Тайö ыджыд нимнас найöс ыдждöдлiсны августын олöма йöзлöн чукöртчылiгöн да вичмöдiсны диплом. 
Владимир Леонидович — Кировса, Ручö волiс 24 во сайын школа кыпöдiгöн. Паныдасисны öта-мöдыскöд да воисны сьöлöм выланыс. Сэсянь пыр öтлаынöсь. Мария Витальевна 37 во уджалiс бурдöдчанiнын медсестраöн, öнi шойччöг вылын. Верöсыс бöръя 15 восö зiльö сиктса администрацияын водительöн. Гозъя пыр öтлаынöсь, уджын кöть шойччигöн. Уна во бергöдiсны ыджыд овмöс, видзлiсны дас да унджык öш, ыжъясöс. Во-мöд сайын на и лэдзчысисны наысь. Кыкнанныс зэв чöскыда пусьöны-пöжасьöны. Владимир Леонидович велöдчис таö водзын вахтаöн уджавны ветлiгöн. Кöсъян кö пö сёйны чöскыда, öдйö велалан дасьтынысö. Торйöн чöскыда да мичаа банйöмаöн артмöны сылöн пöжасъясыс, кодъясöн тшöкыда чöсмöдлö гортсаяссö да тöдсаяссö. Пöжасьöмын гусяторъясöн юксьö тöдсаясыскöд, да и оз сöмын накöд: аслас радейтана уджас велöдiс и Ичöт Аныбын ветеранъяслöн кольöм да тавося чукöртчылöм вылö, и весиг районлöн чужан лунö юрсиктын мунысь гаж вылö локтысьясöс. Шензьöдiс йöзöс чöскыд пирöгъяснас. Гозъя зэв мичаа сьылöны, ветлöдлöны «Сударушка» котырö, кöнi найö — гаж медшöр пестысьяс. Век водзынöсь и олöмаяс котырлöн уджын: пыр петкöдчöны ордйысьöмъясын да гажъясын, районын волiсны кызвын сикт-посёлокö, весиг орчча районъясö. Вевъялöны быдлаö, и пыр ки-на-ки кутчысьöмöн, кыпыд сьöлöмаöсь. Мед и водзö восьлаласны тадзи олöмас, нимкодьöдасны ставнысö мыла сьылöмнаныс, ыджыд тöжда сьöлöмöн йöз дорö матыстчöмнаныс. 
Гижöд да снимок Галина НЕСТЕРОВАЛÖН.