Озыр внук-внучкаясöн 

[ A+ ] /[ A- ]

Сентябр 2-öд лунö Ручысь зэв мича да пыдди пуктана ань Анна Михайловна Холоповалы тырис 70 арöс. Став ассьыс вынсö, вежöрсö, сямсö сiйö сетiс «Ручевскöй» совхозлы. 
Анна Михайловна 1968-öд воын помалiс видз-му овмöс техникум. Лоис агрономöн. Локтiс уджавны Ручö, чужан сиктас. Во мысти пуктiсны градвыв пуктасъяс быдтысь котырлöн бригадирöн. Ковмис велöдчыны вöдитны да вежлавны уна вося турун быдтан видзьяс. Том нывлысь зiльöмсö казялiсны да индiсны веськöдлыны скöт видзан бригадаöн. 
Аннушкалы мусмис ас сиктса зон. Николайлöн армияö мунтöдз колльöдчывлiсны, а сэсся ныв кык во виччысис сiйöс. 1971-öд воын гозйöдчисны. Но эз дыр вöв шудныс: 1983-öд воын Николай кувсис. Анна колис öтнас вит челядьöн. Уджысь эз лэдзчысь. Скöт дорö мунлiс водз, локлiс сёрöн. Зэв ёна отсасис Валентина нылыс, кодi видзöдiс ичöт чой-вок бöрся (öнi олö Ручын, пыр котöртö мам дорас). Шогыд пö öтнас оз ветлы. Мамлы лоис дзебны и Алексей писö. Сiйö кувсис висьöм бöрын. 
А олöм мунiс водзö. Анна Михайловнаöс бöр пуктiсны веськöдлыны градвыв пуктасъяс быдтан бригадаöн. Гожöмъяснас уджалiс челядькöд уджалан да шойччан лагерын, но сэк вöлi кокниджык нин. Бур уджысь Анна Михайловнаöс унаысь пасйылiсны почёт грамотаясöн, козинъясöн, медальясöн. Серавлö тай ачыс: и комсомолсянь, и партиясянь, и совхозсянь пö вичмылiсны. 
Нывбаба век олiс скöтöн, ас град йöрöн. Öнi на ставсö вöдитö, муясыс пö жальöсь. Анна Михайловна озыр внук-внучкаясöн: кöкъямысöс козьналiсны челядьыс. Валентина нылысь öтдор, ставныс олöны бокын, но мамöс оз вунöдны. 
Дыр пукалiм-варовитiм Анна Михайловнакöд чужан лунöн чолöмавны волiгöн. Унаысь петавлiс синваыс важ олöмсö, уджсö, верöссö, томдырсö казьтылiгöн, а сэсся котöрöн пырис ичöт внучкаыс (сöмын на воöмаöсь пи гозъяыс). Топöдлiс да окыштiс радейтана муса пöчöс, козьналiс дзоридзьяс, и Анна Михайловна томмис, синъясыс кутiсны югъявны. Мичаа нюмъялiгтыр пуксьöдiс ставнысö пызан сайö. Локталiсны гöсьтъяс, керка тырис серамöн, сёрниöн. Мед и водзö олö дона мортыс свет вылас! 
Екатерина УЛЬНЫРОВА. 
Руч. 
Снимок вылын: 
Анна Михайловна 
Александр пиыскöд.


Комментарии:

Добавить комментарий

Свежий выпуск: за 17 января