Окота уджавны — öдва войыс кольö

[ A+ ] /[ A- ]

Тайö морт йывсьыс гижны индiсны асьныс пожöгдiнсаяс. Пасйыштöй пö праздник водзвылас Иван Андреевич Третьяковöс. «Коми республикаса нимöдана уджалысьыд» абу нин сэтшöм уна миян сиктсöвет улын. Йöзöн татшöм пыдди пуктöм бöрад кыдз он ветлы сы дорö варовитыштны, казьтыштны кольöмасö и öнiясö.
Чужiс 1964-öд воын. Мортыс вывтi вежавидзысь, абу уна сёрниа, зэв киподтуя, гашкö, вöчтöмторйыс абу. Кытчö тай эг чöвтлы синмöс куим жыръя керкаас — быдлаын сылöн вöчöмторйыс: пызан-улöс босьтöмöн да пачьяснас помалöмöн. Абу быдöнлы сетöма татшöм кужанлунтö. Рытывбыд варгим да сiдз ёна унасö эг и вермы вугравны. Дзик пыр воисны юрö гижысьяслöн öти чукöртчылöм вылысь Владимир Васильевич Тиминлöн кывъясыс: «Культура керкаын ыджыд чукöртчöм видз-му овмöсын уджалысьяслöн. Корасны сцена вылö нималана трактористöс юксьыштны чöжсьöм опытöн. Мортыд каяс трибуна дорö. Нямралö киас картузсö, гöрдöдöма и пöсялöма, весиг синваыс пычиктiс ёна думайтöмсьыс. Но опытöн эз юксьы — сiдзи эз и сюрны колана кывъяс. А сэсся педзыштöм-сулалыштöм бöрын крапкис залын пукалысьяслы: ме бурджык кая тракторöн му вылас и гöра сiйöс лун и вой. Тайöн сёрни помалiс. Татшöмöсь и эмöсь комиясыд: бурджык синсьыс би петмöн уджаласны трибуна вывсянь варгöм дорсьыд».
— Иван Андреевич, вайö бергöдчывлам школаын велöдчан кадад.
— Школа помалi 1981-öд воын и то Жан Валентинович отсöгöн. Во шöрас öд шыбитлi велöдчöмöс. Мöвпалi: мый мен дас класс помалöмыс, кор зептын эм нин тракторист-машинистлöн право. Тайö школаас жö и велöдiсны. Но директорыд эз лэдзчысь да душ-мöдысь на волiс гортöдз. Яндзим лои да быть воöдчи экзаменъясöдз. Аттестат сiйö воас босьтiм 36-öн. Сэсся Ярашъюысь босьтi направление да мунi Ношульö велöдчыны вöр кыскалан машинаöн рулитысьö. Сiйö кадас сынöдын тайö сикт дорас зурасисны кык «Ан-2» самолёт. Öтиыс енэжас сотчис, мöдыс шматкысис муас. Унаöн пöгибнитiсны. Ме сэсся водзö эг и велöдчы, шыбитi. Йитчöма тайö неминучаыскöд али абу, öнi ог нин помнит. 1982-öд воын пыравлi уджавны Кулöмдiнса сельхозхимияö, юкöныс вöлi Пожöгын. Уджалi октябрöдз. Начальникалiс Вомынбöжысь Андрей Васильевич Сенькин. Но воис военкоматысь повестка и октябр 4-öд лунö менö тыр пызан сайын колльöдiсны армияö. Челябинсксянь гурöдiсны Германияö. Глац карын квайт тöлысь вöлi учебкаын. Велöдiсны механик-водительö. Сы бöрти вуджöдiсны Чехословакияö — ГДР граница дорö Карл-Цейс Иена карö. Зэв ыджыд университет сэнi. Велöдчанiныс дзик стöкан кодь гöгрöс и ставыс стеклöысь. Университет бердас Варшавскöй договорö пырысь войскалы лöсьöдöмаöсь оптика завод. Лэдзисны бинокольяс, оптическöй прицелъяс. Велöдчöм бöрын сеiсны младшöй сержант чин. И меным борд улö пырис быдса отделение. Во служитöм бöрын лэдзлiсны гортö отпускö. Бöрсö локтöм бöрын лои сержантöн, сэсся старшöй сержантöн — взводса командирлы отсасьысьöн. Воöдчывлi старшинаöдз. Но армияад быд дзоляник грекысь öдйö воштывлiсны чинъястö. Сiдзжö и менам погон кузя паськыд лычкаыд жбыркнитiс. Öнi на помнита ассьым танкöс: Т-72МС и сылысь номерсö — 929. Быд танклöн башня вылын вöлi ромбика пас, кытчö серпасалöма кыдз пу кор да машиналысь