Нималана коми тележурналист Öльöксан Пивкинöс тöдöны республика пасьта. Коми республикаса «Юрган» телеканалын «Вочакыв» уджтас — сылöн быдтас, кодöс окотапырысь видзöдöны и комияс, и став финн-йöгра вужвойтыр. Енбиа журналист мунö медкузь да медсьöкыд туйöд — йöзлань. Найöс водзмöстчысь турист корсьö ылi туйясö петалöмöн.
Он кö волы Джеджим Пармаö…
— Туристлы оз ков помка, медым мöдöдчыны туйö, — висьталö Öльöксан. — Сылы век телепит аддзывны выль йöзöс, выль местаяс. Тайö сьöлöмкылöмъясыс менам чужисны ичöтдырсянь на. Чужи-быдми Дереваннöйын, век котравлiм томулов ю дорö кыйны чери, походъясö.
География миян школаын велöдiс Мария Андреевна Нестерова. Öнi сiйö нималö республика пасьта кыдз водзмöстчысь турист. Велöдысь тшöкыда петкöдліс челядьöс вöр-ваö, а сы кындзи лöсьöдiс Дереваннöйса школаын татшöм традиция — кöкъямысöд класс помалысьяс ставöн ветлывлiсны Джеджим Парма гöра дорö. Нималана туялысь Каллистрат Жаков серти, тшук Джеджим Парма гöра дорын и чужисны коми-зыряна войтыр. Мунны коліс ылö, ветлöмыс нюжаліс вежон чöж. Сöмын тайö походысь воöм бöрын нывъяс да зонъяс вермис шусьыны тыр-бур школа помалысьöн.

Перымöдз эг во
Менам Джежим Парма гöра дорö ветлöмыс лоис медводдза ыджыд походöн. Сы бöрын вокъяскöд ыззим ветлыны велосипедъясöн Дереваннöйсянь Перымö. Выль автотрассалöн сэки, гашкö, балаыс на весиг эз вöв, мунiм важ вöрса туйяс кузя. Дерт, эг воöй. Кысь сэки миянлы вöлi тöдны, мый Перымöдзыс Дереваннöйсянь нёльсё гöгöр верст… Та бöрын ыззи туявны география картаяс, пукалi да линейкаöн лыдди-арталi, кымын километра сайын сiйö либö мöд му да кар. Эськö зэв телепит вöлi быдлаö ветлыны, но позянлуныс сэкся кадö, дерт, некутшöм эз вöв. Весиг вöтын сэки эз усьлы, мый СССР коркö киссяс да границаяс воссясны. Та вöсна пыри велöдчыны журналистö, чайті, тайö уджнас быть вичмас ылі муясö ветлöмыс. Öнi, кызь сизим во нин тележурналисталiгад, мойвиис ветлöдлыны и республика пасьтала, уналаын вöлі и суйöр сайын.

Сэн, кöнi
помасьö Россия
Ветлöдла турпоходъясö и ёртъяскöд, и семьяöн, и öткöн, и ыджыд котырöн, и подöн, и велосипедöн. Но некор ог ветлы путёвка серти — кытчö окотита, сэтчö и муна, оз ков меным некутшöм график. Чайта, таын и шудыс збыль туристлöн — аслыд бöрйыны мунан туй, видзöдны-туявны, мый сьöлöмыдлы нимкодь.
Дыр кежлö мöвпъяснад колян сэтчö, кытчö воöдчин сьöкыд туйясöд. Татшöм туйыс вöлi Карскöй саридз дорö. Туристъяс пиысь öдвакö кодi сэтчö окотитас мунны. Öд мунны колö вутшкöсь нюртi вездеходöн — лютi-летi лунтыр. Вывсяньыс виялö кöдзыд зэр да чужöмтö сотö кöдзыд войтöв. Шойччыны позянлуныс вичмывлö сöмын вездеход жугалiгкостi. Сы пыдди местаöдзыс воöм бöрын гöгöрвои — дзик татшöм серпас ме и кöсйи татысь аддзыны: руд, кöдзыд саридз, куш ва берег. Сьöлöм вылын сэки лоис сэтшöм шуштöм да öтвылысь долыд: ме сулалi Россия помын, тайö кöдзыд саридз саяс – йöз му, а ме – туристъяс да журналистъясысь медводдза, кодi вермис татчöдз воöдчыны…

Чолöм, Сашка!
Быд муын менö шемöсö уськöдö вöр-валöн аслыссикас мичлуныс, а торъя нин — прöстöй йöз, налöн чужан кыв вылын мича сёрниыс. Сы мында во журналисталiгад сöмын Комиын меным паныдасьлiсны уна енбиа йöз, мукöдыскöд дыр кад варовитлiм. Дерт, ставнысö тöд вылад кутны сьöкыд. Овлö, улича вылын матыстчас кодкö, кисö мыччас: «Привет, Сашка!» А ме весиг ог куж казьтыштны, кодкöд паныдаси. Сöмын некор ог öтдорт, мöдарö — кутшöм долыд овлö, кор мортыс мича коми кывйöн висьтасьö! Вом паськöдöмöн окота татшöм сёрнисö кывзыны.
Дыр ог чукöртчы!
Мукöд дырйи кытчöкö туйö петöм водзвылын войсö он узь, окота öдйöджык мöдöдчыны. А чукöртча быд пöрйö öти здукöн – пызан вылö войдöрсяньыс на пуктала телефон, сберкарта да паспорт, мед вöлiны син водзын. Мукöдторсö öнiя кадö позьö ньöбны туйын. Туристлы медводз сьöрсьыс колö босьтны кыпыд ру, сэки туйыд лоö шыльыд да кокни.
Муна кö Урал вылö, чукöртчам унаöн, медым бипур дорын шойччигъяс дырйи позис туй ёртъяскöд гажаа варовитны да сьывны гитара улö. Мöдöдча кö велосипедöн, то векджык öтнам – медым некод оз манит, ме радейта мунны öдйö-öдйö пыр водзö, мукöдыслы вöтчынысö ме бöрся сьöкыд, вынныс оз тырмы.

Öшинь улын чеччалöны кöчьяс
— Некор эг окотит овны ыджыд карын. Овны кö — сиктын, вöр-ваыскöд орччöн. Сiдз и артмис. Дас во сайын лэптi Выльгорт сайын керка. Местасö чуктöдiсны дзик вöраинас, сэки матiберегын олан керкаяс эз на вöвны. Öнi, эськö, ёна нин стрöитчисны, но вöрыс, слабог, колис на. Керка дорын, дзик öшинь улын — вад, уялöн уткаяс, сёльöдчö чери, берегас чеччалöны кöчьяс. Зэв ёна меным сьöлöм вылö воö татшöм серпасыс, дась видзöдны быд асыв, да ог и умлы. Нöшта нин нимкодь, мый час джынйöн и воöдча тасянь удж вылö телестудияö. Быд пöрйö долыд сьöлöмöн локта гортö, кöть кутшöм кузь вöлöк абу вöлi вуджöма.

Наталья Кужба.