Республикаöс сöвмöдöм кузя могъяс республикаса правительство кутас видлавны Комиын олысьяскöд öтув местаяс вылын. Медбура тайö артмö, кор власьтö пырысь кывкутысь йöз ветлöны районъясö, кыдзи босьтчисны вöчны некымын во сайын. Та йылысь висьталiс республикаöн веськöдлысь Вячеслав Гайзер Княжпогост районö ветлiгöн. Журналистъяслöн юалöмъяс вылö вочавидзигöн сiйö пасйис, мый татшöм командировкаясын быть колö аддзысьлыны общественнöй котыръясö пырысьяскöд, сöветса депутатъяскöд, асвеськöдлан котыръясын зiльысьяскöд.
Кыдзи висьталiс В.Гайзер, татшöм ветлöмъяс бöрын, ковмас кö, водзö вылö сувтöдöм могъясö кутасны пыртны стöчмöдöмъяс. «Ми лöсьöдам республикалöн социальнöй да экономика сöвмöмлысь туйвизьяс, вынсьöдам правительстволöн колана индöдъясöн. Но збыльысь гöгöрвоны, кыдзи да помöдз-ö сувтöдöм могъяс пöртсьöны олöмö, кутшöм кывкöртöдъяс позьö вöчны, аддзан сöмын местаяс вылö ветлöм бöрын. Буретш та вöсна республикаса правительствоö пырысьяс кутасны и водзö ветлыны республика пасьта, воласны дзик быд кар-районö», — висьталiс Вячеслав Гайзер.
Медводз, февраль 11 лунö, республикаöн веськöдлысь волiс Кулöмдiн районö.
Немдiнысь видзöдлiс кусöдчысьяслысь депо, кодi босьтчис уджавны выль во водзын. Сiйöс кыпöдiсны татчöс уджалысьяс асьныс. Став коланторйöн могмöдiс билы паныд сулалан да йöзöс доръян службалöн республикаса управление. Пост пырö кусöдчысьяслöн Югыдъягса часьтö. Танi ставыс квайт уджалысь. Кольöм вося арын вичмöдiсны выль кусöдчан машина. Управлениеöн веськöдлысь И.Я.Терентьев тöдчöдiс, мый öнi эм став позянлун, медым Немдiн вожын неминучаяс дырйи тышкасьны бикöд.
В.М.Гайзер кежалiс выль школа кыпöданiнö. Вöчö велöдчанiнсö «Северстрой» котыр. Уджö босьтчисны кольöм вося арын. Талун танi зiльö кызь гöгöр морт. Вöчисны нин подув, сувтöдалiсны кöрт каркасъяс. Коланторъяс вайöны падмöгтöг. Вячеслав Михайлович сиис уджалысьяслы сигöртны школа кыпöдöм урчитöм кадöн, мед выль велöдчан воын Немдiн вожса челядь танi нин пуксисны партаяс сайö.
Школаын республикаса юралысь аддзысьлiс Немдiнса да орчча сикт-посёлокъясса олысьяскöд, медым тöдмавны, кыдзи олöны, кутшöм майшöгъяс личкöны найöс талун, вочавидзис юалöмъяс вылö. Майшöдлö йöзöс унатор: эштöдасны-ö арöдз выль школа кыпöдöм, кодöс немдiнсаяс виччысьöны дас сайö во нин, кор дзоньталасны асфальта туй, кодöс кисьтöны вöр кыскалысь машинаяс сетасны-ö новлöдлыны велöдчысьясöс выль автобус, öд Парчысь да Лебежнöйысь кындзи, тавосянь новлöдлöны и Мысса челядьöс, отсалас-ö республика водзö пöртны олöмö районын ичöт бизнес сöвмöдöм кузя балаяс. Элясисны, мый Мысын том йöзлöн абу спортзал, Тимшерын вöзйисны кыпöдны биатлон сöвмöдан спорткомплекс, сы вöсна мый танi челядькöд ёна уджалöны лыйсьöм да лыжиöн котралöм кузя, лыйсьöмöн том спортсменъяс нималöны весиг Россия пасьта. Вöлiны и мукöд юалöмъяс. В.М.Гайзер быдöн вылö сетiс вочакыв.
