Мичаник, сьöд сэтöр синъяса, статя ныв. Уджалан паськöма, резина сапöга, тöвнас кö — гын сапöга. Сэки эз эскыссьы, мы сiйö — туй вöчысь да дзоньталысь мастер. Ачыс Казахстанысь, а бöрйис войвыв. Сыктывкарсянь Кулöмдiнö самолётöн лэбигöн нимкодясис помтöм-дортöм пармаöн. Шогö эз усь, кор эз тыдавны каръясын моз асфальта паськыд туйяс. Мöдарö, кыскис. Наталья Владимировна Липина Омскын Сибирса туй институтын туй стрöитысь инженерö велöдчöм бöрын воис Кулöмдiнö 1985 воын. Аэропортын лёкиник машинаöн вочаалiс мужичöй. Абу галстука да пиджака, а уджалан паськöма. Мöвпыштöма, мы мöдöдöмаöсь водительсö. А вöлöма ачыс туй дзоньталан да вöчан участокöн веськöдлысь Н.И.Ящук. Вайис контораö да тöдмöдiс тöжд-могъясöн. Сэки буретш вöчисны республикалы да районлы зэв колана Сыктывкар-Мылдiн туй. Том специалистöс индiс мастерöн. Сылöн веськöдлöм улын вöлi эз сöмын туй вöчöм, но и став ён техникаыс. Сылысь кывзысисны опыта нин уджалысьяс. Тöдмöдiсны коми йöзлöн да Коми мулöн аслыспöлöслунöн. Кывкутысь том специалистöс индiсны прорабöн, а сэсся лёк суöмысь видзчысян техника кузя инженерöн. Öнi — план да производство кузя юкöнын инженер. Кулöмдiнын и аддзис ассьыс шудсö. Мича зон танi жö уджалiс водительöн.
Наталья Владимировна — республикаса туй овмöсын пыдди пуктана уджалысь. Бур уджсö унаысь пасйылiсны почёт грамотаöн да аттьöалан гижöдöн.