Районлöн вежа места
Уллянаса манастыр йылысь кыв
Дзоньнас кö — Троице-Стефано-Уллянаса манастыр. Подувсö пуктылiс да кыпöдлiс 14 нэмын вежа Перымса Стефан да лоö Россияын медся важся манастыръяс лыдын. Тайö манастырыслöн зэв аслыспöлöс судьба. Сiйöс куимысь кыпöдлiсны торпырыгъяс пиысь. Революцияöдз на кыкысь эновтлiсны – 15 да 18 нэмъясын. Вежа Стефан пуктылiс подувсö вит манастырлы, кодъяс лыдö пырö и Уллянаса. Кыптылiс сiйö уна гижöдъяс да висьталöмъяс серти 1383-1396 воясö, сiйö кадö, кор Стефан лои Епископ сана, такöд öттшöтш лои лöсьöдöма и Перымса епархия, кодöн и веськöдлiс Стефан. Коми фольклорысь позьö аддзыны, мый вежа Стефан кайис Эжватi колана местаöдз, кöнi и подувтiс Спас Нерукотворный нима манастыр. Местаыс, кытчö сувтöдiсны манастырсö лои бöръяöн, кытчöдз волiс Перымса Стефан. Миян кадöдз эз воны некутшöм пасйöдъяс ли документъяс сiйö кадся манастыр йывсьыс. Абу тöдса, кымын сэнi вöлi юкöн, кутшöм вöлi уставыс да кор киссис. Чайтöны, мый сiй киссис 1447-1448 воясö вогуличьяслöн рöзöритöм понда, кодъясöн юрнуöдiс Асыка князь. Тайö кадас и чужис нимыс – Улляна (Ульяново). Эм предание, мый разбойникъяс, кодъяс куштылiсны сиктъяссö Эжва пöлöн, гусялiсны да нуисны öти вичкоса служитысьлысь Улляна нывсö. Ныв шыбитчис ваö да вöйис. Буретш тайö местаыслы паныд и сулалö öнi манастыр. 16 нэмын сар Иван Грозный дзикöдз путкыльтiс ас улас Перымса губернияöс. Медым öддзöдны да ёнмöдны Перымлысь кывкутöмсö Вологдаса губерния водзын, став коми службасö шуöма вöлi вуджöдны роч кыв вылö. Сотiсны став коми книгасö да молитвенниксö. А найöс, кодъяс ерепенитчылiсны да гусьöн видзисны найöс, жалиттöг накажитлiсны да репрессируйтлiсны. Тайö вайöдiс сыöдз, мый 15-16 нэмъясö Перымса му вылын эз коль ни öти манастыр, кодъясöс кыпöдлiс вежа Стефан.
Киссьöмöн да вунöдöмöн манастыр олiс кыксё во, кытчöдз 17 нэмлöн мöдöд джынын öти енлы служитысь, Фёдор Тюрнин, эз кöсйысь ловзьöдны бöр манастырсö. 1667 воын Фёдорöс шырисны манакö да сетiсны Филарет ним. Патриархлысь благöслöвенньö корöм бöрын аслас нёльнан пиыскöд мöдöдчис Москвасянь Уллянаö. Аскöдныс вайисны иконаяс, кодъяс сэсся вочасöн разалiсны вичкоястi. Кор Тюрнинъяс воисны Уллянаöдз, найö эз адзыны весиг манастырыслысь колясъяссö. Овтöм на сэки сiйö места вылас найö лэптiсны неыджыд Спас Нерукотворнöйлы сиöм вичко. Орчча сиктъясын, Кулöмдiнын да Дереваннöйын, олысь йöз, зэв лёкысь примитiсны локтысьясöс. Найö аддзисны манакъясын налысь оланiнъяссö да муяссö мырддьысьясöс. Медым öдйöджык бöр вöтлыны локтысьясöс, крестьяна эз вузавны налы сёян, мырддялiсны муяс да ытшкан видзьяс, а бöрыннас мунiсны весиг судö. Филарет, кодi мудзис нин олысьяслöн вöтлöмысь, мунiс Москваö да аддзысьлiс сар Алексей Михайловичкöд да ставсö висьталiс, мый вöчсьö Уллянаын. Сар гöгöрвоис Тюрнинöс да сетiс сылы