Март 25 лунсянь апрель 3 лунöдз районын вöлi Санкт-Петербургса телерадиокомпанияысь котыр. «Россия-Культура» телеканаллöн корöм серти сiйö 15 воысь дыр нин нуöдö «Письма из провинции» программа. Йöзöдöны сэнi медсясö документальнöй фильмъяс йöз йылысь, кодъяс отсöгöн Россияын кутчысьö да сöвмö культура. Локтан петкöдланторсö (позьö видзöдны «Культура» телеканал вылысь май 11 лунö) шуисны сины Коми республикалы, кызвынсö Кулöмдiн районлы. Кыдзи висьталiс режиссёрлы отсасьысь Ирина Баева, бöрйисны районнымöс сы вöсна, мый танi эм ставыс, мый позьö пыртны передачалöн сюрöсö.
Снимайтчысьяслöн котырын нёльöн: Ирина Баева кындзи, режиссёр Андрей Шляхов, оператор Тимофей Никаноров да видеоинженер Сергей Абрамов. Кöкъямыс лунöн найö волiсны районлöн медся тöдчанаинъясö, аддзысьлiсны пыдди пуктана йöзкöд. Волiсны Ичöт Аныбса «Ошлöн вöр» шойччанiнö, тöдмасисны Вологжанинъяскöд, кодъяс бура тöдсаöсь районын и республикаын крестьянин овмöс да шойччанiн кутысьясöн. Аддзысьлiсны Югыдъягысь Ен Мамлöн Успенньö вичкоса вежа ай Василийкöд, кодöс зэв пыдди пуктöны посёлоксаяс и орчча сиктъясын олысьяс. Сыкöд артмис зэв шоныд сёрни. Тöдмасисны сiдзжö Помöсдiнса «Патриот» шöринöн веськöдлысь А.А.Глуханичкöд, Пузласа «Комилесбизнес» котырöн веськöдлысь А.С.Игнатовкöд. Бöръяыс висьталiс сиктлöн да котырлöн олöм-уджалöм йылысь, нулiс му улысь öдöбöн петысь ва дорö. Тимшерысь лыйсьыны велöдысь А.А.Паршуков вайöдлiс тирö, висьталiс, кыдзи велöдöны челядьöс лыйсьыны, кутшöм вермöмъяс шедöдiсны, тöдмöдiс Екатерина Паршуковакöд, кодi унаысь вермылiс Россиялöн тшупöда да весиг тöдчанаджык ордйысьöмъясын. Лыйсисны пасö и волысьяс. Волiсны А.Д.Кирст дорö, кодöс, кыдзи кулаклöн семьяысь быдтасöс, Украинаысь мöдöдлiсны Коми муö, Тимшерö. Ветлiсны посёлоксянь сизим километр ылнаын вайöм йöзöс гуаланiнö сувтöдöм крест дорö. Тöдмасисны В.С.Павловлöн Донса керка-музейöн.
Районса культура керкаöн веськöдлысьöс вежысь А.В.Голайдо, кодi пыр ветлöдлiс снимайтчысь котырсаяскöд, висьталiс, мый найö уджалiгмозныс шойччисны, нимкодясисны вöр-валöн мичлунöн. Волысьясöс шензьöдiс помтöм вöр, еджыдсьыс-еджыд лым, лöньлун и, дерт жö, коми йöз. Найö волiсны нин уна регионö, кöнi олöны финн-йöгра войтыр, эз медводдзаысь локны и Коми республикаö. Тöдчöдiсны, мый буретш танi, миян районын, верстьö, томъяс и челядь яндысьтöг сёрнитöны комиöн, оз öтдортны чужан кыв.
Андрей Шляхов висьталiс, мый миян район зэв озыр бур йöзöн да мича тöдчанаинъясöн, чукöртiсны унатор да вöчасны кык передача.
Галина НЕСТЕРОВА.