«Ритмлы» вит во 

[ A+ ] /[ A- ]

Июнь 16-öд лунö Вöльдiнын кыпыда пасйисны том йöзлöн «Ритм» котырлы вит во тырöм. Та дыра нин томъяс котыртöны быдпöлöс гаж да шойччöм, петкöдчöны районын да республикаын. 

2013-2015 воясын «Ритм» вöлi том йöзлöн котыръяс пиын медбурöн, а 2016-2017 воясын мöдöн. «Ас кöсйöм серти отсасьысь» вермасьöмын пыр вöлi медводдзаяс лыдын. Петкöдчöны «Йиркап», «Серамбана футбол», «Бöръя герой» гажъясын, «Калейдоскоп» чукöртчöмын да с.в. 
Гажöдчöм йылысь видеороликъяслöн конкурсын 2016 воын «Ритм» лоис медводдзаöн, а 2017 воын мöдöн. Пöртiсны олöмö балаяс, вичмöдöм сьöм вылö ньöбисны палаткаяс, батут да с.в. Лöсьöдiсны серамбанаторъясöн петкöдчысь котыр да вурöдiсны торъя паськöм. 2014 воын Ягкöджса асвеськöдлан котырлы отсалiсны дзоньтавны спортзал. 2015 воын Вöльдiнса олöмаяслöн котырлы отсалiсны чукöртны коланторъяс, лэдзны «Войтöлöн чиршöдлöмъяс» книга. Идралöны чужан сикт, ю доръяс. Ветлiсны «Инноватика-Крохаль-2014» да «Лидер XXI века» чукöртчылöмъяс вылö. 2014 воын лоисны медбурöн «Доброволец Республики Коми» ордйысьöмын. 2016 воын петкöдчисны «Аттьö пöльлы вермöмысь» вермасьöмын да лоисны коймöдöн. 

Медыджыд шедöдöмторйöн лоис котырöн веськöдлысь Регина Чисталёвалöн водзмöстчысь том йöзлöн ставроссияса конкурсын вермöм. Регина ветлiс Казаньö. 

«Ритмлысь» вит во пасйöм воссис öтув йöктöмöн. Енэжö лэдзисны шаръяс. Челядьлы нуöдiсны серамбана пионербол. Медбур аслыспöлöс паськöмöн шуисны мöдöд класса велöдчысь Юлия Уляшевалысь да медводдза классысь Валерий Уляшевлысь. 
Том йöзлы котыртлiсны «Öдйö, вылöджык, ёнджык» вермасян гаж. Петкöдчисны Пузлаысь, Ягкöджысь да Вöльдiнысь котыръяс. Медводдзаöн лоис «Молодёжка» (Вöльдiн), мöдöн «Молния» (Пузла) да коймöдöн «Комета» (Ягкöдж). 

Венласигöн челядьлысь чужöмъяс Илона да Надежда Литвиноваяс серпасалiсны аква гримöн. Артмисны серамбана пемöсъяс. Сiдзжö нуöдiсны дартс-сюрприз. 

Гажöдiс «Ритмлöн» серам петкöдлысь котыр. Выльторйöн лоис фокусъяс петкöдлöм. Интернет отсöгöн велöдчис да ставсö дасьтiс Алёна Уляшева, отсасис Надежда Литвинова. Челядь видзöдiсны вом паськöдöмöн. 
Кыпыда мунiс «Ставсьыс медбурöсь» гаж, кöнi сьылiсны, йöктiсны, чолöмалiсны «Ритмöс» олöма йöзлöн котыр, школа-садйын велöдчысьяс, Вöльдiса культура керкаын уджалысьяс. Рытнас том йöз гажöдчисны Кулöмдiнса культура керкаысь С.Ефремовлöн да И.Нестеровлöн сьылöм улö. 

Галина Клюжева. 
Интернетысь снимок вылын: «Ритм» котыр.


Комментарии:

Добавить комментарий

Свежий выпуск: за 8 ноября