Республикаса юралысь волiс и Джеджимö. Татчöс музейын аддзысьлiс «Коми войтырлöн» районса представительствоö пырысьяскöд. Чай юигмоз сёрнитiсны районын медся тöдчанаторъяс да майшöдланаторъяс йылысь. Райадминистрацияысь экономика да вот юкöнöн веськöдлысь Ю.С.Малышева тöдмöдiс, кыдзи сöвмö да паськалö районын туристалöм, кытчö да кутшöм ордымъяс эмöсь талун. Представительствоöн веськöдлысь Г.Е.Пашнина висьталiс, мыйöн нималö район. Тайö — «Василей» фестиваль, «Райда», «Йиркап», «Зумыд ош», «Ваберд» да «Туган» конкурсъяс. Вöзйис, медым бöръясö, кыдзи и «Райдаöс», нуöдны республика тшупöдын, «Василей» гаж котыртны челядь пöвстын. Вöлiны и мукöд вöзйöмъяс. В.М.Гайзер вочавидзис майшöдлана юалöмъяс вылö, öткымынъясöс босьтiс тöдвылö.
Районö волiгöн республикаса юралысьяслысь могъяс олöмö пöртысь В.М.Гайзер, районса юралысь Д.А.Шатохин да мукöд кывкутысь йöз пыравлiсны юрсиктса выль садйö. Танi найö кытшовтiсны кыпыд да югыд жыръяс, кöнi челядьöс öнiя кадö быдтöм-велöдöм вылö эм став коланаыс. Пыралысьяслы петкöдлiсны, кыдзи велöдöны интерактивнöй пöв да пызан отсöгöн, сьылöны шылада инструментъяс вылын ворсöмöн да с.в. Топыд йитöдаöсь бать-мамкöд, юасьöмъяс отсöгöн дасьтöны челядьöс гöгöрбок сöвмöдöм могысь программаяс. Выль оборудование да выль технологияяс пыртöмöн асьныс велöдчöны.
-Татшöм бур садйысь зэв ыджыд аттьö правительстволы да челядьöс видзанiн кыпöдысьяслы. Шудаöсь челядь и бать-мам, кыпыд руаöсь уджалысьяс, — -сёрнитiс садйöн веськöдлысь Светлана Егоровна Уляшева.
Садлы козинъяс вичмисны правительствосянь и районса администрациясянь.
В.М.Гайзер волiс и вöр колясъясысь брикет вöчанiнö.
-Öнi эм кытчö вöр заптысь котыръяслы инавны пилипызь да гöрбыль. Уджалö сиктысь 12 морт, — тöдмöдiс брикет вöчанiнса генеральнöй директор Дмитрий Михайлович Конаков.
— Брикетöн позьö ломтысьны кыдз гортын, сiдз и ломтысянiнъясын. Сынöдлы лёк оз вай. Артмöм пöимöн бур вынсьöдны муяс, — пасйис архитектура, строительство да коммунальнöй овмöс кузя министрöс медводдза вежысь Александр Александрович Можегов.
-Воöн кутасны вöчны дас сюрс тонна брикет. Нинöмöн оз торъяв из шомысь, артмас сьöм видзтöм, — содтiс промышленносьт да транспорт сöвмöдöм кузя министрöс медводдза вежысь Александр Анатольевич Гибеж.
Брикет вöчöм ваяс бур районлы, коммунальнöй овмöслы, вöр-валы да промышленносьтлы. Öнi брикетöн ломтысьöны юрсиктса кывтыдпомын, видзöдласны да öткодяласны из шомкöд. Гöсьтъяс волiсны и сэтчö.
-Ывлаыс шоныд да кывкöртöд вöчны водз на. Но уджалысьяслы воис сьöлöм вылас, мый оз ков жуглыны да пыртны ывла вылысь из шом, абу буса, он апапав лёк сынöд, он няйтчы, — висьталiс ломтысянiнынсь мастер Сергей Игоревич Сенькин.
Республикаса юралысьлысь могъяс олöмö пöртысь В.М.Гайзер пыравлiс кыпалысь спорткомплексö, кöнi вöчöны пытшкöсса уджъяс. Сёрнитiсны, мед вермытöмъяс пырасны-сибаласны быд жырйö, тамогысь вöчны став коланасö.
