Паспомын том фельдшер

[ A+ ] /[ A- ]

Июльсянь Паспомса фельдшерско-акушерскöй пунктын уджалö том фельдшер Ксения Сергеевна Булышева. Локтiс Сыктывкарса медицинскöй колледж помалöм бöрын. Вöзйöны вöлi Кужбаö, но бöрйис тайö посёлоксö: матын пö гортöдзыс, Керчомъяöдз, и юрсиктöдз. Да и танi бурдöдчанiнлöн стрöйбаыс выль на, кыпöдлiсны во куим-нёль сайын.
— Медводдза лунö локтi да вöлi шемöсын: эг тöд, мыйсянь босьтчыны, — висьталiс фельдшер. — Но вочасöн пырöдчи уджö, тöдмаси татчöс олысьяскöд. Шань йöз ставныс.
Уджыс кывкутана: ичöтик посёлокын сiйö и врач, и медсестра пыдди. Тöждысьö челядь, верстьöяс и нöбасьысь аньяс вöсна. Найöс примитöм могысь бурдöдчанiнын эмöсь торъя жыръяс. Танi шоныд и кыпыд, эм став оборудование. Том ань велалiс нин и вевъялö быдлаö: висьысьясöс видлавны, вермытöмъяс да чужсьöм кагаяс дорö ветлыны гортöдзыс. Овлö, кодöскö кö топöдас висьöм, корлöны войнас. Сьöкыд вылö оз элясь. Буретш татшöм уджыс пö и сьöлöм серти. Ксения Сергеевна мöвпалiс сы йылысь ичöтсяньыс. Кöсйöмыс збыльмис.

Комментарии:

Добавить комментарий

Свежий выпуск: за 13 февраля