грамота Яренскöй уездлöн Михаил Мусорский воеводалы петкöдлöм могысь. Грамотаын вöлi гижöма, мед воевода видзис манакъясöс олысьяслöн лёкалöмысь да вичмöдiс налы муяс гöрöм да пуктысьöм вылö. Грамота сетöма вöлi 1671 вося март 31 лунö. Сарлöн гуöм бöрын йöзлöн лёкалöм Тюрнинъяс вылö лои мöдпöлöс. Быдсяма ногыс кутiсны сёрнитны, кыпöдны нинöм абусö, элясьны судъясö да управаясö. Но аслас кутчысьöмöн да терпенньööн Филарет коркö-некоркö пырис жö йöз сьöлöмъясö и найö весиг корисны сылысь прöща важсясьыс. Кулiс сiйö 1671 вося июнь 22 лунö. Батьыслысь уджсö босьтчис нуöдны Гурий-ыджыдджык пиыс. Бара кыптiс важся вен Тюрнинъяс да йöз костын. 1673 воын кык сиктса олысь пыралiсны вичк да гусялiсны сьöм да быдсяма вичкоса кöлуй. Гурий дыр корсьысис, но весьшöрö. Весиг сар Фёдор Михайлович дорö ветлöм нинöм эз сет. Гусясьысьяс быттьö ваö вöйисны. Кык во мысти, 1675 воын, бара пыралiсны вичкоö, а 1684 воын сiйö сотчис. Но вокъяс лолöн эз усьны да 1689 воын вичкосö кыпöдiсны выльысь. Тайö кадсяньыс вен Тюрнинъяс да кулöмдiнсаяс да дереваннöйсаяс костын кусiс дзикöдз вылö нин. Öти олысь весиг вуджис овны вичкоö. Сиктсаяс отсалiсны кыпöдны мöд вичко (во имя Похвалы Пресвятой Богородицы). Но 18 нэмлöн медводдза джынъяс нин вичко бара лои киссян да вунöдан выйын.
19 нэмлöн мöдöд джыннас кыкнан пу вичкоыс дзикöдз лоины шогмытöмöсь да на пыдди кыпöдiсны öти выльöс. Олiсны сэнi кык вежа бать, кык сьылысь да кык крестьянскöй семья. 1785 воын Уллянасаяслы вöлi сетöма 815 десятина да 1116 квадратнöй сажень му. Кöзяинъяснас колины Тюрнинъяслöн рöдвужыс. Муяс вылысь босьтiсны 1130 пуд рудзöг да заптiсны 290 додь турун. Видзисны 50 юр гырысь скöт, 100 ыж да 14 вöв.
19 нэмлöн мöдöд джынъяс Вологдаса епархиальнöй управление сетiс корöм Синодö лöсьöдны Троице-Стефаново-Уллянаса манастыр. Коми муын пö öти манастыр абу, а кöсйысьыс служитны Енлы абу этша. Синодлöн индöм серти 1860 вося октябр 18 лунö манастыр сöвмöдöм да кок вылö сувтöдöм могысь вöлi вичмöдöма 815 десятина вöвлöм Уллянаса вичколысь му, Лальскöй манастырысь локтiс 3 иеромонах, öти иеродьяков да 3 послушник. Куим воöн вежа вокъяс лöсьöдiсны да дзоньталiсны вичкосö да сылысь колокольнясö, лöсьöдiсны гоз-мöд келья. Но ыджыд дзоньтасьöмъяс вылö олöма манакъяслöн вынъяс эз нин тырмыны. Отсöг вылö корисны Вологдаса епископлысь том да вынаджык манакъясöс да Енлы служитысьясöс. Епископ мунiс воча, шыöдчис архимандрид Парфирий дорö корöмöн, мед сiйö мöдöдiс Уллянаса манастырöс ыджыд опыта олöма эскысьясöс, а накöд том войтырöс. 1866 вося июнь 22 лунö найö мöдöдчисны Уллянаö. Арнас, кор помасисны мувывса уджъяс, шуисны кыпöдны вичко (во имя Преподобных Зосимы и Савватия).
Кöнi кыпöдны вичкосö — ва дорын али мыльк йылын – дыр эз воны öти кывйö. Öд кыпöдны кö мыльк йылын вын да стрöитчанторйыс ковмас ёна унджык.
