Водзтi Улыс Вочын быд овмöсын видзлiсны öти ли кык вöв, мед вайны пес, турун, пуктысьны. Но во вит сайын найö висьмисны да видзöмсьыс эновтчисны, вочасöн лöсьöдiсны лым вывтi ветлан техника. Талун кежлö татшöмыс öкмыс, морт лыд серти районын медся уна

Читать далее →

Ыджыд тушаа, военнöйлöн паськöма, пемыдгöрд берета, бура служитöмысь медальяса да морöсвывса пасъяса. Татшöм öнi юрсиктын быдмöм-велöдчöм, Россия Федерацияса национальнöй гвардиялöн войскаын служитысь Константин Ракин, кодi Андрей Борисович да Ирина Борисовна бать-мамыслöн квайт челядьысь öти пи.
— Ог куж висьтавны мыйла, но быдмиганыс шойччан лунъясö ставöн радейтiм видзöдны телевизор пыр салдатъяслöн служитöм-олöм йылысь петкöдланторъяс. Медся ёна сьöлöм вылö волiс Победалы сиöм парадъяс кежлö дасьтысьöм. Ме шулывлi: бур эськö вöлi, армияын кö Константин веськалас сэтчö, а чойясыс «аддзисны» нин восьлалысьяс пöвстысь воксö. «Тайö пельк салдатыс миян Костяным», — шулiс öти. «Абу сiйö, а автоматаыс», — вензис мöд. Эг чайтöй, мый миян кöсйöмным збыльмас, — пи вылас видзöдöмöн эз дзеб шудлунсö Ирина Борисовна.
Константинöс армияö босьтiсны 2011 воын. Веськалiс Москваö Ф.Э.Дзержинский нима торъя могъяса дивизиялöн мöдöд полкö, кодлöн медшöр могыс — видзны лöнь олöм да восьлавны Победалы сиöм парадын. Ёна отсалiс школасянь спорткöд ёртасьöм. Татöг эськö мусянь 30-35 сантиметр вылö öти кок лэптöмöн мöд вылас сулавны 15 минут да тадзи жö вöчны кокъяс вежöмöн водзö луннас 8 час тöлысь чöж эз вермы.
— Парад кежлö дасьтысим Москва дорса Алабиноын, кытчö чукöртöны техникаöн став войскаöс. Медводзын восьлалöны курсантъяс, на бöрся мунöны танк, инженер, сапёр, сынöд десант войскаяслöн, МЧС-лöн котыръяс, а сэсся ми. Быд котырын 200 морт. Служитан медводдза воын май 9 лунö ме вöлi медводдза радас коймöд мортöн, мунiгöн видзöдi веськыда водзö. Парадын быд петкöдчысьöс пасйисны медальöн, — висьталiс Константин.
Кöть вöлi сьöкыд, но зонлы ставыс сетчис кокниа. Сылы унаысь висьтавны да петкöдлыны эз ков, ачыс велöдiс зонъясöс, кодъяс локтiсны служитны тулысын. Служитiгчöж командиръяс ышöдiсны кольччыны контракт серти да Константин эз бöрыньт. Тöдiс, мый чужанiнын сьöкыд аддзыны удж, кöть эськö специальносьт вöлi, велöдчылiс форвардер да харвестер вылын уджалысь машинистö. Сетiсны öтувъя оланiнысь жыр, вердöны-пасьтöдöны, воö бур удждон. Куим во служитöм бöрын нöшта кольччис куим во кежлö. Вöлi Россиялöн матö быд пельöсын. 2013 воын ветлiс Владивостокö, кытчö чукöртчылiсны кöкъямыс странаысь президентъяс. 2014 воын вöлi Казаньын, кöнi мунiс студентъяслöн универсиада. Сiйö жö воын вуджис дивизиялöн торъя могъяса «Витязь» шöринö. Во джын велöдчöм бöрын нёль тöлысь кежлö ыстiсны Грознöйö. Вöлi и мукöдлаын. Дерт жö, быд во май 9 лунö восьлалiс парадын.
— 2014 воын, кор пуктiсны тöдтöм салдатлöн гу дорö дзоридзьяс, лои орччöн Россияса президент В.В.Путинкöд, премьер-министр Д.А.Медведевкöд да Россияса правительствоысь министръяскöд. Парад дырйи ми найöс аддзывлам быд во, — водзö сёрнитiс зон.
Кольöм вося апрельын Россияса президент В.В. Путинлöн индöд серти налöн дивизия лоис Россия Федерацияса национальнöй гвардиялöн войскаöн. Апрельын жö прапорщик Константин Ракин шедöдiс пемыдгöрд берет, кодöс вичмöдöны бура служитöмысь да вермöмъяс шедöдöмысь. Колiс став паськöмöн, бронежилетöн, каскаöн, автоматöн да салдатлы мукöд коланторйöн мытшöдъяс вомöн котöртны 15 километр, вит секундöн куимысь веськавны пасö, 10 минутöн вермасьны пемыдгöрд берета куим салдаткöд да вермыны. Быдлунъя велöдчöм да служитöм зонлы сьöлöм серти. Во джын дасьтысьöны, сы дыра жö командировкаын. Командировкаясын да служитiгöн оз позь вöдитчыны телефонöн. Ольга гöтырыскöд, кодкöд тöдмасис карö петалiгöн да гижсисны 2014 воын, йитöд кутö письмöасьöмöн. Ольга сэсся звöнитлö инькаыслы да айкаыслы, висьталö верöс йывсьыс.
— Балашихаö кöлысь вылö ветлiм ыджыд рöдвужöн. Ме верöскöд, Валентина Андреевна Морохина ыджыд мамыс, Владимир карысь сылöн Надежда чойыс, юрсиктысь верöслöн Ирина да Тамара чойясыс, Константинлöн Евгений Зайков ёртыс. Сьöлöм вылын долыд, мый пинымлöн ставыс артмö. Гöтырыскöд быдтысьö нин. Миланалы сентябрын тырас куим арöс. Налöн ставыс бур, да и миян ставыс бур, — пасйис Ирина Борисовна.
Том гозъя Балашихаын кöртымалöны оланiн. Кык во мысти лоас позянлун ипотека серти ньöбны ас оланiн. Сьöкыд веськавны садйö да Милана ветлö асшöрлуна садйö. Таво сентябрын босьтасны нин садйö, кöнi видзöны военнöйяслысь челядьсö. Гöтырыс веськöдлö ресторанöн. Бура тöдö да гöгöрвоö военнöйяслысь удж, öд батьыс вöлi военнöйöн, служитлiс флотын Мурманскын.
Коми зонмöс бура служитöмысь донъялiсны медводдза да мöдöд тшупöда «За отличие в службе» пасъясöн, парадъяс вылын восьлалöмысь, карта серти керка пытшкысь мина корсьöмысь да аддзöмысь, пытшкöсса войскаяслы 200 во тырöмкöд йитöдын медальясöн. Пытшкöсса делöяслöн войскаясса медыджыд веськöдлысь В.В.Зотов бура служитöмсö донъялiс часiöн.
Армияö мунöмсяньыс Константин медводдзаысь чужанiнö волiс 2013 воын да мöдысь таво февраль помын. Гöтырыс уджалö да волiс öтнас. Мария, Анастасия да Ксения петiсны нин верöс сайö да быдтысьöны. Виктория велöдчö юркарса колледжын, а Надежда Кулöмдiнса шöр школаын сизимöд классын. Бать-мамкöд, чойяслöн семьяяскöд ветлiс Керчомъяö ыджыд мамыс дорö, волiс школаö, аддзысьлiс медводдза велöдысь Татьяна Витальевна Макаровакöд, велöдчысьяслы висьталiс армияын служитöм йылысь да корис кутчысьны дзоньвидза олöмö, ёртасьны спорткöд, дасьтысьны служитiгкежлö. Дзолядырсянь радейтiс батьыскöд кыйны чери да волiгöн, дерт жö, лэччылiс ю дорö. Пыравлiс и «Олимпик» ёнмöдчанiнö, аддзысьлiс ёртъясыскöд.
— Менам медся ёна бырис гажöй сöстöм чужан кывйысь, кок улын дзуртысь лымйысь, войвылын тöвся аслыспöлöс кöра сынöдысь, чери кыйöмысь, матыссаясысь да ёртъясысь. Казялi, мый вежсис юрсиктлöн шöрыс. Колö выльмöдны и катыдпом. Водзö вылö отпускалiгöн вола семьяöн, тöдмöда коми йöзлöн оласногöн, петкöдла мичаинъяс, — шуис Константин.
Марина ДАДАШОВА.
Лариса Притоцкаялöн снимок вылын: Константин Ракин матыссаяслöн кытшын.
Читать далее →

