Олан гажыс Лебежнöйын

[ A+ ] /[ A- ]

Выль во водзын Лебежнöйын выльлаö овмöдчис Василий Иванович да Майя Александровна Булышевъяслöн нёль челядя семья. Ыджыд, шоныд да кыпыд керка ньöбисны мам капитал вылö. Орччöн гид, «сьöд» и «еджыд» пывсян, пес лэбув, кöзöд, градъяса, дзоридзьяса да вотöсъяса öшинь ув, ыджыд картупель му да мукöдтор.
Воддза керка, кöнi водзтi вöлi сельполöн лавка да овны сетiс Парч сиктса администрация, нёль челядьöн лоис дзоляöн. Да и сiсь подувнас вöлi кöдзыдöн, кöть пыртöдз Василий Иванович дзоньталiс ёна да олiгöн пыр вöчасис. Мöвпыштлiсны бур олöм корсьöм могысь мунны бокö, ньöбны керка, но нянь-солöн некöн эз виччысьны. А Лебежнöйын ставыс ас йöз. Василий Иванович чужис да быдмис танi. Сiйö мусмис и Шöръягса гöтырыслы. Тайö керкасö öти айлов вузалiс кувсьöм бать-мамыслысь. Кутöмаöсь бура, эз ков весиг дзоньтасьны.
Тöдмасисны вöрын. Василий Иванович асшöр уджалысь дорын увйысис, а Майя Александровналöн мамыс видзöдiс сылöн овмöс бöрся войнас да аскöдыс тшöкыда босьтлiс нывсö. Вочаасьлiсны öтчыд да мöдысь. Аддзысьлiсны и Лебежнöйын, кытчö том ныв волывлiс Земфира чой дорас. Öтчыд öтлаын веськалiсны чужан лун пасйигöн.
— Синмöс пуктi медводдзаысь аддзылiгöн. Казялi, мый Майя зэв зiль, отсасис чойыслы, сяммис вöчны быдтор. Клубыд абу да ветлöдлiм туй кузя, лэччылiм ва дорö. Корасьны ветлi Шöръягö мамыс дорö, — казьтылiс Василий Иванович.
— Зонмыс пö зiль, сыкöд он вош. Лоан пö верöс сайын, а он сы водзын. Да и зэв пöся вочаалiс инькаöй, — содтiс гöтырыс.
Кыкнанныс ыджыд семьяысь. Василий Ивановичлöн вит чоя-вока. Майя Александровна дас кык челядя котырысь дас öтиöдыс. Мамыс öлöдiс, мый öнi, уджыд абу да, уна челядьöс быдтыны сьöкыд, но эз повзьы. Медводз чужис Мирон, кодлы 11 арöс да велöдчö Немдiнса школаын нёльöд классын. Сизим арöса Артём — медводдзаын. Нёль арöса Арина да куим арöса Варвара ветлöны Лебежнöйса садйö. Водз асылын Майя Александровна пусьö да вердö асшöр уджалысь дорын трактористалысь верöссö да пиянсö. Колльöдö бöръяяссö школаö, а нывъяссö нуö садйö. Гортгöгöрса удж бергöдöм бöрын котöртö отсасьны инькалы, кодi видзö мöскöс да куканьöс. Сэсся бара пусьö-пöжасьö, мед вердны семьясö рытнас. Выльлаын пачыс бур да пöжасьлö тшöкыда. Майя Александровналы вöлi 12 арöс, кор мамыс да чой-вокыс мунiсны вöрö, а сылы тшöктiсны пöжавны нянь. Аддзылiс, кыдзи мамыс вöчлiс няньшом, кыптöм бöрын пуктылiс дозмукö да сюйлiс пачö, но ачыс эз пöжасьлы.
— Юрын бергалiс: няньтöгыд абу сёйöм, оз кö артмы, ставныс колясны тшыгйöн, кыдзи ме налы кута видзöдны синманыс? Надзöникöн вöчи мам моз да öд артмис. Мам ошкис да лоис сэтшöм нимкодь, мый пусиг-пöжасигöн эг вешйывлы сы дорысь. Градвыв пуктасъясысь консервъяс вöчлiм öтув. Ставным ёна вотчылiм, пуктылiм турун да керлiм картупель ставöн öтув, — бергöдчылiс ань челядьдырся кадö.
Мирон да Артём зэв окотапырысь мунöны школаö, кöнi урокъяс бöрын велöдчöны серпасасьны да вöчасьны. Мирон кö аддзас аскоддьöмъясыслысь выльтор, оз дзайгы сьöм бать-мамлысь, ньöба пö вотчöмысь вичмöм сьöм вылö. Школаысь локтöм бöрын оз на удит пöрччысьны, а висьталö нин велöдчöм йылысь, оз дзеб и асьсö видыштöм. Арина да Варвара рытъяснас «воспитателялöны», велöдöны бать-мамсö, овлö, и вокъяснысö. Сьылöны да йöктöны.
Бать-мам вылö видзöдöмöн зiльöсь и челядь. Важ керка дорас Василий Иванович лэптылiс пывсян. Öтчыд и петкöдлiс, а дзоляяс нитшкасисны зэв сюся. Отсасины и потшсигöн да мукöдтор вöчигöн.
— Кыкнанныслöн эм велосипед. Жугалас кö, петкöдла да дзоньталöны асьныс. Шойччан лунъясö отсасьöны пöчыслы. Гожöмын öтув лэччылам кыйны Эжва дорö чери, ёна вотчам, — сёрнитiс уна челядя бать.
Варвара кöть и медся ичöт, но сiйö пö сюсьджык да тэрыбджык. Ставсö тöдмалöм могысь «нырсö сюйлö» быдлаö. Няньшомтö гудрыштас, тырмымöн-ö солыс, мамыс моз видлас шыд. Сы вылö видзöдöмöн босьтчö и Арина.
Важ керка дорö некытчö вöлi кыпöдны гид, а танi эм.
— Куканьöс сета пилöн семьялы, мед быдтасны мöскöдз. Мöскыд кö эм, вердас. Асланым ыджыд семьяын видзлiм куим мöскöс. Вöлiны и чаня вöв да порсьяс. Эм трактор. Бергöдчам. Водзтi сиктъясад семьяясыд вöлiны уна челядяöсь. Василийлöн этша на да мед на чужтасны, лöсьöдасны ыджыд овмöс. Ачыс уджалö, кутö-вердö семьясö. Моньöй зiль. Мед кутчысьöны коми йöзлöн сиктса олöмö, — ловнас оз усь Василий Ивановичлöн Нина Альфатовна мамыс, кодi тшöкыда волö видлыны внук-внучкаяссö.
Марина ДАДАШОВА.
Гижысьлöн снимок вылын: Булышевъяс гозъя
кык нылыскöд.


Комментарии:

Добавить комментарий

Свежий выпуск: за 11 октября