Шуисны бöрйыны пудйысьöмöн. Усис лэптыны гöра йылö. Эз дыр кадын служитысьяслы крестьяна отсöгöн удайтчис заптыны да катöдны колана мында кер. Öттшöтш кöсйисны вежны важ вичкоысь пачсö. Та вылö колiс зэв уна кирпич. Вöчалiсны да сотiсны веськыда места вылын. Сотiс кирпичсö ачыс вичколöн ностоятельльыс. Медводдза кöдзыдъясöдз писькöдiсны öкмыс да джык километр кузя прöсека ыджыд туйöдз. Сентябр 27 лун кежлö манастырлöн подулыс вöлi нин дась. Стрöитчан уджъяс кындзи колiс уджавны муяс вылын, чукöртны пуктас да нянь, нуöдны службаяс да с.в. Тöв пуксьöм бöрын петкöдлiсны вöрысь керъяс да буртуйтiсны места вылын. Манастырын сiйö кад кежлас олiс сöмын 25 морт. На лыдö пырисны и пöрысьяс. Кольö сöмын чуймавны, кыдзи налы сэтшöм дженьыд кадöн удайтчис вöчны та ыджта удж. Кыпöдны манастыр отсасисны и мукöдъяс: Усть-Сысольскысь купеч дöва Сидорова, кодi козьналiс кык судтаа керка, Вяткаысь купеч Василий Степанович Сунцев – отсалiс сьöмöн да прöдуктаöн. Аслас жö сьöм вылö Василий Степанович вöчöдiс 30 пуда жыннян. Тулыс локтöм бöрын уджъяс бара ловзисны. Аддзисны пöдрадчикöс, кодi кöсйысис вöчны 300 сюрс кирпич. Манастырсö шуисны вöчны кирпичысь. Плöтникъяс асывснь рытöдз уджалiсны пу вичко лэптöм вылын. Ыджыд пост дырйи манастырö кутiсны нин локны паломнрикъяс. 1867 вося октябрын пу вичко да манакъяслы олан керка лои дась. Керкаын лöсьöдiсны 24 келья, сёянiн да пусянiн. 1867 вося декабрын вайисны иконостас, кодöс восьса сьöлöмöн козьналiс манастырлы Вологдаса купеч Б.А.Белозёров и декабр 11 лунö вичкосö вежöдiсны вежа Зосим да Савватий нимъяс улын. 1869 воын босьтчисны кыпöдны кирпичысь вичко. Май 1-öд лунö кутiсны лöсьöдны фундамент. Ар кежлö медводдза судтаыс вöлi нин дась. Уджъяссö кад кежлö ковмис сувтöдны, мед лöсьöдöмаыс косьмис. Кирпичыс вöлi эз ёна бур. Та вöсна и ковмис вичколысь судтасö чинтыны матö кöкъямыс метр вылö. Тайö жö во вевт улöдз кыпöдiсны нöщта на öти олан керка 13 сажень кузьта.
1871 воын стрöитчöм вöрзис места вылысь. 1871 вося июль 10 лунö манастыр видзöдлыны волiс Вологдаса выль епископ Палладий, кодi ё1на чуймалiс, кыдз позис кык воöн кыпöдны кык вичко кындзи кык судтаа гостиница, мастерскöйяс, скöт карта, мельнича, неыджыд кирпич вöчан завод, код вылын дасьтiсны нин кирпичсö выль колокольня вылö. 1870 воын манастырын олiс 70 морт, на пиысь 36 манак. Колокольня вöчны босьтчисны нин 1872 воын. Сыкöд орччöн нöщта на кык стрöйба – манакъяслы кельяяс да öтувъя сёянiн.
Татшöм ногöн квайт воöн сöмын квайт манак кужисны, позьö шуны, куш места вылын чны манастыр, кодi нималö Россия пасьта. Олысьяслöн лыд серти Соловецкöй манакъясöн вöчöм манастыръяс пиысь тайö манастрыс лоö мöдöн. Та кындзи Уллянаса манастыр вöлi эз сöмын медся нималанаöн, но и медся озырöн. 19 нэм помын Уллянаса манастыр улын вöлi Комиын став вичкояслöн муясысь 10 юкöныс. Комиын сы кадö вöлi 133 вичко.
