Челядькöд уджыс сылы вöлi бура тöдса нин, öд Сыктывкарса мöдöд номера педучилище помалöм бöрын 13 во уджалiс садйын. Дерт, школаад велöдчысьяскöд тöждыс ыджыдджык, нöшта сэтшöмъяскöд, кодъяс велöдчöны дышиника, веськодьпырысь — сiйö буретш накöд и уджалö.Сёрнитö татшöм томуловыскöд öткöн и класснöй часъяс вылын, ышöдö велöдчыны бурджыка, нуöдлö конкурсъяс да ворсöмъяс, медым пырöдчисны школалöн олöмö. Оз кö кывзысьны, гортаныс ветлöмöн сёрнитö налöн бать-мамкöд, öти сайын видзöдлö, тыр-бура-ö олöны семьяас. Водзын видзöдлас улын вöлi квайт лёк оласнога семья, талун сöмын кык. Öткымынъяслы мöрччис öлöдöмыс, сувтiсны зумыд кок вылö, и челядьныс босьтчисны тшöтш велöдчыны. Тайö висьталö Марина Валерьяновналöн бур удж йылысь. Уджас топыд йитöд кутö челядьöс лэдзчысьöмысь öлöдан меставывса котыркöд, кытчö, сыысь кындзи, пырöны школаса завуч, овмöдчöминлöн администрацияса уджалысь, а сiдзжö тыр арлыдтöм делöяс кузя комиссиякöд, семьялы да челядьлы социальнöй отсöг сетан шöринкöд да участкöвöй уполномоченнöйкöд. Куим тöлысь пиас öтчыд-кыкысь петавлöны рейдö, кытшовтöны культура керка, томуловлысь чукöртчанiнъяс, видзöдöны, бура-ö коллялöны прöст кад. Могыс кутшöмкö да пыр эм. Водзö вылö мöвпалö бырöдны челядь пöвстын сэтшöм лёк петкöдчöм, кыдзи куритчöм, кöсйö, медым найö вöлiны дзоньвидзаöсь. Чайтсьö, сылöн ставыс артмас. Челядькöд дыр да бура уджалöмысь сылы вичмöдiсны велöдан управлениесянь да школасянь почёт грамотаяс. 
Галина НЕСТЕРОВА.