Июнь помсянь июль да август чöж Керчомъяса шöр туй вылын жургис-мургис туй вöчан быдсикас техника. Туйяс вöчан да дзоньталан Сыктывдiнса котыр вужвыйöн дзоньталiс, вольсалiс выль асфальт, и öнi быттьö лэбан самолётöн. Туй вомöн визувтöны уна шоръяс да кыпöдчылöмöн да увлань лэччöмöн шлывган-мунан бур туй кузя. 
Керчомъясаяс эз нин эскыны, мый коркö лоас выльмöдöм туй. Найöс уна во «вердiсны» кöсйöмöн, но йиыс эз вöрзьывлы. 
— Ме юрнуöда сиктöн 2013-öд восянь да вужвойтырöн бöрйöм йöзлöн чукöртчылiгöн райсöветса депутат А.М.Тарабукинкöд быд во «веськыд йитöд» дырйи шыöдчылiм туй овмöс министерствоысь да автомобиля туйяслöн управлениеысь кывкутысь йöз дорö асланым мытшöдöн да пыр кöсйысисны. Менам юравны босьтчытöдз шöр туй вöсна «тышкасисны» сизим во. Таво тулыснас бара эскöдiсны, мый Керчомъяса туй вылö урчитiсны сьöм. Районса администрацияöн веськöдлысь С.В.Рубан висьталiс, мый туйыс ветлыны оз шогмы да быть ковмас вöчны судлöн кывкöртöд серти. Мый туйсö вöчасны, юöртiс тшöтш суд приставъяслöн юкöн, кодi видзöдö, кыдзи пöртсьö олöмö судлöн тшöктöм. Тайöс жö висьталiс сенатор Д.А.Шатохин. Вöлисти кутi эскыны, мый вöчасны, — сёрнитiс Керчомъяса юралысь Н.А.Лодыгина. 
Июнь помын туй вöчысьяс локтiсны нин сиктö. Туйлöн квайт километра кузя юкöн вылысь кулисны важ асфальт, посньöдлiсны да вольсалiсны бöр. Сы вылö из, бетон, эмульсия, асфальтлысь кык слöй, кодöн могмöдiс Кулöмдiнса юкöнлöн асфальт вöчан завод. 10 метраöдз асфальт вольсалiсны и туй вывсянь кöкъямыс кежанiнö. Весалiсны-пожъялiсны туй вомöн мунысь 26 да кежанiнъяс улысь 22 труба. Кодйисны туй пöлöн да вöчисны ва мунан визьяс. Туй улысь петысь трубаяс гöгöр вöчисны бетонысь кытшъяс, пыкисны георешёткаöн. 
— Садъяс да челядьлы ворсанiн весьтын вöчим «куйлысь полицейскöйясöс». Туйлöн öтарладорас и мöдарладорас вöчим 14 автобус сувтла-нiн, сизимыс лоисны лэбулын, сизимыс эз. Вöчим ставсö, мый урчитöма. Сэсся Кулöмдiнса юкöн садъяс да челядьлы ворсанiнъяс дорын вöчас кöрт потшöс, туй пöлöн дорöсъяс, мöд котыр — туй да вуджанiнъяс вылын пасъяс. Талун, бöръя уджалан лунö, ми туй пöлöн кöдзам турун кöйдыс. Аттьö сиктса юралысь Н.А.Лодыгиналы, кодi могмöдiс оланiнöн, котыртiс вердöм, — висьталiс мастер Сергей Сергеевич Гаврилов. 
Бокиысь локтöм котыр техникаöн отсасис сиктсаяслы. Овмöдчöминса администрациялы вайис из сора лыа да лöсьöдiс Вад дорö лэччанiн, кывтыд шойна вылö туй, шыльöдiсны аснаукöн вöчöм лöп-ёг кисьталанiн, кодйисны лыжи сеталанiн дорын да вöчисны мукöд удж. 
Катыдын автобус кык виччысянiн öта-мöдсьыс зэв ылынöсь да бать-мам корисны вöчны шöрас нöшта öтиöс. Овмöдчöминса администрация да школа шыöдчисны автомобиля туйяслöн управлениеö, кöнi кöсйисны дасьтыны бала да вöчны локтан воын. ГИБДД-лöн районса юкöнкöд сёрнитчöмöн, выльöс вöчтöдз автобус сувтланiн öнi вöчласны асьныс. Лыа вайисны нин. Ваясны плитаяс да лöсьöдасны. 
— öнi, бара-й, шогмö выль туйыд. Светофоръяс, автобус виччысянiнъяс, «куйлысь полицейскöйяс» — быттьö карын кодь лоис. Катыдпомсянь кывтыдпомöдз воöдчылiм час джынйöн. Гуран вылö гуран, асфальтыс кöнсюрö эз нин вöв. 1992-1993 воясын вöчлöм туй лоис дзик шогмытöм. Дöмлiсны эськö, йöз весиг асьныс тыртлiсны найöс, но весь-шöрö. Сьöлöмным бурмис, кор газетын, интернет да телевизор пыр юöртiсны, мый туй таво вöчасны. И вöчисны. Колис сöмын дзоньтавны Керчомъя-Кулöмдiн кост, — сёрнитiс садса воспитатель Эльвира Николаевна Напалкова. 
Бур туй воис сьöлöм вылас эз сöмын йöзлы, но и пемöсъяслы. Шлапъялöны-тотшöдöны кöза да мöс чукöръяс, бурöн оз сетны машинаяслы туй. Туй кузя повтöг позьö ветлыны велосипедöн, мукöд дзоля техникаöн. Да и подаяслы öнi нимкодь. 
Марина Дадашова. 
Гижысьлöн снимокъяс вылын: (шуйгавывсянь веськыдвылö) мастер С.С.Гаврилов да водитель Е.В.Прохоров; мед эз кырöд мудöд; туй вылын и мöс, и техника.