Манастыр бердын воссис богодельня да 17 морт вылö церковно-приходскöй школа. 1866 восянь 1917 воöдз манастырын лои кыпöдöма 44 стрöйба! 21 – пуысь да 23 – изйысь. Пуысь вöчöмаяс лыдö пырисны: Зосим да Савватий нима вичко, шойнаса Успенньö вичко да часовня, кык олан стрöйба, кык судтаа гостиница, скöт каота да мукöдъяс. Кирпичысь вöчöма кык судтаа вит юра вичко, нёль яруса да нёль башняя колокольня, 500 морт вылö öтувъя сёянiнi, Архангел Михаил нима вичко да шойна вылын öти судтаа ичöтик вичко. 20 нэмын нин кыпöдiсны бурдöдчанiн, нöшта öти оланiн, мастерскöйяс, кöрт доранiнъяс. Манастырсö кытшалiс нёль пельöса стен, кодлöн куш öти бокыс вöлi 110 сажень. 1895 вося апрель 11 лунö архимандрит Матфейлöн кувсьöм бöрын юрнуöдысьнас лои иеромонах Палладий, а 1895 вося ноябр 19 лунö сiйö лоис игуменöн. Тайö юрнуöдысьнас манастыр мунiс 1900-1903 вося кризис, Японскöй да мукöд сьöкыдлунъяс пыр. Кулiс Палладий 1912 вося март 2 лунö. 1912 восянь юрнуöдысьöн бöрйисны 39 арöса иеромонах Амвросийöс, кодi лои революцияöдз бöръя веськöдлысьöн. Эз кö эськö вöв сiйö сьöкыд кадыс 20 нэмö, Уллянаса манастыр лои эськö медся ыджыд лов кыпöдана, вежа да пыдди пуктана манастырöн став Войвылын. Но 1917 вося революция вужвыйöн кисьтiс став кöсйöмсö да лачасö. Манастыр кушмис да киссис. Ккор власьт дорö локтiсны большевикъяс, вичколы и збыльысь лои зэв сьöкыд. 1918 вося март 7 лунö Усть-Сысольскса земельнöй сöвет шуис сетны манастырлысь став мусö земельнöй юкöнлы. Ноябр 23 лунö Усть-Сысольскса уездисполкомлöн заседание шуис сетны манастыр да сылысь муяссö Усть-Сысолькса сельхоз училищелы. Тупкиг кежлö манастырын вöлi 25 манак. Но и тайö сьöкыд кадö вичкояс эз дугдывны уджавны.
1929-1930 воясö став вичко вывсьыс нетшкисны жыннянъяссö, на лыдын вöлi и 16 тонна сьöкта «Праздничнöй» жыннян. 1931 воын кисьтiсны Троица вичко. Война кадö манастырысь вöчисны госпиталь, а сёрöнджык юрöн торксьöмаяслы бурдöдчанiн. 1969 воын государство босьтiс манастырöс видзöм да дöзьöритöм улö, кыдз культуралысь да историялысь памятник. 1988 воö стрöйбаяссö сетiсны сыктывкарса «Орбита» заводлы санаторий стрöитöм могысь. Мöвпалiсны, мый завод дзоньталас вичкояссö, но нинöм эз артмы. И сöмын 1994 воын манастыр вуджис Роч Православнöй Вичколы.
Манастыр бара кутiс ловзьыны. Тайö сьöкыд уджас босьтчис иеромонах Питирим (Волочков) да сылöн отсасьысьяс: иеромонах Иона, Ефрем, Роман (Овсиенко), Виталий, Константин, Александр да Евгений. 1933 волöн помын нин Питирим шыöдчис Коми Республикаса Юстициялöн Министерствоö корöмöн, лöсьöдны манакъяслысь котыр. 1994 вося февраль 25 лунö тайö лои позянаöн.
Кор 1994 вося июльö медводдза локтысьяс воисны манастырö, син водзаныс сувтiс лов уськöдана шуштöм серпас: стрöйбаясыс джынсьыс унджык киссьöмаöсь, а сiйö, мый коли, вот-вот киссяс. Сиенысь коли сöмын неыджыд юкöн. Уна вын ковмис вежа вокъяслы, мед кöть неуна вайöдны пöрадокö манастыр. Но нинöм вылö видзöдтöг лун 7-8 мысти нин Архистратиг Михаил нима вичкоын мунiс нин медводдза служба. 1994 вося сентябр 10 лунö манастырын вöлi нин 12 морт, а во помын – 13.
1996 воын манастыр бердын воссис духовнöй училище. Владыка Питиримлöн шуöм серти, шола – аслыссяма тшупöд, кодi петкöдлас, вермасны-ö манакъяс дасьтыны студентъясöс налöн абу кокни туй кежлö.
Манастыр – тайö медводз йöз, а сэсся нин ставыс мукöдыс. Йöз – тайö и эм сiйö подулыс, код отсöгöн манастыр век на ловзьылiс.
Алексей КОРЕЦКИЙ.