь Татьянакöд, кодлöн нывъёртыс петiс верöс сайö да мунiс овны верöсыслöн чужанiнö — Италияö — да корис нывъясöс сэтчö, корсис удж. Сэтчö мунтöдз сюрис морт, кодi гортас волöмöн куим тöлысь велöдiс италия кыв. 
— Мунöм бöрын тöдiм медся колана кывъяс. Сьöрысь пыр вöлi кывкуд. Кор воим Турин кардорса Бутильера Альтаö, документъяс дасьтiгöн олiм ныв дорас вежон кык да телевизор эг кусöдлöй, кывзiм итальянечьяслысь сёрни. Сэсся кöртымалiм оланiн, — казьтылiс Светлана Григорьевна. 
Босьтчис видзны öти озыр мортлысь кагасö. Батьыслöн вöлi Занзибар дi вылын «Карафуу» туристаланiн — бур керкаяс, орччöн океан. Во чöжöн сэтчö ветлывлiсны куим-ö-нёльысь. Кытчö гозъя, сэтчö и каганыскöд Светлана Григорьевна. Ветлiсны Европа пасьта. Вöлiны Кенияын, Арабскöй Эмиратыын да мукöдлаын. Кага видзигöн и велалiс италия кывйö. 
Öтчыд нывъёртыскöд карöд ветлöдлiгöн кежисны йöктанiнö, кöнi вöлiны и томъяс, и верстьö, и весиг олöмаяс. Сьöлöм выланыс воис, кыдзи пыдди пуктöны öта-мöднысö, томъяс оз торйöдчыны верстьöысь. Сэнi и тöдмасис Нино айловкöд, кодi арлыднас вöлi сыысь ёна ыджыдджыкöн. Кутiсны аддзысьлыны тшöкыда. Сьöд сэтöр синъяса мича коми ныв вöрзьöдiс айловлысь сьöлöмсö. Сылöн кувлiс гöтырыс да öтнас быдтiс нывсö, кодi эз кöсйы, мед батьыс йитiс олöмсö бокиысь локтöм том нывкöд. Но тайö эз сувтöд. Нино мунiс аслас керкаысь, босьтiс кöртымö оланiн, кытчö и овмöдчисны Светланакöд. Кад кольыштöм бöрын нылыс гöгöрвоис, мый батьыс Светланатöг овны оз вермы, корис прöща, да гозъя бöр локтiсны верöслöн воддза оланiнö. Нылыс лоис Светланалы бур ёртöн. 
Кор видзан кагалы тырис куим арöс, сiйöс нуисны садйö, а кöзяиныс Светланаöс босьтiс ас дорас туристаланiнö секретарöн, кöнi уджалö и öнi. Кутö туристалöм котыртысьяскöд йитöд мир пасьта, лöсьöдö сёрнитчöмъяс, вочавидзö письмöяс вылö, сёрнитö вештысьöмъяс кузя. Медым ставыс артмис бура, велöдчис, миян ногöн кö, рытъя школаын. 
— Сэнi вöлiны и олöмаяс, кодъяс ас кадö кутшöмкö помка вöсна эз вермыны помавны школа, и бокиысь, мукöд странаысь, локтысьяс. История, математика, италия кыв кындзи велöдiсны и франция кыв, но сiйö эз ковмы. Англия кыв тöда школаын да университетын велöдöмöн, — висьталiс ань. 
1998-öд вося тöлын Светлана отпускалiгас мöдöдчис чужанiнас. Нино кöсйис тöдмасьны сылöн бать-мамкöд, видзöдлыны Коми муын олöм да локтiс тшöтш. Чайтiс, мый танi, кыдзи и Москваын да Санкт-Петербургын, кöнi вöлi нин, эмöсь ресторанъяс, театръяс, кытчö позяс ветлыны, да босьтiс костюмъяс. Но Кулöмдiнын бур паськöм ёна эз и ков. Аддзысьлiсны сöмын Светланалöн рöдвужкöд. Ылi муысь локтысьяслы ломтiсны пывсян. Италияын оз пывсьыны. Сэнi эмöсь пöсьöдчанiн да массаж вöчанiнъяс. Светлана висьталiс, мый найöс виччысьö баня. Нино гöгöрвоис, мый ань мыйлакö кöсйö нуöдны сiйöс «баньоö» — налöн ногöн асмогасянiнö да мыссянiнö. Дерт жö, ёна чуймис. Сэки Светлана паськыдджыка висьталiс пывсян йылысь. 