Рытнас республикаöн веськöдлысь В.М.Гайзер районса культура керкаын аддзысьлiс районса олысьяскöд. Медводз чолöмалiс тшупöда пасöн Помöсдiнса асвеськöдлан котырöн юрнуöдысь Н.И.Кармановаöс, сетiс козин да дзоридзьяс.
Вячеслав Михайлович вöчис районö волöмлы неыджыд кывкöртöд. Висьталiс, мый аддзылiс уна буртор. Тöдчö, мый район сöвмö водзö. Тадзи, районъясö ветлiгöн, ясыда тыдовтчö, кыдзи пöртсьöны олöмö правительствоöн сувтöдöм могъяс, и мый, гашкö, колö вежыштны, пыртны выльсö.
А районсаясöс майшöдлö унатор, и та йылысь сёрнитiсны восьсöн. Кулöмдiнын зэв ёна колö выль поликлиника. Öнi сiйö вöвлöм КБО-ын, и сэтчö оз тöрны. Кыптiс юалöм и Помöсдiнса больничалы юридическöй лицолысь статус кольöм кузя. Зимстанын терапевт абутöмла некымын во сайын тупкисны висьысьясöс куйлöданiн. Талун колана врач эм, и зэв ёна колö бöр восьтны куйланiнсö. Посёлокса больничаö сiдзжö колö педиатр, сы вöсна мый Зимстан вожын 18 арöсöдз 600 гöгöр челядь.
Дерт, вöлiны и туйяс кузя юалöмъяс. Этша сьöм вичмö, медым кутны найöс колана ногöн тöлын, тулыс-арын. Рöспута дырйи туйяс тупкöм йылысь сетiс юалöм «Флора» котырöн веськöдлысь. Ас вылö уджалысьяслы ковмö сулавны, сiдзкö, воштöны сьöм.
Райсöветса депутат Р.В.Третьяков аттьöалiс, мый республика уна сьöм вичмöдö школаяс, садъяс, спорт шöринъяс кыпöдöм вылö. Но мед эськö эз сувтны та вылын. Шуам, ёна колö школа Помöсдiнын, коми культура шöрин Кулöмдiнын, спорт шöрин бердö бассейн да с.в.
Вöлiны юалöмъяс ылi сиктъясын омöль сотöвöй йитöд да интернет, районын ломтысянiнъяс сиптöм кузя. Вочакыв вичмис и В.М.Гайзерсянь, и районса юралысь Д.А.Шатохинсянь.
А.Логиновöс, Кулöмдiнса олысьöс, майшöдлö йöзлöн юсьöм. Юалiс, мый вöчö правительство тайö ёсь гöрöдсö разьöм могысь. Абу-ö бурджык пыртны, кöть нин республика тшупöдын, сiдз шусяна «сухöй закон».
Вöлi юалöм Сыктывкарса вöр промышленносьт техникумлысь Кебанъёльса филиал тупкöм йылысь. Сылöн зэв ён велöдан подув. Эмöсь велöдысьяс, велöдчысьяс. Унаöн оз вермыны ыстыны челядьнысö велöдчыны Сыктывкарö. А танi ас районын, босьтöны уджалан специальносьт. В.Гайзер босьтiс тайö юалöмсö аслас дöзьöр улö.
Йöз кöсйисны тöдны, вайöдасны-ö районö газ, кор восьтасны Серёговоса санаторий, мый падмöдö Асыввож каръерысь из перйöм, обелискъяс да казьтылан пасъяс дзоньталöм вылö сьöм вичмöдöм, школаса бибилиотекаръяслысь пенсия вылö петöм бöрын кокньöдъяс бырöдöм, локальнöй тышъясын вöвлöмъяслы керка кыпöдöм вылö дон босьттöг му юкöнъяс сетöм да с.в.
Пöшти став юалöм вылö В.М.Гайзерсянь вичмис вочакыв. Мый вылö эз вермы вочавидзны пыр жö, кöсйис сетны вочакыв сёрöнджык. Вöлiны и вöзйöмъяс, кодъясöс Вячеслав Михайлович босьтiс тöдвылö.
Лидия ЛИПИНА,
Галина НЕСТЕРОВА,
Марина ДАДАШОВА.
Снимокъяс авторъяслöн.