Анастасия Андреевна Игнатова Сыктывкарса медучилище помалöм бöрын Немдiнса бурдöдчанiнö локтiс 1989 воын да тöдлiс став вежсьöмсö да тöжд-могсö. Босьтчылiс фельдшерсянь, содтöд велöдчöм бöрын 2005 воын индiсны веськöдлыны бурдöдчанiннас. Кывкутö и Парчса да Лебежнöйса фельдшерско-акушерскöй пунктъяс вöсна. Сьöкыд сыысь, мый абу врачтерапевт. Волiсны эськö ку-имöн, но уджалiсны регыдик.
— Сиктад бурдöдысьыдлы сьöкыд, висьысь дорö колö петны лунын кöть войын, — висьталiс Анастасия Андреевна. — Выль во пасъян лунъясö йöз гажöдчисны, а ми шойччöг эг тöдлöй: то кодкö сьöкыда висьмис, то кодöскö нöйтiсны, то кодкö доймалiс — быдлаö колiс кыпавны. Овлö, мый луннас öти морт корлö некымынысь. Участокным ыджыд, колö могмöдны 900 сайö мортöс. Рöспута дырйи бурдöдам и Мысса олысьясöс, кодъяс пырöны Тимшерса бурдöдчанiн улö. Волöны весиг Югыдъягысь да сiйö жö Тимшерсьыс. Выль воöдз на волывлiсны вöчавны капельницаяс.
Анастасия Андреевна висьысьясöс вочаалö асывсянь. Сылы отсасьö медсестра Инна Егоровна Литвинова, Шöръягса том ань, кодi Ухтаса медучилище помалöм бöрын локтiс татчö. Луншöр бöрын ветлöдлöны висьысьяс дорö корöмъяс серти. Кадысь кадö кытшовтöны пöрысь да вермытöм йöзöс. Видзöдлас улын кутöны и лёк оласнога семьяясöс, öлöдöны найöс, медым ас кадö петкöдчылiсны бурдöдысьяслы. Син улынöсь пыкöса висьöмöн нёрпалысьяс. Ыджыд тöждаöсь челядьлöн дзоньвидзалун вöсна. Педиатр абу да найöс видлалö Анастасия Андреевна. Сылы отсасьö челядьöс бурдöдысь медсестра Лидия Николаевна Евсеева. А 174 велöдчысь вöсна кыв-кутö школаса фельдшер Мария Ильинична Комарова. Велöдчанiнын эм став коланторйыс, медым видзны-ёнмöдны челядьлысь дзоньвидзалун.
Торъя видзöдлас улын туберкулёзöн висьысьяс, татшöмыс талун öти морт. Фельдшер видзöдö, медым висьысь вонас кыкысь вöчис флюорография. Ышöдö öтчыд вонас вöчны сiйöс и мукöдлы, медым ас кадö налысь эрдöдны сьöкыд висьöмсö, но оз на быдöн вöч.
Ыджыд тöждаöсь и нöбасьысь аньяс вöсна, торйöн нин акушерка Капитолина Ивановна Шешукова, кодi уджалö танi 35 во. Но овлö-ны сэтшöм аньяс, кодъяс нюжöдчöны карö лэччöмöн да чужтöны каганысö татчöс бурдöдчанiнын либö весиг гортаныс.
Уна кад босьтö диспансеризация нуöдöм. Таво колö видлавны 170 сайö верстьö мортöс. Висьöмъяс öлöдöм йылысь тшöкыда сёрнитöны школаын велöдчысьяс да бать-мам водзын.
Бурдöдчанiнын унджыкыс ыджыд сяма дыр уджалысьяс: Анастасия Андреевна кындзи казьтыштлöм нин акушерка Капитолина Ивановна Шешукова, укол вöчаланiнса медсестра Галина Ивановна Попова, санитаркаяс пиысь Муза Николаевна Карманова да Надежда Ивановна Игнатова. Матö дас воöн уджалöны челядьöс бурдöдысь медсестра Лидия Николаевна Евсеева да пинь бурдöдысь врач Яна Викторовна Мамонтова. Матö сизим во водителялö Алексей Андреевич Игнатов. Машина кöть важ, 14 вося, бур дöзьöрöн пыр дась петны туйö. Кöть уджалöны регыд на, но бур боксянь петкöдчисны во сайын локтöм фельдшер-лаборант Ольга Юрьевна Тру-бачёва да куим во нин уджалысь фельдшер Станислав Евгеньевич Попов, кодi парчсаясöс кындзи могмöдö и лебежнöйсаясöс.
— Миян котырын ставныс зэв кывкутысьöсь, отсалöны öта-мöдыслы. Быдторйöн мунö воча районса шöр бурдöдчанiн: гожöмнас отсалiс дзоньтавны-мавтны бурдöдчанiнлысь жыръяс. Öнi гöгöр сöстöм да югыд. Сьöмöн олам сьöкыда, но удждон сетöны пыр ас кадö. Колö, мед локтiс врач-терапевт да пыр кежлö вужъясис миян сиктö, — кывкöртiс А.А.Игнатова.
Галина НЕСТЕРОВА.
Гижысьлöн снимокъяс вылын: И.Е.Литвинова;
Л.Н.Евсеева;
М.Н.Карманова.