Июнь 16-öд лунö Вöльдiнын кыпыда пасйисны том йöзлöн «Ритм» котырлы вит во тырöм. Та дыра нин томъяс котыртöны быдпöлöс гаж да шойччöм, петкöдчöны районын да республикаын. 
Читать далее →

Июнь 28 лунö Кулöмдiнса школаын дасöд класс помалысь 25 ныв-зонлы сетiсны ЭВМ-са операторö велöдчöм йылысь свидетельство. 
Казьтыштам, мый кольöм воын район кырымалiс бумага да целлюлоза вöчан Сыктывкарса техникумкöд сёрнитчöм да Кулöмдiнса шöр школаын гырысь класса велöдчысьяслöн лоис позянлун некытчö ветлытöг босьтны специальносьт. Тöдöмлунъяс сетiсны Кулöмдiнса школаысь велöдысьяс О.О.Коноплёв да А.А.Рассыхаев. Челядь петкöдлiсны бур тöдöмлунъяс да велöдчисны окотапырысь. Колö велöдны и водзö. 
Районса администрацияöн веськöдлысь С.В.Рубан сьöлöмсянь аттьöалiс техникумса уджалысьясöс, мый мунiсны воча да велöдiсны челядьöс. 
Сэсся челядьлы сеталiсны свидетельствояс. 
Сёрнитiсны и ныв-зон. 
Гликерия Кочанова, Паспом: 
— Кор вöзйисны велöдчыны, ме пыр и гижöдчи. Бур, мый велöдчи. Тöдмалi уна выльтор, велöдiсны пыдiсянь. 
Андрей Тимушев, Дон: 
— Тайö свидетельство серти мукöдлаас весиг босьтöны уджавны. Зэв бур сiйö, мый велöдiсны сьöм босьттöг. Позис велöдчыны быд кöсйысьлы. Миян пиысь помалiсны ставöн. 
Наталья Кочанова, Кулöмдiн: 
— Татшöм велöдчöмыс зэв колана. Ме эськö компьютер вылад кужа бура, но менö велöдiсны сыö, мый эг тöд. Тайö тöдöмлунъясыс зэв колöны, сы вöсна мый öнi ставыс компьютер вылын, ЭВМ операторъяс колöны уналаö. Сьöлöм вылö воис сiйö, мый кык-куим урок бöрын велöдiсны нин уджавны компьютер вылын. Öнi меным лоис ёна кокниджык. 
Читать далее →

Водзтi сиктын матö быд овмöсын видзлiсны мöс. Бöръя кызь воöн налöн лыдыс ёна чинiс, öнi этшалöн нин картаад эм баксысьыд. Зато лöсьöдiсны понъясöс, весиг найö, кодъяслöн нэмсö эз вöв. Тадзи и Донын. 

Мöснад öд нокыд уна: вердны, сёöдны, луд вылын видзны-йирсьöдны, турун пуктыны, куйöд петкöдны. А понтö лэдзан да ачыс, тон, кыськö сёйнысö корсяс, сiт весавны оз жö ков — бокö ветлас. Кымынысь öлöдлi орччöн олысьясöс, мед, лöсьöдiсны кö, эз лэдзны поннысö йöр сайö, видзисны дом йылын. А найö шуöны: миян пö оз курччась. Понйыд тай пон на и эм, некор он тöд, котöртас тэ боктi али вувзьысяс лёкысь. Сэсся и градъяс лойöны-кодйöны. Неважöн ньöби джерсийскöй пöрöдаа ялавич мöскöс. Вайим Москваысь. Лэдзи потшöм йöрö йирсьыны. Кад кольыштöм бöрын, видзöда да, орчча олысьлöн кык пон котрöдлöны коньöрöйöс йöр пасьта, быттьö налöн сэнi кутшöмкö велöдчанiн. Дорйи сюрукöс. Орччöн олысьöс öлöдi: мыйкö кö лоас мöскöд, донсö перъя сылысь, öд сыысь вештi вель ыджыд сьöм. 
Читать далее →

Июнь 22-öд лунö чукöртчылiс «Коми войтыр» öтмунöмлöн районса представительство. Сёрнитанторйöн лоис «Вöльдiн», «Дiасёръя», «Пожöг», «Помöсдiн» овмöдчöминъясса олысьяслöн представительство дорö шыöдчöм, кöнi корöны отсöг. «Монди СЛПК» котырса вöр заптан службалöн Асыввыв юкöнысь Вылыс Эжваса участокын уджалысьясöс майшöдлö, мый Помöсдiнысь Кебанъёльö кöсйöны вуджöдны юкöнлысь администрация да техника дзоньталанiнъяс, мый лёк боксянь тöдчас овмöдчöминъясын олысьяслы: «Мондиын» уджалысьяс пиысь уналы ковмас эновтчыны сыысь, сы вöсна мый оз быдöн вермы ли оз окотит вуджны сэтчö. Помöсдiнсянь Кебанъёльöдз матö 75 километра, быд лун öтарö-мöдарö туй вылö кутас вошны матö 3-4 час. Уналöн челядьныс ветлöны садйö, и бать-мам оз удитны найöс нуны ни босьтны. Ветлыны ковмас либö ас машинаöн, либö рейса автобусöн (а сiйö бöрсö юрсиктысь вöрзьöдчö час лунын). «Монди» йöзöс нуны-вайны транспорт оз сет. Администрация да гараж вуджöдöм бöрын, вермас лоны, «Монди» вочасöн дугöдчас уджавны Помöсдiн вожын. Том йöз дугдасны кольччыны сиктö. Шыöдчысьяслöн кывъяс серти, «Монди» кöсйö чинтыны воштöмъяс, та вöсна и вöчö тадзи. Комбинат — ыджыд социальнöй кывкутана котыр, но артмö, мый некодкöд лыддьысьны оз кöсйы, уджалысьяслысь эз юась. Шыöдчöмсö мöдöдiсны республикаса юралысь С.Гапликовлы, Госсöветöн юрнуöдысь Н.Дорофеевалы, вöр юкöнса профсоюзлöн котырлы, районса администрацияöн веськöдлысь С.Рубанлы, «Коми войтыр» öтмунöмлöн районса представительстволы, «Монди СЛПК» котырса генеральнöй директор К.Пеллерлы. 
Кыв шутöг, майшöгыс ыджыд, öд талун Вылыс Эжваса юкöнын уджалö матö 160 морт, кызвыныс — индöм овмöдчöминъясса олысьяс. Тайö лыдпассö колö содтыны некымын пöв, öд быд уджалысьлöн — семья, челядь, бать-мам. 
Читать далее →