номерсö. Батальоныс миян вöлi нималана, 6 ордена. Казармаын стеклöа шкапын сулалiс Боевöй Знамя. Дзоньнас сотчалöм и пуля розьяса. Перйывлiсны ноябр 7-öд да май 9-öд лунъяс кежлö. Мойвиис и «воюйтыштны». Медводз пырöдчывлiм «Запад 83» учениеясö. Вöлi мöд эшелонын. А сэсся нин «Дружба 1984-ын» медводдзаас. Кыкнаныс вöлi вывтi уна йöза и техникаа. Ёна вежласим опытнад немечьяскöд. Тешкодь вöлi налöн службаыс. Мыйöн воас пекнича, öбед бöрын босьтöны чемоданъяс и тiрöдöны гортас.
Батальонын комисьыс вöлi öтнам. Этша и маршируйтöдлi салдатъястö коминад: «öти-кык-öти-кык». Сэки гарнизонад ставыс сулалiс «дедъяс» да сержантъяс вылын. Юасьöны менсьым, кöнi пö Комиыс. А ме лыддьöдла каръяс. Нинöм оз тöдны. А мыйöн шуа Воркута — ышловзьöны: сидели там друзья. 1984-öд вося октябр 30-öд лунö демобилизуйтчи.
Пыри уджавны «Пожегодскöй» совхозö и пыр нин трактористалi. Первой шасси вылын вель дыр журъялi, сэсся 9 во бульдозер вылын летйыси. Вöвлi сэтшöм лöз рöма ичöтик кабинаа гусеничнöй трактор. Вит во öтарö-мöдарö кыскалi «ДТ»лысь рычагъяс. Пуксьывлi и «К-700» вылö. Сэсся доддявлi экскаватор. Бöръя помас пыр нин «Беларусьлысь» бергöдлi рульсö. Вичмис уджавны быд отделениеын Вомынбöжсянь босьтöмöн Великопольеöдз. Водзын, 1984-öд вояс гöгöр, сы мында техника вöлi совхозын! Весиг мöвпыштны он куж: 90 трактор, 48-50 машина. Ме вöлi лэбала сынöдöдыс, мый вöча татшöм колана удж государстволы, районлы, аслам совхозлы. Мукöддырйи войыс öдва коляс — сэтшöм окота уджавны. Да и мудз тöдтöг мырсьöмсьыд вочаыс тырмымöн жö: быд тöлысь бур удждон, весиг лун эз сёрмывлыны сеталiгöн, быдпöлöс содтöдъяс, часъяс арталöм, пыр вöлi уджалан кöлуйыд (öнi коркö öтчыд сетлiсны перчатки, да пасьталiгас и резьдiс). Удж серти сетлiсны тонна-мöд-коймöд турун картаад баксысьыдлы. Видз вылын сэки бергалiсны куш том йöз. Став томлунöй гартчис гусеницаяс костын. Кымыныськö лэччывлiм войколöн Вапöлка-Сьöдтыдiн-Ыбаад турунла. Гортса вольпасьыд унаысь вунлiс.
— Сэкся кадö татшöм уджалöмсьыд и пыдди пуктöмыс вöлi мöрччана. Тi I класса механизатор, 1989-öд воын — юкöнын медтöдчана профессияяс серти уджалысьяс пöвстын социалистическöй ордйысьöмын вермысь. 1999-öд воын уна вося бур уджысь вичмис Коми республикалöн почёт грамота. Ачыс республикаса юралысь козьналiс киын новлан именнöй часi. А 2004-öд воын лоинныд Коми республикаса пыдди пуктана уджалысьöн, сетiсны морöсвывса пас. Бöръяяссö ачыс Юрий Алексеевич Спиридонов пысавлiс-козьнавлiс. Асьныд казьтыштiнныд: пыр на пö кыла сылысь шоныд да небыд шамырсö. А öнi мыйкö вежсис?
Чуймöм и жаляддза видзöдлас ме вылö:
— Ставыс öшалö öти сi вылын — вот-вот орас. Таво гожöм кирпич гараж дорысь гургисны ставсö, кöнi кöрт дукыс кылыштiс: важ тракторнас и машинанас и… бытьысь öд лоö тадзи вöчны. Запчасьтыд абу. Солярка пыр пакталöма. Кöть нин сьöм сыысь чуктыштас. Уджалöмысь сьöмсö эг нин прамöя аддзывлöй. Вый-яй вузыштасны бокö да чукöртыштöм сьöмторсö юклöны. Выль 1221 «Беларусь» тракторлöн öти резинаыс баллонтöгыс 45 сюрс шайт. Шензьыны он вермы. Мед нин, шуам, сьöкыдджык вöчны топливнöй насос, а тайö резинасö öд сöмын штампуйт. А сулалö машина дон. Неважöн вальдывлiс подшипникöй. Вайисны нёль выльöс вежöм вылö. Тэчигас и киссис. Водзынсö кöть важ трактор-доноръяслысь перъявлiм. И öнi и сiйö абу. Кыдзи овны водзö — ог весиг тöд. Талунъя лунсö и талялам, аскияыс сук ру пиын. Сьöлöм вылын курыд и забеднö тайö олöмсьыс. Бырас кö и тайö кулöма нисьö ловъя СПК «Пожöгыс», унатор ми воштам миян сиктса олöмысь. А мый вöчны сiйöс кутöм могысь — ме весиг ачым ог тöд.
