Пывсянын гудöк

[ A+ ] /[ A- ]

Иван ёртыскöд кайлiс кыйны чери сиктсянь дас верстсайса вöрса ю вылö Чиган Митрейлöн керка дорö. Керкаыс эз нин вöв, сiйöс сотлiсны, а пывсяныс, кöть вöлi сотчыштöма, сулалiс на. Но сэнi эз узьмöдчыны, вöчыштiсны лыска чом. Тöдтöг эз овны, мый Чиган Митрейсö, бур кыйсьысьöн вöлöма да, горш йöз вилiсны буретш танi. Вöр керкасö сотлiсны бöрынджык. Öзтылöмаöсь и пывсянсö, но сiйö кусöма.
Нуръясьыштiсны да водiсны узьны. Вой шöр гöгöрын Иван кылiс öдзöслысь дзуртыштöм шы. Садьмис и ёртыс. Чуймисны нöшта ёнджык, кор пывсянысь кылiс гудöк шы. Гудöкыс ворсiс зэв нора, быттьö мый вылö кö элясис. Тайö нора ворсöм улас сэсся босьтчисны сьывны айлов да нывбаба. Тыдалö, Чиган Митрейыс да сыысь томджык на гöтырыс, кодöс öтлаын и вилöмаöсь верöсыскöд. Дерт, эз асьныс, а ортъясыс.
Весиг шуштöмкодь лоис. Коркö да и сьылысьяс ланьтiсны. Коркö да и дзикöдз югдiс. Сэки и збоймыштiсны ёртъяс да сюйлiсны юрнысö пывсянас. Лабич вылын вöлi кык стöкан, а пельöсланьын нар вылын ёкмыльтор. Мича чышъянöн гартыштлöмаöсь гудöк, но ставыс нин сьöдасьöма, рокмунöма. Эз вöрзьöдны нинöм. Ставсö колисны сiдзи, кыдзи вöлi.
Иван ЛЮТОЕВ.
Керчомъя.


Комментарии:

Добавить комментарий

Свежий выпуск: за 18 октября