Март 14 лунö Россияын пасйисны православнöй книгалысь лун, и буретш тайö лунö Кулöмдiнса шöр библиотека бердын воссис православнöй литературалöн шöрин — республикаын коймöд. Та кежлö дасьтысисны некымын во, чукöртiсны книгаяс. Унаöс козьналiсны лыддьысьысьяс, отсалiс и Петыр-Павел вичкоса вежа ай Александр. Чукöртчылiсны кывкутысь йöз: районса администрацияöн веськöдлысьöс вежысь Н.А.Левченко, омöля аддзысьяслöн Луи Брайль нима республикаса библиотекаöн веськöдлысь Г.М.Безносикова, «Лов кыпöдöм» духовно-просветительнöй шöринöн веськöдлысь М.В.Сурсякова, омöля аддзысьяслöн регионса общественнöй котырöн веськöдлысь А.М.Верховод, Сыктывкарса Свято-Вознесенскöй вичкоысь вежа ай Алексей Муравский да мукöд, а сiдзжö лыддьысьысьяс. Быдöн висьталiс шоныд кывъяс, тöдчöдiс православнöй литературалöн шöринлысь коланлунсö. Сiйö отсалас сöвмöдны еннога олöм да культура. Книгаяс воласны районса став библиотекаö, медым православнöй литератураöн вермис тöдмасьны быдöн. Вöлi Ен-Мамлы сиöм гаж, петкöдчисны Петыр-Павел вичкоысь сьылысьяс, Сыктывкарса «Зорюшка» да Кулöмдiнса «Июль» котыръяс, И.Куратов нима педколледжысь велöдчысьяс да юркарысь «Менам кыпыдлун» театр.
Гижöд да снимок
Галина НЕСТЕРОВАЛÖН.