Вöр нуысьяс «шойччöны»

Март 28 лунсянь районын уджалöны машинаяслöн сьöкта бöрся туй агентствоысь видзöдысьяс.
Коланаысь унджык вöр босьтысь машинаяс сьöрсьöн-бöрсьöн сувтöны на дорö вотöдз, мед эз ковмы вештыны ыджыд штрап. Туй вылын артмö некымын километра кузя визь, мый падмöдö мукöдъяслысь ветлöм. Торйöн уна машина чукöрмылiс Кебанъёль дорын.

Ыстiсны «шойччыны»

Во пансьöмсянь ГИБДД-лöн районса юкöнысь инспекторъяс ыстiсны «шойччыны» мыжмöм водительяслысь мырддьöм машинаяс сулöданiнö 14 машина.
11-сö босьтiсны нин, а куимыс пыр на сэнi. Кольöм воын сэтчö веськавлiс код юра да правотöг журъялысь водительяслöн 121 машина.

Колльöдiсны тöв

Март 26 лунö Улыс Вочын колльöдiсны тöв.
Вöлi мичмöдöм пу дадьясöн да лым вывтi ветлан техникаöн ордйысьöм. Лыйсисны гын сапöгъясöн, ворсiсны челядь и верстьö. Быд гажöдчысьöс юктöдiсны самöварысь чайöн, чöсмöдлiсны пöжасъясöн.

Воссис часовня

Кольöм субöтаö Донын восьтiсны вежа Николай Чудотворец нимöн часовня.
Волiсны Кулöмдiнса Петыр-Павел вичкоын да Ульянаса манастырын служитысьяс, карса вежа йöз. Часовнясö вежöдiс да нуöдiс служба епископ Питирим. Сiйö пöся аттьöалiс вежа керка кыпöдöмö ыджыд пай пуктысьясöс да отсасьысьясöс, С.С.Коноваловлы, Д.М.Конаковлы

Читать далее

М.В.Курочкин нимöдан пасöн.

Михаил Васильевич Курочкин — бура тöдса морт абу сöмын миян районын, но и республикаын. Кырнышаын чужлöм айлов Ылi Асыввылын армияын служитöм бöрын помалiс Сыктывкарса видз-му овмöс техникум, лоис механикöн. Сыöн и уджалiс Помöсдiнса совхозын. Сэсся вöлi öтувъя овмöслöн Шöр юкöнöн веськöдлысьöн, совхозса медшöр инженерöн. 1988 восянь 2005 воöдз сиктсöветлöн исполкомса да овмöдчöминса юралысь. Öнi пырö сиктлöн сöветö, кодi отсалö кутны шань олöм. Öти кывйöн кö, пыр йöз пöвстын да на вöсна тöждлуна.
Пыр йöз пöвстын и найöс гажöдöмöн. Михаил Васильевич и öнi ворсö сиктса народнöй театрлöн петкöдчöмъясын, медся дыр ворсысьяс лыдын.
Сiйö ыджыд тöждлуна и вöр-ва вöсна. Öкмыс во веськöдлiс вöралысьяслöн да чери кыйысьяслöн татчöс котырöн, кодi шöр могöн лыддьö оз кыдз позьö унджык кыйöм, а вежавидзöмöн кыйсьöм, аскиа лун кежлö пармасö ловъяöн кольöм. М.В.Курочкин öнi тайö котырас ревкомиссияöн веськöдлысь.
Нелямын куим во нин гöтыра. Нина Васильевнаыскöд кок йылö сувтöдiсны да олöмö петкöдiсны Иринаöс, Татьянаöс да Андрейöс. Гозъялöн вит внук да внучка.
Нöшта пасъям, мый Михаил Васильевич кыдзи пырлiс компартияö, пыр на сэнi. Лыддьö, мый колö овны мортлун тöдöмöн, кодi Сöветъяслöн власьт дырйи вöлi.
Михаил Васильевич — Коми республикаса пыдди пуктана уджалысь. Регыд на, март 18 лунö, районöс сöвмöмö ыджыд пай пуктöмысь уна йöз дырйи сылы вичмöдiсны Кулöмдiн районса пыдди пуктана мортлысь ним сетöм йылысь гижöд да пельпом вомöн пасйöд.
Снимок вылын: М.В.Курочкин нимöдан пасöн.
Снимок Кирилл ПОПОВЛÖН.
Читать далее

Свежий выпуск: 28 марта

Осторожно — мошенники!