Öтув 60 шуда во 

[ A+ ] /[ A- ]

Юаласны кö менсьым, мый медся дона олöмын, джöмдытöг висьтала — семья. Тайö пöль-пöч, бать-мам, чой-вок. Тайö шуда поз, кöнi ыджыдалö öта-мöдöс пыдди пуктöм, гöгöрвоöм, радейтöм, тöждысьöм, кывзöм да кылöм. Буретш татшöм шуда позйын быдмим воккöд, кöнi миянöс, лэбавны кужтöм сильöпиянöс моз, кыпöдiсны бордъяс вылö. И таын ыджыд пай пöль-пöч Александр Иванович да Эмилия Давидовна Поповъяслöн, кодъяс чужтiсны да ас олöмö петкöдiсны менсьым Сергей Александрович батьöс. Сентябр 14-öд лунö налöн öтлаасьöмсянь тырас 60 во. 
Менсьым пöльöс керчомъясаяс шуöны Тучи Öльöксанöн. Быдми да юалi, мыйла тадзи нимтöны да оз-ö скöрав та вылö? Ог пö, нинöм лёкыс пö таын абу. Батьыслöн Григорий вокыс радейтлiс йöктыны чечётка. Öтчыд сиктö бокиысь воысьяслы зэв ёна воис сьöлöм выланыс да нöшта корисны йöктыны, «стучи, стучи» шуалöмöн. Сöмын йöзыд кывсö дженьдöдiсны да «тучи» кывйыс и кöвъясис, сэксянь Поповъяслысь вуж кутiсны шуны Тучиясöн. 
Ме окотапырысь кывзылi, кор пöльöй казьтывлiс да мöвпъяснас бергöдчылiс том кадас. Служитлiс Германияын. Коми муысь петöм зон чуймöдлiс ставнысö аслас кужöмлунöн да сямöн. Спортзалын «вöв» вылö сувтöдлiс нöшта мöдöс да чеччавлiс вомöныс. Ёнлуннас да повтöмлуннас петкöдчис и мукöдторйын. Вöлi сержантöн, взводса командирлы отсасьысьöн. Чужанiнö бергöдчис 1956-öд воын. Велöдчис электромонтёрö да сиктын кывкутiс биöн могмöдöмысь. А сэсся сiйöс бöрйисны сиктса сöветöн веськöдлысьöн. 13 во олiс Керчомъялöн тöжд-могъясöн. 
Чужанiнас жö тöдмасис нывкöд, кодi вöрзьöдiс сьöлöмсö, да öтлаасисны. Тайö нылыс — менам Эмилия Давидовна пöч. Эз ма кодь вöв сылöн олöмыс. Давид Яковлевич Пропп да Мария Яковлевна Икс бать-мамыс вöлiны немечьясöн, овлiсны Поволжьеын. Найöс мыжтöг мыждiсны да ыстiсны Коми муö. Скöтöс новлöдлан вагонын вайисны Котласöдз, а сэсся кöдзыд пароход вылын Помöсдiнöдз. Ыстiсны вöрö, кöнi керкаяс кыпöдтöдз олiсны му чомъясын. 1936-öд воын Вежаюын и чужис менам пöч. Сöмын на овмöдчисны, йöзöс ыстiсны кодöс Озъягö, кодöскö Тимшерö. Пöчлысь батьсö ыстiсны Немдiнö. Но шогыд öтнас оз ветлы. Кулiс каганыс, пöчлöн ыджыдджык вокыс. Олöм мунiс водзö. Айлов пырис МТС-ö трактористöн. Зiль да кывкутысь мортöс мöдöдiсны уджавны Сыктывкар дорса кылöдчанiнö. Пансис война, а Давид Яковлевичöс пуксьöдiсны 10 во кежлö. Нинöм абусьыс, сöмын сы вöсна, мый вöлi немечöн. Став сьöкыдыс усис гöтырыслöн пельпомъяс вылö. Немеч кывйыс уна лёк на вайис налöн олöмын. 
1944-öд воын менам пöч пырис велöдчыны Немдiнса школаö. Но челядь сöмын эльтчисны, скöра шпыньялiсны: «немеч, немеч». Велöдысьыс пыравлiс на дорö быд асыв да школаö мунлiсны öтлаын. Дас во нывка велöдчис Ирма нимöн. Школа помалöм йылысь аттестат босьтiгöн чуймис: сэтчö вöлi пасйöмаöсь Эмилия Давидовна Пропп. Артмис сiдз, мый чужöм бöрас мамыс шуис сiйöс Ирмаöн, а батьыс, командировкаысь локтöм бöрын, сиктсöветын гижöдiс нывсö Эмилияöн. Чужöм йылысь свидетельство серти и пасйисны аттестатас. 
Дыр эз велав выль ним дорö. Сыктывкарса коо-перативнöй техникумын велöдчигöн нин вель дыр эз шыась Эмилия вылö. 
Кыдзи ме казьтыштлi, пöль-пöч тöдмасисны Керчомъяын. Буретш сэтчö велöдчöм бöрын ыстiсны бухгалтеравны пöчöс. Том зон пуктiс синсö мича ныв вылö, вöрзьöдiс сылысь сьöлöмсö олöмöн дойдалöм Эмилия. Мунiс корасьны Немдiнö. Пöчлöн бать-мамыс эз вöвны паныд, кöсйисны, мед налöн ныв вöлi шудаöн. Том йöз мöвпалiсны гижсьыны Немдiнын, но верстьö шуисны, мед гижсясны сэнi, кöнi олö верöсыс. Сэки öнiя моз эз ков виччысьны кад, локтiсны сиктсöветö, пуктiсны кырымпасъяс, и чужис выль семья. Чунькытшъяс öтлаасигöн эз вöвны. 
Кыпöдiсны ыджыд керка. И мойдын моз чужисны куим пи: Валерий, Иван да Сергей. Гозъя кыкнанныс водзмöстчисны олöмын. Пöчöй секретаралiс комсомолечьяслöн котырын. Ышöдiс томъясöс бурö: колхозлы отсалiсны пуктыны турун, муяс вылö петкöдны куйöд. Петкöдчисны томъяслöн гажъяс вылын. Дыр да бура уджалöмысь, водзмöстчöмысь кыкнаннысö пасйисны почёт грамотаясöн да аттьöалан гижöдъясöн. 
Пияныс быдмисны батьыс кодь жö зарни киаöсь, ставныс кыпöдiсны керка, кыйсьöны-вöра-лöны, кужöны гажöдны и гажöдчыны. 
60 воöн семья паськалiс да пöль-пöчлöн озырлуныс — квайт внук-внучка да вит правнук-правнучка. Сентябр 14-öд лунö ставöн чукöртчам Александр Иванович да Эмилия Давидовна пöль-пöчлöн керкаö, чолöмалам найöс да бурсиам шоныд кывъясöн, аттьöалам, мый сетiсны миянлы мывкыдлун, восьтiсны олöмö туй. Пöль да пöч пыр виччысьöны миянöс, нимкодясьöны. 
Анастасия ПОПОВА, 
внучка. 
Сыктывкар.


Комментарии:

Добавить комментарий

Свежий выпуск: за 17 января