Нина Ивановна Тюрнина чужис Кулöмдiнын.

[ A+ ] /[ A- ]

Школа помалöм бöрын велöдчис трактористкаö. Мöдöдлiсны Помöсдiнö, но регыд мысти бергöдчис чужанiнас. Уджавлiс «Кустпромын», вурлiс сапöгъяс, кыис кепысьяс да носкияс, кодъясöс мöдöдлiсны фронт вылö. Удж вылас тöдмасис верöсыскöд, кодi вöлi начальникöн. Öтлаасисны да зэв бура олiсны 62 во. Лэптiсны керка, быдтiсны куим челядьöс, пыр видзисны скöтöс.
Война бöрын сизим во уджалiс орсын, кытчö пырисны районса леспромхозъяслöн вузасянiнъяс, пöжасянiнъяс, сёянiнъяс, бухгалтерöн, сэсся бухгалтер-ревизорöн. Ветлöдлiсны ревизияясöн район пасьта, тшöкыда верзьöмöн. Ёна кынмавлiс. Орс бöрын вуджис кылöдчан контораö, кöнi бухгалтералiс 25 во. Öнi олö Альбина нылыскöд, верöсыс абу нин 8 во. Кад вичмигöн лыддьö газет-журналъяс.
Апрель 7-öд лунö Нина Ивановналы тырис 90 арöс. Ыджыд пасöн волiсны чолöмавны районса администрацияöн веськöдлысьöс медводдза вежысь Е.А.Стяжкина, «Кулöмдiн» овмöдчöминса администрацияöн веськöдлысь В.П.Игнатов да мукöд. Сиисны ён дзоньвидзалун да сетiсны президент В.В.Путинсянь чолöмалан гижöд да козин.
Галина КЛЮЖЕВА. Снимок Н.ТимошиналÖн.


Комментарии:

Добавить комментарий

Свежий выпуск: за 19 апреля