Челядьдырся да томдырся кад, челядькöд уна вося удж — ставыс нин колис бöрö. Сöмын казьтылöмъясын позьö бергöдчывны сiйö, кöть и сьöкыд, но шуда воясö. Кулöмдiнын чужöм Надежда Николаевна Поповалöн пыр син водзын школаö котралöм, бать-мамыс, кодъяс овлiсны скöтöн. Тöдлiс война пансьöм. Сiйö вося июнь 21 лунö вöлiс мамыслöн чужанiнын, Кужйын, кöнi буретш пасйисны храм праздник. Сиктсаяс ёна и гажöдчисны. Мöд лунас вöлöн верзьöмöн военкоматсянь локтiс том морт да юöртiс, мый фашистъяс уськöдчисны миян страна вылö. Разöдiс айловъяслы фронт вылö чуксалан повесткаяс. Сикт пасьта бöрдiсны аньяс, колльöдiсны верöсъяснысö да пиянсö война вылö. Оз вун и войналöн помасян лун. Май 9 лунö водз асывсяньыс чуксалiс сiйöс мамыс, висьталiс, мый радио пыр юöртiсны Победа йылысь. Ывлаыс вöлi букыш, лунтыр усис-шляпкис уль лым. Но, та вылö видзöдтöг, кулöмдiнсаяс гажöдчисны бурпöт.
1947 воын Надежда помалiс шöр школа, а сэсся Сыктывкарса пединститутбердса кык вося курс, лоис велöдысьöн. Квайт во уджалiс Аныбса школаын, уджысь орöдчытöг велöдчис водзö, шедöдiс вылыс тшупöда тöдöмлунъяс, лоис биолог-химикöн. Регыдикöн уджыштiс Керчомъяса школаын, РОНО-ын, Кулöмдiнса кöкъямыс класса школаын, бöръя 15 восö — рытъя школаын. Велöдчисны сэнi медсясö том йöз, кодъяс уджалiсны нин, помалiсны 9-10 классъяс. На пиысь унаöн водзö пырисны вылыс тшупöда велöдчанiнъясö. Матö комын во сетiс челядькöд уджлы, мыйысь сiйöс ыдждöдлiсны уна пасъянторъясöн.
Сентябр 7 лунö Н.Н.Поповалы тырис 90 арöс. Тшупöда пасöн сiйöс чолöмалiсны районса администрацияöн веськöдлысьöс вежысь Н.А.Левченко, кодi сетiс президент В.В.Путинсянь чолöмалан гижöд да козин, «Кулöмдiн» овмöдчöминлöн администрацияöн веськöдлысьöс вежысь В.П.Нестеров, олöмаяслöн районса котырöн веськöдлысьöс вежысь И.З.Ахмадова да олöмаяслöн Кулöмдiнса котырöн веськöдлысь В.П.Нестеренко. Сиисны ён дзоньвидзалун, кузь нэм да кыпыд олöм.
Галина НЕСТЕРОВА.