Ноябр 11 лунö Югыдъягысь Иосиф Степанович Кармановлы тырис 95 арöс.

[ A+ ] /[ A- ]

 Та дыра олöмöн сiйö, позьö шуны, вуджис би пыр и ва пыр. Ачыс Немдiнысь. Сизим класс помалöм бöрын велöдчис киномеханикö да петкöдлiс кино сиктъясö да матiгöгöрса посёлокъясö ветлöмöн. 1941 вося арын босьтiсны война вылö. Веськалiс сынöдса десантлöн войскаö. 1942 вося апрельын налысь котырсö шыбитiсны немечьяслöн тылö, кöнi ыджыд тышын доймис. Веськалiс пленö, вуджöдлiсны öти концлагерысь мöдö, а сэсся нуисны Францияö. Вöрöглöн киын вöлi война помасьтöдз, тöдлiс уна сьöкыдлун да дой.
Бергöдчöм бöрын уджалiс Запорожьеын. 1948-1982 воясын Усть-Немскöй леспромхозын вöлi механикöн, директорöс вежысьöн, старшöй инженерöн, технорукöн. Пыр нималiс бур уджöн.
Пелагея Степановна гöтырыскöд, кодкöд öтлаасисны 1949 воын, кыпöдiсны ас керка, чужтiсны-быдтiсны нёль челядьöс, ыджыд муслунöн да öтсöгласöн олiсны 56 во. Сiйö кувсьылiс нин во 12 сайын. Öнi Иосиф Степанович олö Иван пиыс дорын. Гажöдöны-кытшалöны сiйöс 6 внук-внучка да 5 правнук-правнучка.
Олöма мортöс чолöмалiс гöгрöс пасöн да сетiс Россияса президент В.В.Путинсянь аттьöалан гижöд районса администрацияöн веськöдлысьöс вежысь Н.А.Левченко. Бур кывъяс сiдзжö висьталiсны олöмаяслöн районса котырöн веськöдлысьöс вежысь И.З.Ахмадова, «Югыдъяг» овмöдчöминса администрацияысь юрнуöдысь специалист Т.А.Варварук, олöмаяслöн меставывса котырö пырысьяс да став рöдвуж.
Галина НЕСТЕРОВА.


Комментарии:

Добавить комментарий

Свежий выпуск: за 14 декабря