Зэв уна лёк вайö войтырлы терроризм! Неважöн Москваса школаын велöдчысь локтіс урок вылö кык ружьеöн, охранниклы грöзитöмöн пырис классö, медым вины дöзмöдысьöс – география велöдысьöс. Классын велöдчысьяслöн висьталöм серти, лыйысьлöн некодкöд школаын зыксьöм абу вöвлöма, бура велöдчöма, уна кад сиöма велöдчöмлы, вермасьöма самбоöн.

Дерт, тайö лоöмторйыс оз коль видлавтöг: Колана министерствояс вöчасны колана кывкöртöдъяс йöзöс видзöм да дорйöм могысь. Быть лоö вöчöма öлöдан мераяс, но оз пыр найö вермыны дорйыны мортöс.

Мый вöчны, кылінныд кö ті лыйсьöм шыяс? Копыртчöй да заводитöй ньöжйöник мунны матысса сайöдінö. Эн-ö сувтöй став тушаöн. Дзебсьыны кö эз артмы, водöй му вылö да киясöн тупкöй юр. Му вылын куйлігöн дзебöй медшöр артерияяс, кусыньтöй гырддзаныдтö, топöдöй туша бердö да вевттьöй пельясныдтö. Тадзи ті видзанныд сьöлöм да тыяс, вир сöнъяс да сьылі артерияяс, пельяс. Куйлöй, кытчöдз оз дугдыны лыйсьöмъяс и лыйсян шыяс дыр оз кутны кывны (5 минут гöгöр), либö кытчöдз спецслужбаясын уджалысьяс оз висьтавны «сувтны» команда. Мöд ног ті верманныд веськавны лыйсьöм улö, либö чайтасны тіянöс террористöн.

Бураа сайöдчöй. Восьса инын кö куйланныд, но гöгöрвоанныд, мый абу лыйсян инын, ньöжйö кыссьöй матысса сайöдчан инöдз. Кыссьöй тэрмасьтöг, му бердö жмитчöмöн. Эн-ö матыстчöй стеклöысь вöчöмторъяс дінö. Тіянкöд кö челядь, дзебöй найöс кутшöмкö сайöд сайö либö вевттьöй ас тушаöн.

Тіянöс кö босьтісны заложникöн, кутöй тöд вылын: медводдза некымын минутсö террористъяс медся скöрöсь, лёкöсь. Тайö кадö колö лоны лöньöн, оз ков ышнясьны на водзын, кöсйыны босьтны налысь ружье. Öлöдöй пикö воöм йöзöс, эн гораа сёрнитöй да шенасьöй. Сюся видзöдöй, кытчö позьö дзебсьыны, кутасны кö лыйсьыны, сiдз жö тöдмалöй, кутшöм террорист медся cкöр да лöг.

Биысь видзчысян служба да войтырöс доръян республикаса управление