2018-öд воын велöдысьяслöн районса конкурсын вермис Кулöмдiнса шöр школаысь Ольга Михайловна Сковородникова (снимок вылын). Сiйö и петкöдчис тавося апрельын Сыктывкарын республикаса «Медбур велöдысь» ордйысьöмын. Конкурс мунiс 28-ысь нин, и сöмын таво медводдзаысь вермис миян районса школаысь велöдысь. Ас кадö лауреат нимъяс босьтлiсны химия велöдысь О.В.Ямщикова да ичöт классъяс велöдысь К.В.Катышева. Ольга Михайловна велöдö 2-11-öд классъяслы йöз кыв 13 во. Муслунсö тайö кыв дорас чужтiс Кебанъёльса школаын велöдчигöн на велöдысь В.Н.Момина. Коми пединститут помалöм бöрын бергöдчис чужанiнас. Та мында воöн чукöрмисны районса да республикаса тшупöда грамотаяс, но татшöм ыджыд вермöмыс медводдзаысь. Сетiсны медаль. 

Матысмöны тöдчана гажъяс: Победалы 74 во тырöм, районлöн да Кулöмдiнлöн чужан лунъяс. Татшöминъясö торйöдлöны пельöс, кöнi тшöтш петкöдлöны чукöртöм уна пасйöдъясöн, казьтылöмъясöн, снимокъясöн Кулöмдiнлы сиöм альбомъяс. Позьö шуны: тайö альбомъясас — юрсиктлöн сöвмöмыс, йöзлöн олöмыс. Збыль тадз и эм. Листыштлам. Со Ыджыд Войналы сиöм некымын альбом, кöнi висьталöма Кулöмдiнысь тыш вылö ветлысьяс да тылын олöм кутысьяс йылысь. Сьöлöм вöрзьöдö сiйö, мый унджыкыс нин мунiсны миян дорысь, а гижöдъясын найö быттьö ловъяöсь. Водзö гижöй на йылысь. 

«Зимстан» овмöдчöминса квайт сикт-посёлокысь лым весалöм вöсна кывкутö ас вылö уджалысь Иван Александрович Прокушев, код дорын уджала ме да весала буретш лымсö «Беларусь» тракторöн. Зiля вöчны ставсö морт ногсöн, мед сöмын бур вöлi йöзлы. Кык во сайын март шöрын Зимстанса Сöветскöй улича вылын ЗИЛ-131 машина моз некод эз сибдыв. Фроловскын туйсö весалi грезд помöдзыс, кöть водзтi весавлiсны сöмын шöрöдзыс, ыстысисны сы вылö, мый нöбалö да водзö мунны оз вермыны. Весалi и «Победалы 55 во» нима улича, кодöс водзтi эз идравлыны ньöти.