Вöралысьяслöн «Помöсдiн» котыр лöсьöдöмсянь 25 во тырöмлы сиöмöн, тавося март 31-öд лунö Эжва вылын нефтебаза весьтын мунiс йи улысь чери кыйöм кузя ордйысьöм. Сiйöс нуöдiсны öтув вöралысьяслöн котыр да овмöдчöминса администрация. Чöвтлiсны вугырнысö 56-öн, на лыдын 14 арöсöдз 11 челядь да 7 нывбаба. Таысь кындзи вöралысьяс котыртлiсны сяръясьöм да ассьыныс ворсöм, а овмöдчöминса администрация — пневматикаа винтовкаысь лыйсьöм. 
Ордйысьысьяс да найöс видзöдысьяс водзын сёрнитiсны вöралысьяслöн котырöн веськöдлысь Н.И.Игнатов да овмöдчöминса юралысь А.Е.Уляшев. 
Ордйысьöмсö нуöдны отсалiсны «Таксатор» (В.И.Карманов), «Белый дом» (А.Н.Климов) котыръяс, би кусöдысьяслöн 142-öд номера юкöн (И.Н.Игнатов), асшöр уджалысьяс Л.С.Голосова, О.В.Латкин, С.Е. да Т.С.Пономаренкояс, А.Д.Размыслов. «Мондилöн» Вылыс Эжваса юкöн весалiс лымйысь ордйысянiн да матыстчанiнъяс. Мед ставыс вöлi лючки, видзöдiсны би кусöдысьяс. 
Ставыс артмис колана ногöн. Вермысьяслы вичмисны медальяс, кубокъяс, дипломъяс да козинъяс, тшöтш и челядьлы. Бöрыннас ставöн панялiсны пöсь юква да юисны чай. 
Кыйöм черилöн öтувъя сьöктаыс лоис 792 грамм. Медуна, 240 грамм, кыйис Кирилл Сергеевич Сидоренко. Сылы вичмис микроволновöй пач. Нывбабаяс пöвстын медуна кыйысьöн да медуна кыйысьяс пöвстысь мöдöн лоис Елена Викторовна Карманова. Сылы козьналiсны йи писькöдан да тöлын кыйсьыны коланторъяс. Коймöдöн лоис Алёна Николаевна Чисталева, кодлы сетiсны газ баллонъяса новлöдлан газа плита. Челядь пöвстын медуна кыйис Полина Плешева, мыйысь козиныс 1500 шайта сертификат. Вит розь медöдйö, 2 минутöн да 40 секундöн, писькöдiс Михаил Николаевич Игнатов, кодлы вичмисны сёянлы да чайлы термосъяс. Сяръясьöмöн айловъяс пöвстын медводзын лоис Евгений Уляшев, а нывбабаяс пöвстын Светлана Попова. Вöралысьяслöн ворсöмын айловъяс пöвстын медводзö петiс Михаил Игнатов, а нывбабаяс пöвстын Ксения Осипова. 
Тадзи, öтув кутчысьöмöн, вöралысьяслöн «Помöсдiн» котырö пырысьяс кутасны овны и водзö. 
Николай ИГНАТОВ, 
вöралысьяслöн «Помöсдiн» котырöн юрнуöдысь. 
Сергей ПОНОМАРЕНКОЛÖН снимок вылын: йи улысь чери кыйöм кузя ордйысьысьяс.