— Да, абу нюмъялана сёрни. Вай варгыштам мöдтор йылысь, а то кыкнаннымлöн вазясны синъяс. Юксьышт сямлуннад.
— 1987-öд воын мöдi лэптыны керка. Керсö ваялi Ырымысь. Куим во мысти петiм выль оланiнö. Нюжöдi-пыртi жыръясö би, тэчи пачьяс. Бöръясö велöдiс Борис Владимирович Сенькин сватöй, но асногыс — доминоöн. Талун кежлö кызь сайö тэчöм лоö, некод на тай эз элясьлы тшынöдöм вылö. А сёйтö кирпич вылад асьным жö лойим Настякöд. Оз вöлi сюр да, быть. Вундывлiм пач вылас 1800 кирпич да 300 гöгöр сводъяс. Магазинысь босьтöмасьыд оз торъяв. Керка бердö йитi веранда, стеклöалi. Керкапытшса пызан-улöс-шкап — аслам киöн вöчöмтор. Йöзад тöчитчыны-сваритчыны ог жö пет. Йöрö лэптывлi ичöтик вöчасянiн. Сэтчö чукöртöма горт гöгöр бергöдан быдпöлöс инструмент. Сытöг сиктад дзик нин некыдз.
— Вöр-ваад петавны та мында нокнад кадыд вичмывлö жö-а?
— Батьöн лöсьöдöм лэч туйöн вöдитча. Кытшовтö Пожöг ю боктi. Дас кык кымын во сайын горт дорын тшуплi вöр керка, тракторöн катöдi места вылöдзыс да тэчлi. Кывсьö, кöсйöны пö татшöм стрöйбаясысь перйыны вот. Дзикöдз быд ногыс мöдiсны дзескöдны сиктса коми морттö. Квайт арöссянь кыскалiс батьö вöрад. Сэки и пöткаыд уна вöлi. Ёнджыкасö кыйлiм чукчи, а öнi и сьöлаыс быри. Таво керкаö кайлiгöн октаси — лэччигас бöр лэдзалi. Дзик куш вöрыс. Черитö на водзын ёна кыйлiм Пожöг юсьыд. Пес-плака кодь сир-налимъяс да тупльöс комъяс öти войöн тыртлiсны дас вит литраа ведратö. Но и юыд öнi пакталiс.
— Душ-мöд кыв аслад радейтана да ртуть кодь визув гöтыр да муса челядь йывсьыд.
— Таво сентябр кызь коймöд лунö пасйим öтлаын олöмлы комын во. Ме öд Настяöс öти шайт да ветымын кöпейкаысь и ньöблi, — серавлö. — Госпошлинаыс сэки сы мында вöлi. Тöдмасьлiм Анастасия Николаевнакöд Ыбаын турун пуктiгöн батьыс керкаын. Кöкъямыс класс помалöм бöрын сiйö кык во велöдчис кооперативнöй техникум-училищеын и 1986-öд воын петiс нёльöд разряда пöварöн (татшöмыс душ-мöд и вöлöма курс вылас) — позис уджавны карса ресторанъясын. Но кыскис гортас. Медводз уджыштiс совхозын разнорабочöйöн. Сэсся садйын. 1991-öд вося апрель медводдза лунö Нина Алексеевна Сенькина корис уджавны Пожöгдiнса ФАП-ö санитаркаöн и öнöдз сэнi бергöдö уджсö. Быдтiм кык челядьöс. Тимофей пиöй гöтыра, быдмö Костя нима внук. Екатерина нывным быдтысьö жö. Глафира внучка гажöдö миянöс. А сiдзсö нылöй верöсыскöд олöны Кулöмдiнын. Менам зэв аслыссяма чужан воöй. Сэтысь быд лыдпас лöсялö ас котырлöн чужан лунлы. 1964-öд во: май 1 лун — Настя гöтырлöн, март 9 лун — Тимофейлöн, июнь 6 лун — аслам, август нёльöд лун — Екатериналöн чужан лун. Некор он вунöд и сорсьы найöс чолöмалiгöн.
— И бöръяпомыс. Мый медся вылö донъяланныд мортлысь?
— Сöвесьт.
Владимир ШОМЫСОВ.
Снимокъяс гижысьлöн.


Комментарии:

Добавить комментарий

Свежий выпуск: за 15 ноября