Матрёна Дмитриевна Шебырева чужис 1928-öд воын Керчомъяын. Нимсö батьыс сетiс аслас мамлысь. Быдмисны чоя-вока. Матрёна бура велöдчис школаын, помалiс сизим класс. Сы бöрын Сыктывкарын помалiс кооперативнöй техникум. 1948-öд воын мöдöдiсны тöвароведöн Пожöгса сельпоö. Ветлiс командировкаясö вöлöн Кулöмдiнсянь Пожöгöдз. 1950-öд воын петiс верöс сайö. Архип Ивановичыс Пожöгдiнысь. 1955-öд воын кык челядьöн вуджисны овны Кулöмдiнö. Матрёна Дмитриевна нэм чöжыс уджалiс вузасян юкöнын, ставсö 41 во. 
1957 воын гозъя рöдвуж отсöгöн лэптiсны керка. Олiсны скöтöн, вöдитiсны уна картупель, градвыв пуктас. Быдтiсны да велöдiсны нёль челядьöс. Зоя да Татьяна уна во велöдiсны школаын, Галина Сыктывкарын врач, Нина Анапаын медсестра. 
— Мамук век пöжасис, ставыс вöлi зэв чöскыд. Пыр вöдитiс градъяс. Эскö Енлы да тшöкыда ветлiс вичкоö, — висьталiс Татьяна нылыс, кодi и видзö öнi мамсö. 
Уна вося бур уджысь сетiсны «Уджвывса ветеран» медаль, «Сöветскöй потребкооперацияса отличник» ним, почёт грамотаяс. 
90 арöс тырöмöн чолöмавны волiсны районса администрацияöн веськöдлысьöс вежысь Н.А.Левченко, олöмаяслöн Кулöмдiнса котырöн веськöдлысь В.П.Нестеренко, «Кулöмдiн» овмöдчöминса администрацияöн веськöдлысь В.П.Игнатов, Кулöмдiн сельпоса юралысь З.Г.Сухолуцкая, сельпоса олöмаяслöн котырöн веськöдлысь Н.В.Тесленко. Сиисны ён дзоньвидзалун да кузь нэм, сетiсны президент В.В.Путинсянь козин. 
Галина КЛЮЖЕВА. 
Снимок Наталья ТИМОШИНАЛÖН.