Шонтысян приборъясöн вöдитчöм
Кадыс бергöдчис арлань. Велöдчысьяс пуксисны партаяс сайö, пуяс ньöжйöн чöвтöны паськöмныссö, а енöж тшöкыда букшасьö. Дженьдö лун, а войыс кöдзалö. Гажтöм погоддя гусялiс шоныд сынöд керкаясысь. Талун сёрнитам шонтысян электроприборъясöн колана ногöн вöдитчöм йылысь.
Коммунальщикъяс заводитасны шонтыны патераяс, кор вит лун чöж шöр температура лоас 8 градусысысь улынджык. А таöдз ми шонтам керка жыръяснымöс электрообогревательясöн да мукöд сикас приборöн. Наöс туйтöма лöсьöдöмыс да гортын дöзьöртöг кольöмыс вайöдö пöжарöдз.
Водзвыв дасьтысьöй кöдзыд кад кежлö. Видзöдлöй гöгöрбок керкаысь би сутугасö. Оръялöма да важмöма кö – лöсьöдöй. Но оз ков аслыныд дзоньтасьны, корлöй тöдысь мортöс. Мед тшöтш и видзöдлас лёка уджалысь приборъястö.
Öнi лавкаын вузалöны уна сикас шонтысянтор. Ньöбигöн колö кутны тöд вылын, кутшöм жыр кутанныд шонтыны и ыджыд-ö сiйö. Шуам, 12 квадратнöй метра жырлы лöсялас 1 кВт-а обогреватель. Бöрйигöн сюся видзöдлöй, позь-ö содтыны-чинтыны шонтан вынсö. Обогревательöн вöдитчытöдз лыддьöй инструкциясö да энö торкалöй индöдъяссö. Оз позь öттшöтш сюйны розеткаö кымынкö шонтысян прибор. Оз ков сыöн вöдитчыны, би сутугаыс кö дзиралö либö би киньяс сявкйöны. Вештöй обогревательнытö шкап-улöс дорысь. Эн-ö пуктöй орччöн öдйö öзйысь эмбур дорö да эн-ö косьтöй сы вылын кöлуй.
Бöрйöй сэтшöм шонтысян прибор, кодi ена шоналöм бöрын дугдö уджавны ачыс. Велöдöй челядьнытö да асьныд велалöй кусöдны электрообогреватель вой кежлö. Видзöдöй, медым приборын оз чукöрмы бус, öд сiйö вермас öзйыны. Проводъяс вылö некор эн пуктöй сьöкыд пызан-улöс.
Сотчысь обогревательтö пыр жö перйöй розеткаысь, а сэсся босьтчöй кусöдны. Вевттьöй кыз эшкынöн. Видзöдлöй, абу-ö восьса öшиньыд. Сынöдыс вермас ловзьöдны öдва чусалысь бисö. Сöмын бисö дзикöдз кусöдöм бöрын позяс жыртö тöлöдны.
Биысь видзчысян служба да войтырöс доръян республикаса управление