Овмöдчöминса юралысьлöн «нопйыс» сьöкыд, тöждыс-нокыс юрвывтыр: лоö кывкутны быдтор вöсна, шöйтысь понъяссянь босьтöмöн гажъяс котыртöмöдз. Аттьöалан кывъяс висьталöны гежöдика, тшöкыдджыка «чуткöны». Айловъяс, гашкö, тайöс сьöлöм бердас босьтöны озджык матö, а аньяслы мöрччö ёнакодь. Быдöнлöн семьяяс, матыссаяс, кодъяслы сiдзжö колö сылöн тöжд. Миян районын сизим овмöдчöминын юралысьяс — аньяс. Кыдзи найö вевъялöны вöчны ставсö, мыйöн кокньöдöны ловсö, талунъя гижöдын.

Полье грездö томиник нылöн важöн нин локтiс уджавны медсестраöн Татьяна Борисовна Дёмина. Дзоляник тушаа, сюсь вежöра, мусаник ныв. Петiс верöс сайö, чужтiс да быдтiс куим ныв-пиöс. Кад колис öдйö, бöрö лэбзис 29 во. Öнi Татьяна Борисовна уджалö фельдшер пыдди. Кадыс сiйöс быттьö оз и босьт. Век на тэрыб, öтырышъя кытчöкö котöртö. Висьысьяскöд мелi, нёрпалысьяс дорö локтö лун кöть вой, некор оз бöрыньт, грездса олысьяс вöсна тöждысьысь.

Пытшкöсса делöяс кузя министерстволöн районса юкöнысь полицияса подполковник Елена Витальевна Овчинниковаöс бура тöдöны районын. Öнi сiйö дежуритан юкöнса начальник.

Том ныв шудсö аддзис уджалiгас. Татьяна Семёновна Напалкова шöр бурдöдчанiнлöн «тэрыб отсöг сетан» юкöнын старшöй фельдшер, а Артём Александрович верöсыс пытш-кöсса делöяс кузя районса юкöнын старшöй участкöвöй уполномоченнöй. Уджалöны лун и вой, найöс кыпöдöны и шойччан лунъясö.