НОРВЕГИЯКÖД ЁРТАСЬÖМÖН

[ A+ ] /[ A- ]

Мый бурыс миян районын, кутшöм сьöкыдлунъясöн паныдасьлöны сиктсаяс, волiсны тöдмавны Войвыв Норвегия королевстволöн Арктикаса университетысь профессор Тур Гертсен да координатор Валерия Гертсен, кодъяс туялöны войвыв регионъяслысь сöвмöм, а сiдзжö Изьва районысь «Изьватас» котырöн веськöдлысь Николай Рочев. Ылi гöсьтъяс кутасны велöдны асшöр уджö босьтчысьясöс. Районса администрация котыртас тайö велöдчöмсö локтан вося январын.

— Миян университет ёртасьö войвыв странаясса университетъяскöд, школаяскöд, на лыдын и Сыктывкарса да Ухтаса университетъяскöд. Уджалам Якутияын, Мурманскын да Архангельскын. Тöдмалам, кыдзи сöвмöны войвыв регионъясын социальнöй юкöн да экономика. Шуам, тiян районö «Монди СЛПК» котыр вайис выль техника, уна олысь колис уджтöг. Донсаяслöн чукöртчылiгöн кылiм, мый лёка уджалö связь, «Ростелеком» оз нюжöд сэтчö оптико-волоконнöй йитöд. Тырмытöмторъяс эмöсь и биöн могмöдöмын. Ыджыд котыръяс омöля отсалöны ичöт сиктъяслы. А мый позьö вöчны ас вынъясöн? Колö котыртчыны районса администрациялы, общественнöй котыръяслы, предпринимательяслы да видзöдлыны, кыдзи бурмöдны сиктын олöм, кутшöм асшöр уджö босьтчыны сiйö либö мöд сиктын, мыйöн отсалас район, кытчö шыöдчыны отсöгла. Асшöр уджö босьтчысьяслы колö отсавны этша вылö куим во. Уджалыштöм бöрын видзöдлыны, кыдзи отсавныводзö, гашкö мыйкö вежыштны. Бизнес-балаяс колö лöсьöдны сиктлöн корöмъяс серти. Каръяс дорысь сиктын сьöкыдлунъяс паныдасьлöны тшöкыдджыка. Сиктын кö олöм оз ло, карсаяслы нинöм лоö сёйны. Кар, кöнi ыджыд котыръяс, сикттöг овны оз вермы, — пасйис Валерия Гертсен.
Валерия да Тур Гертсенъяс республикаын медводз тöдмасисны Изьва районса олысьяслöн тöждъяс-могъясöн, велöдiснырайонса администрацияöс. Вöлiны и Кöрткерöсын. Ноябрын районса юралысь Д.А.Шатохин ветлiс Норвегияö да вöлi конференция вылын, кодöс нуöдiсны Арктикалöн университет, да корис миян районö, мед уджавны öтув.
Ылiысь воöм гöсьтъяс ветлiсны Кужйö, «Кöлыся ва» ключ дорö. Районса культура керкаысь уджалысьяс тöдмöдiсны найöс коми кöлысь ворсан-нуöданногöн. Районса администрацияысь общественносьткöд да том йöзкöд туй визь юкöнысь медшöр специалист Юлия Малышева висьталiс вежа ва ключ йылысь важ йöзлысь казьтылöм. Волiсны и Кулöмдiнса нянь пöжаланiнö. Котырöн веськöдлысь И.М.Шахова тöдмöдiс коми пöжасъясöн, висьталiс уджалöм, быдсяма конкурсын петкöдчöм йылысь.
Предпринимательяслы да асшöр уджö босьтчысьяслы быдсикас отсöг да юöръяс сетан шöринлöн уджöн тöдмöдiс веськöдлысь Ольга Аргентова. Ылi сиктъясын абу интернет, и буретш шöринын позьö тöдмасьны выль юöръясöн, уджавны компьютеръяс отсöгöн, котыртны киподтуя йöзлысь выставкаяс. Танi жö отсалöны гижны балаяс, сетöны консультацияяс. Ольга Аргентова сiдзжö пасйис, мый мартсянь республикаса юралысьлöн общественнöй примитанiнын уджалö предпринимательяслысь право доръян уполномоченнöй, код дорö шöрин пыр юалöмъясöн, элясьöмъясöн, мытшöдъясöн вермасны шыöдчыны предпринимательяс. Районса администрацияысь вот юкöнöн веськöдлысь И.Е.Гулынина пайис, мый районын эм и предпринимательяслöн координационнöй сöвет. Гöсьтъяс юасисны, кыдзи сiйö уджалö. Налы воис сьöлöм вылас, мый районса администрация олö сикт-посёлокса олысьяслöн тöжд-могъясöн. Кежавлiсны и киподтуя йöзöн вöчöм козинъяс вузалан лавкаö.
Районса администрацияын аддзысьлiсны сиктса юралыськöд, райсöветса депутатъяскöд, общественнöй котыръясысь водзмöстчысьяскöд, предпринимательяскöд. Норвегияса гöсьтъяскöд öтув уджалöм йылысь висьталiс «Изьватас» котырöн веськöдлысь Николай Рочев.
-Коми муын зэв пöся вочаалiсны миянöс. Коми олысьяс восьсаöсь, шаньöсь. Тiян районын казялöм бурсö кутам висьтавны войвыв регионъясö ветлiгъясöн, йöзкöд аддзысьлiгъясöн. Кодлöн кö бурыс, гашкö, лöсялас и тiянлы. Тiян районкöд кутам ёртасьны да уджавны öтув, мед войвыв да ылi сиктса олысьяслöн бурмис олöм, — пасйис профессор Тур Гертсен.
Марина ДАДАШОВА.

DSC07202 DSC07197

Комментарии:

Добавить комментарий

Свежий выпуск: за 13 августа