Ог вунöдöй

[ A+ ] /[ A- ]

Февральын тырис 75 во, кыдзи помасис Сталинградса тыш, кодi лыддьыссьö мирын медся вир кисьтанаöн. Öтарсянь и мöдарсянь усисны миллионысь унджык морт. Буретш Сталинград бöрын став мирлы лоис гöгöрвоана, мый фашизмлысь сьылiдзирсö Сöветскöй Союз чегас. Сталинградса кытшö веськалiс 300 сюрс сайö фашист, на пиысь немечьяслöн 22 генерал. Нöшта медыджыд чинаыс — фельдмаршал Фридрих Паулюс.
Пасъям, мый Сталинград дорын тышкасисны и Коми муысь петöм геройяс, кодъяс бöръяöдз сулалiсны Волга дорын да эз лэдзны вуджны тайö юсö ярмöм фашистъяслы.
Сталинградса тыш неважöн казьтылiсны и Помöсдiнса шöр школаын. Котыртлiсны сылы сиöм конкурс, а сэсся школаса музейын 5-öд, 6-öд да 11-öд классъяслы нуöдiсны повтöмлунлысь урокъяс.
Челядь водзын сёрнитiсны Сталинградса герой, Выльгорт грездысь фронтöвик Степан Алексеевич Курочкинлöн нывъясыс — Мария Степановна Гаевская да Валентина Степановна Шомысова. Налöн батьлы усис фронтвывса сьöкыд туй. 1941 вося сентябрын война вылö босьтiсны 19 арöсöн. Веськалiс Калининса фронт вылö, лоис разведчикöн, кыйис немечьяслысь «языкъясöс». Морöсас сьöкыда доймöм вöсна куйлiс госпитальын. Бурдöм бöрас нуисны Ленинградса фронт вылö, а сэсся дорйыны Сталинград, кöнi бара чорыда доймис. Госпиталь бöрын бара фронт вылö, вöзйысис ачыс.
— Батьным сьöкыда доймылiс унаысь, но öтарö бöр мунлiс фронт вылö, — казьтылiс Мария Степановна. — Сiйö некодлöн мыш сайö эз дзебсьы. Батьлöн эмöсь «За отвагу», «За боевые заслуги», «За оборону Ленинграда», «За Победу над Германией» да мукöд медальяс, маршал Коневöн кырымалöм аттьöалан грамота. Миян бать матыстчис Берлинöдз, но армиясö бöръя здукас веськöдiсны Чехословакияö. Сылы войнаыс помасис Прагаын. Гортö локтiс ловйöн, гöтрасис да сэсся чужим ми — кык пи да куим ныв. Батьным вöлi зэв бур мортöн, ми сiйöс зэв ёна пыдди пуктылiм.
Колö жö лоны — батьлöн чужан луныс буретш май 9-öд лун! Победа лун. Нöшта Выльгортын сэки Степан лун. Победа лунö бать сывйыштлiс миянöс да синвасорöн шулiс:
— Мед жö война сэсся эз ло, мед тiян вытi тайö лёкыс эз мун.
Ме талун аслам челядьлы да внукъяслы шуа тадзи жö: мед сöмын эз ло война.
Челядь водзын сёрнитiс и шöр школаса директор Фрида Эмануиловна Линдт. Сталинград вайис и сылы ыджыд шог. Буретш сэнi вир кисьтана тышын усис Фрида Эмануиловналöн айкаыс — Дмитрий Николаевич Игнатов.
— Помнитöй найöс, кодъяс сетiсны ловсö миян да тiян олöм вöсна. Помнитöй да лоöй на кодь жö повтöмöн. И некор эн вунöдöй важсö. Сöмын сэк позьö кутны лача, мый аскиа лунным лоö югыд да лöнь, — помалiс сёрнисö Фрида Эмануиловна.
Кутам эскыны, мый томуловлы тайö сёрниыс коляс вежöрас. Водзтi шулöмаöсь: «Кодi вунöдас важсö, сiйö оз гöгöрво талунсö, и аскиа луныс сылöн оз ло». Чайта, мый ми абу на лыдысь. Ми кутам помнитны важсö да нимöдны сiйöс.
Ольга ШЕБЫРЕВА,
коми кыв велöдысь.
Гижысьлöн снимокъяс вылын: Валентина Степановна Шомысова да Мария Степановна Гаевская; Фрида Эмануиловна Линдт.


Комментарии:

Добавить комментарий

Свежий выпуск: за 6 декабря