Светлана ёна радейтiс корöсясьны, тöлын пöсь пывсянысь петавлiс ывлаö зырасьны кöдзыд лымйöн. Корöсьöн швачöдiс и Ниноöс, а сэсся йöткыштiс «ыркöдчыны» ывлаö. Мöдыс эз виччысь татшöмторсö да ёнакодь повзис: татчö пö вины менö вайин, эн вермы тайöс вöчны гортын. 
Нино кöсйис тöдмöдны Светалысь бать-мамсö, чойяссö Италияса сёянöн — нёльпöлöс сырысь вöчöм рисöн, но сöмын öти лавкаысь сюрис кынмылöм сыр да эз и артмы сэтшöм чöскыдыс, кутшöмöс кöсйис. Окотапырысь тöдмасис коми сёянöн. Сьöлöм вылас воис, мый Светланалысь рöдвужöс кытшовтiгöн, налы ставсö лэпталiсны пызан вылö — картупеля сола тшак, сьöд тшака шыд, кöтöдöм мырпом, пражитöм чери да мукöдтор. И, дерт жö, эз виччысь, мый танi сэтшöм кöдзыд, гöгöр лым толаяс. Öд сылöн чужанiнын лым усьлö гежöда да пыр жö сылö, кöть и олöны Италиялöн войвылын, кöдздöдлö уна вылö сöмын 10 градусöдз. 
— Татчö сэсся эз нин волы, гортö тöвзьыла öтнам. Шойччыны сетöны 22 лун да и то юкöнъясöн. Верöсöй уджавлiс «Тошиба» телевизоръяс вöчаланiнын, лавкаясö вöзйис телевизоръяс. Öтлаын шойччылiм Кубаын, Мексикаын, Доминиканаын, Антигуаын да Италияын. 68 арöсöн петiс пенсия вылö. Öнi менам отпускалiгöн да шойччан лунъясö ветлам то саридз дорö, то гöраясö исласьны лыжиöн, кытшлалам Италия пасьта, — ылi муын олöмöн тöдмöдiс ань. 
Италияса семьяясын пусьöны айловъяс. Сiдзи жö и Нино. Верöсыс вежоннас кыкысь медавлö мортöс, кодi пелькöдчö да вöчö мукöд удж. Кык судта керкалöн öшинь улын быдмöны сöмын пуяс. Градъяс абуöсь. Градвыв пуктас, фрукты да мукöдтор ньöбöны лавкаысь. Миян моз найö оз маринуйтны-консервируйтны öгурцы-помидор, сёйöны свежöйнас. Оз сёйны и сола чери. Найö радейтöны макарон, асьныс вöчöны помидорысь да сырысь соусъяс, лэчыд кöра чöсмöдланторъяс. Рочьяслы эм торъя лавка, кöнi вузалöны сола чери, кын пув да турипув, Россияысь вайöм мукöд сёян-юан. 
Светланалöн Лоренцо быдтасыс, кодöс видзис дзолядырсяньыс, таво помалiс школа. Россияын моз сэнi оз нуöдны школа помалысьяслы сиöм ыджыд гажъяс, а пасйöны семьяын, рöдвужöс чукöртöмöн. Тадзи жö пасйöны Ыджыд лун да Рöштво. 
10 во сайын волiгöн Светланаöс Екатерина чойыс нуöдлiс шойччыны Кадамö. Кольöм воын волiгöн бара ветлiс сэтчö öтнас. Таво 77 арöса мамыс чорыда висьö, ловъя на и 94 арöса ыджыд мамыс. Видлыны найöс, а сiдзжö Екатерина да Татьяна чойяссö локтiс мöдысь. И тöвнас, и гожöмнас öти лун кежлö тöвзьылiс Кадамö, аскöдыс босьтлiс Татьяналысь Дашасö. Аддзысьлiс и школаын öтлаын велöдчысьяскöд. 
— Муяс вылын, кöнi школаын велöдчигöн котравлi лыжиöн, öнi тырыс мича йöръяса керкаяс. Пыравлi «Олимпик» ёнмöдчанiнö, аддзи став арлыда йöзсö. Сiдзкö, унаöн ёртасьöны спорткöд. Эг тöдлы, кыдзи бур туй кузя вои Сыктывкарсянь чужанiнö. Тыдалö районын олöмлöн бурмöм, быд волiгöн аддза выльтор, — кыпыд руöн помалiс сёрни Светлана. 
Марина Дадашова. 
Снимок гижысьлöн. 


Комментарии:

Добавить комментарий

Свежий выпуск: за 15 ноября