Май 9-öд лунö районса олысьяс 68-ысь кыпыда пасйисны Победа лун.
Гоз-мöд лунöн водзвыв Кулöмдiнса шöр школаын велöдчысьяс разöдiсны ветеранъяслы, тылса уджалысьяслы, войнаса челядьлы да салдат дöваяслы гаж вылö корöмъяс да чолöмалöмъяс. Май 9-öд лунö водз асывсянь том йöзлöн районса сöветö пырысьяс Великöй Отечественнöй войнаын усьöмаяслы пас гöгöр мичмöдiсны шаръясöн. Йöзöс социальнöя могмöдан шöрин котыртiс ветеранъясöс машинаясöн нуöм-вайöм. Волiсны войнаса ветеран А.Д.Мишарин, кодлы мартын тырис нин 90 арöс да кодлы мойвиис кыкысь веськавны Победалöн парад вылö, тылын уджалысьяс, салдат дöваяс да войнаса челядь ― ставыс 50 гöгöр морт.
Победалы сиöм митинг восьтiс Кулöмдiнса администрацияöн веськöдлысь С.В.Рубан. Чолöмалiс ветеранъясöс да чукöртчысьясöс ыджыд праздникöн, пасйис Победалысь тöдчанлун да висьталiс ыджыд аттьö фронт вылын да тылын тайö лунсö дорысьяслы. Война вылö мунiс 7716 морт, бергöдчисны сöмын 3780-öн.
Аттьöалан да чолöмалан кывъяс сiдзжö висьталiсны районса юралысь Д.А.Шатохин, районса сöветöн веськöдлысь А.Н.Кондрашкин, республикаса военкоматлöн Кулöмдiнса юкöнöн веськöдлысь О.В.Ватанский да ветеранъяслöн райсöветса председатель Г.А.Кравченко. Митинг помасис чöв-лöнь здукöн да пытшкöсса делöяслöн юкöнын уджалысьяслöн автоматъясысь сынöдö лыйöмöн.
Ветеранъясöс корисны Кулöмдiнса сельполöн нуръясянiнö праздничнöй пызан сайö, а гаж вылö чукöртчысьяслы культура керка водзын позис видлыны полевöй кухняысь салдатскöй рок, кодöс разöдiсны шöр школаын велöдчысьяс, зэв унапöлöс пöжас, жаритöм яй да с.в.
Тöла поводдя вылö видзöдтöг, йöз чукöрмис зэв уна. Гажöдiсны сьылысь-йöктысь котыръяс, нуöдiсны конкурсъяс, ворсöмъяс да эстафета.
Гаж помасис сёр рытын дискотекаöн да салютöн.
Сордйылын Победа лун таво пасйисны медводдзаысь. Праздниксö котыртiсны да нуöдiсны татчöс да Помöсдiнса том йöз. Артмис ыджыд гаж.
Медводз нимöдiсны война вылын усьöмаяслысь пас, кодöс сувтöдiсны кольöм воын сиктсаяслöн сьöм вылö. Таво вöчисны содтöд пöв, кытчö пасъялiсны усьöм салдатъяслысь нимъяс.
…1941 вося июнь 22 лунын школа помалысьяслöн вöлi бöръя рыт. Водзын найöс виччысис шуда олöм, радейтчöм. Но налöн кöсйöмъясыс эз збыльмыны: пансис война. Ныв-зон мича паськöмнысö вежисны салдат шинель вылö. Матö нёль во миян айму ыпъялiс биын. Видзöдысьясöс синва доршасьöмныс вöрзьöдiс том йöзлöн петкöдчöмыс. Пальöдiс найöс Победалöн гажа гудöк шы улын фронт вылысь локтысь машина. Ставныслы вöлi нимкодь, öта-мöдсö кутлiсны да чолöмалiсны Ыджыд Победаöн.
Бипур вылын пуисны салдатскöй чöскыд рок, ыджыд самöварын пузьöдiсны чай. Кузь пызан сайын пукалöмöн боевöй сё грамм лэптöмöн казьтыштлiсны ас сиктсаясöс, кодъяс сетiсны олöмнысö миян шуда олöм вöсна. Олöма йöзлы, война кадö уджалысьяслы, вичмöдiсны юмов козинъяс да челядьöн вöчöм чолöмалана гижöдъяс. Олöма йöз дыр на пукалiсны, сьылiсны гудöк улö, казьтылiсны войнадырся кад.
Керчомъяын май 9 лунö кыпыда восьтiсны война вылын вöвлöм Алексей Егорьевич Тимушевлы сиöм казьтылан пас, кодöс öшöдiсны ичöт классъяс велöдан вöвлöм школалöн, кöнi велöдчис А.Е.Тимушев, а öнi сиктса администрациялöн керка, стенмö. Керчомъяса зон война помасигöн нин гранатаöн пасьвартiс вöрöглысь нёль танк, ёна доймалiс. Ыджыд подвиг йылысь гижис «Фронтовая правда» газет, кодi петiс 1945 вося апрель 19 лунö. Гвардияса ефрейторöс пасйисны Гöрд Знамя да Гöрд Звезда орденъясöн.
А.Е.Тимушевлысь олан туй казьтылiс ветеранъяслöн Керчомъяса сöветöн веськöдлысь Нина Самарина, кодi босьтчис туявны кöкъямыс во сайын. Ставсö гижалiс рöдвужыслöн висьталöм серти. Кык во сайын уджö пырöдчис и Кöрткерöсысь Василий Попов, кодi «Моя война.. Не о прошлом» книгалысь мöдöд том нимöдiгöн кöсйысис республикаса юралысьлы корсьны А.Е.Тимушевлöн подвиг йылысь колана документъяс, мед В.М.Гайзер вермис шыöдчыны Россияса президент дорö Алексей Егорьевич Тимушевлы Россияса Геройлысь ним сетöм йылысь могöн.
Казьтылан пöв восьтiгöн сёрнитiсны райадминистрацияöн веськöдлысьöс вежысь Н.А.Левченко, сиктса юралысь Л.Е.Траилина, волiсны Зимстанысь, Паспомысь А.Е.Тимушевлöн рöдвуж.