Армия — повтöмлунö, кывзысьöмö да бурö велöдан школа, кодi отсалö том йöзлы зумыда сувтны кок йылö, петны асшöр олöмö, лоны айму пыдди пуктысьöн да сiйöс видзысь-дорйысьöн. Армияын служитöм йылысь висьталöны районса олысьяс.
С.А.Тюрнин — Кулöмдiнса олысь:
— Ме армияын служитi 1982-1984 воясын Приморскöй крайын танкъяса полкын, пыр водителялi. Ковмис ёна котравны, торйöн нин медводдза во джынйöн. Водз асывсянь да водтöдз эг тöдлöй шойччöм. Пуксьылiм сöмын политинформацияяс нуöдiгöн. Ог тöд кыдзи öнi, а сэки ёна ыджыдавлiсны «дедъяс», кодъяс дöзмöдлiсны сöмын на воöм зонъясöс. Часьтын вöлiны унапöлöс кывъя йöз, быдöн аслыспöлöс этша, ковмис дыркодь лöсьöдчыны. Вöлi сьöкыд, но айловлы вуджöдны вермана. Öнi, кöнкö, унатор вежсис бурланьö. Зонъялы колö служитны быть, водзвыв дасьтысьны сы кежлö, ёнмöдны ки-кок. Оз ков повны сьöкыдлунъясысь, öд найö ёнмöдöны, содтöны пытшкöс вын.
И.Н.Гилев — Кулöмдiнса айлов:
— Армияын служитöмöс пыр казьтыла сьöлöмсянь. Сэнi вöлi 1981-1983 воясын. Ичöтсянь ёртаси спорткöд, сы вöсна вöзйыси спортротаö. Веськалi Свердловскö. Тшöкыда петкöдчылi часьтъяс костын мунысь ордйысьöмъясын. Служба сетчис кокниа. Сэкся служитöм, дерт, öнiякöд он öткодяв. Кык пыдди лоис öти во. Сöмын тырмымöн-ö сiйö? Ме серти кö, медым быдтыны аймуöс бура дорйысьöс, сiйöс велöдны этша вылö колö 1,5 во.
Е.М.Зезегова — юрсиктса ань:
— Зонъяслöн армияын служитiгöн торйöн нин сьöкыд мамъяслы. Тайöс ме тöда ас серти, öд менам кык пи вöлiны армияын да служитiсны кык во. И тайö воясыс нюжавлiсны зэв дыр. Армияын служитöм — зэв пыдди пуктантор, и зонъяслы быть колö ветлыны сэтчö. Сöмын мед эз увтыртны найöс. Сиа мамъяслы, кодъяслöн служитö пиныс, кутчысьны зумыда, эскыны сöмын бурö. А зонъяслы оз ков вунöдны мамнысö, тшöкыдджыка гижны ли звöнитны, öд найö помтöг майшасьöны пи вöснаыс.
А.В.Чаланов — районса военкоматысь армияö нуысьяслöн юкöнöн веськöдлысьлöн старшöй отсасьысь:
— Талун армияын служитысьяслы воддза серти ёна кокниджык. Кык пöв чинтiсны служитан кад. Часьтö локтöдз вичмöдöны кöм-пась, звöнитчыны сетöны сим-картаяс, быд тöлысь вештöны 2 сюрс шайт, вердöны бура, пажун бöрын узьтöдöны. Кызвын кадсö велöдöны, мездiсны кутшöмсюрö могъясысь, кыдз пусянiнын уджалöмысь. Том йöзлы, кодъяс кöсйöны, позьö служитны и кык во ыджыдджык удждон вылö. Колö, мед быть вöлi кутшöмкö да специальносьт. Сиа зонъялы, кодъяс öнi армияынöсь, бура служитны, ас кадö звöнитны бать-мамныслы да гöтыръясныслы, а мунны лöсьöдчысьяслы — ёнмöдны ки-кок да пытшкöс вын-эбöс, медым тыр дасьöн лоны служба кежлö.
Галина НЕСТЕРОВА.