— Локтöны быдпöлöс арлыда челядь и колö быдöнöс сибöдны ас дорö. Ковмылö весиг отсыштны вöчны гортса удж, дасьтысьны петкöдчигкежлö. Быд лун гажöдчам: то ворсам ичöтъяскöд, то тöдмöдам ыджыдджыкъясöс кутшöмкö гижыськöд. Тшöкыда волöны асьныс садйысь либö коррекционнöй велöданiнысь. Ёна отсасьöны менö велöдысьяс Августа Владимировна Мишарина да Светлана Кузьминична Тесленко. Мый нуöдам, пуктам асланым сайт вылö, мед аддзисны мукöд челядь да локтiсны унджыкöн. Волöны и семьяясöн. Поснияслы сьöлöм выланыс ёнджыка воöны мойдъяс, ыджыдджыкъяс лыддьöны детективъяс да фентези. Корöны и сiйöс, мый тшöктöны лыддьыны школаын. 
Мариналы 27 арöс, быдтö 6 арöса Сашаöс. Велöдчö мöдöд номера педколледжын. Водзö кöсйö пырны Сыктывкарса университетö. Сьöлöм вылас воö вышивайтчöм, велöдлiс ыджыд мамыс. Кужö кыны кепысь, носки. Гортас ветлiгöн весиг поткöдлö пес да карнанöн вайö ва. 
Снимок да гижöд Галина КЛЮЖЕВАЛÖН.