Велöдчöм бöрын уджалiс бухгалтерöн вöр лэдзан котырын, кодi тупкысис. Гортсяньыс велöдчис культура колледжын да босьтчис уджавны клубын гаж котыртысьöн. Танi 16 во нин. Йöз вежавидзысьöсь, пыдди пуктöны, уджавны сьöлöм серти. Гажöдöны «Югыд кодзув» сьылан да йöктысь челядьлöн «Веснушки» котыръяс. Пуктылöны

Читать далее →

 Ачыс Ярославльысь. Помалiс сэтчöс мединститут, лоис врач-педиатрöн. Уджавны мöдöдiсны миян районö, Помöсдiнса бурдöдчанiнö. Во уджалöм бöрын вуджöдiсны Кулöмдiнö бурдöдны челядьöс. 2001 восянь, Пензаын содтöд велöдчöм бöрын, уджалö челядьöс бурдöдысь фтизиатрöн. Тöждысьö, медым на пöвстын эз паськав туберкулёз. Кольöм вося ноябрын

Читать далее →

Помöсдiнса ломтысянiнысь мастер Валерий Алексеевич Логинов котыртö уджсö 12 ломтысьысьлысь, кык слесарлысь да öти сварщиклысь. Ас вынъясöн бура дасьтысьöмöн пыр тöвйöны бура. Талун ломтысянiнсянь шоныд мунö школалöн, садлöн, бурдöдчанiнлöн, культуралöн керкаясö да ас оланiнъясö — ставнас 42-лаö.
— Воддза

Читать далее →