Георгий Николаевич Траилин, кыдзи казьтылiс ачыс, баянöн ворсö нэм чöжыс. Дзолядырйиыс сетлiсны шылада велöдчанiнö, но эз во сьöлöм вылас да эновтiс. Нотаа грамота мыйтакö велöдiс ачыс, но, та вылö видзöдтöг, ворсö зэв бура. Дзолядырйиыс сiйöс кинояс вылö, кöнi век кылö шылад, новлöдлiс чойыс, а батьыс ворслiс балалайка вылын.
Георгий Николаевич чужис Краснодарса крайын, Кубаньын. Керчомъяын олö нин 34 во. Гöтырыскöд тöдмасьлiс шойччанiнын. Гортаныс воöм бöрын вель дыр гижасисны, öтчыд волiс Керчомъяöдз, а сэсся 1984 воын босьтiс баянсö да дзикöдз локтiс овны радейтана ныв дорас. Воис сиктö май 26 лунö, а июньын ворсiсны нин кöлысь. Сиктсаяс вочаалiсны зэв шоныда. Сэки локтысьяс вылö пöлöсöн эз видзöдны, олiсны да уджалiсны унапöлöс йöз. 1985 воын чужис Елена, а 1986-ын Наташа.
Георгий Николаевич уджалiс уналаын: ломтысис шоныд сетанiнын, веськöдлiс самосвалöн да бензовозöн, велöдiс школаын челядьöс снимайтчыны да вöчасьны пуысь. Пыр ёртасис да водзö йитöда садкöд, велöдö посни челядьöс сьывны.
Гöтырыс, Любовь Егоровна, уджалiс совхозын медшöр агрономöн, вежис совхозса директорöс, вöлi сиктса юралысьöн, öнi шойччöг вылын. Дыркодь олiсны совхозöн кыпöдöм кык патераа керкаын, а сэсся овмöдчисны гöтыр бать-мамыслöн керкаö, пыр на сэнöсь.
Кыкнан нылыс зумыда сувтiсны кок выланыс, Елена пыр ёртасис спорткöд. Олöмсö йитiс бурдöдöмкöд, уджалö Эжваын. Верöсыс сиктса зон. Наташа дзолядырсяньыс сьылiс батьыслöн ворсöм улö. Школаын велöдчигöн вöлi районын нималан «Козин» котырын. Помалiс гöрд дипломöн Санкт-Петербургса велöдчанiн, водзö олöмсö йитiс шыладкöд, ёна ветлöдлiс Л.Логиновакöд да П.Шучалинкöд. Петкöдчис гажъяс дырйи Лым нылöн, волiс и «Василей» вылö. Уджыштiс челядьлысь енби сöвмöдан «Шудлун» шöринын, велöдiс сьывны. Сэсся вайис кага. Сылöн верöсыс Сыктывкарысь, бурдöдысь.
Георгий Николаевич висьталiс:
— Ми олам челядь вöсна. Пыр тöждысям, мед налöн олöмын ставыс вöлi лючки. Кыдз вермам, пыр отсалам. Ме лыддя, мый бать-мам — быдмысь челядьлы медбур пример. Водзтi овны вöлi кокниджык, тöдiн, мый лоас аски да мый виччысьны водзö, а öнi он тöд, кысянь мый виччысьны. Кор ме вои Керчомъяö, танi öдзöстö эз на томнавлыны, пуктылiсны гöлик. Öнi ставыс вежсис. Ёна юöны, лоисны скöрöсь. Ёна шогöдö, мый томъяслы абу удж. Ме, шуам, шойччöг вылын да сьöмыд воö, а налы мый вöчны? Со и кольччöны велöдчöм бöрын карö. Водзтi танi вöлi и кылöдчан участок, и совхоз, удж пыр вöлi. Но дзикöдз лолöн ог жö усьöй, кутам бур олöм вылö лача.
Та мында вонад ме ёна велалi челядь дорö. Мед найö сибалiсны тэ дорö, найöс колö гöгöрвоны, аслыд неуна лоны кагаöн. Ме вола садйö вежоннас нёльысь, асъя зарядка бöрын велöда сьывны. Быд во ветла сентябр 1 лунö на дорö, кодъясöс лэдзам садйысь школаö. Ме казяла сэтшöм челядьöс, кодъяс эськö вермисны водзö мичаа сьывны, но Керчомъяын та вылö позянлунъяс абуöсь, колö сетны водзö велöдчанiнö. Шуам, кор садйö на ветлöдлiс Денис Самарин, ме гöгöрвои, мый сылöн эм сям. Гöгöрвоисны и бать-мамыс, вуджисны овны Кулöмдiнö да сiйö ворсö баянöн, петкöдчö конкурсъясын да тшöкыда вермылö.
Ме пыдди пукта коми кыв да татысь йöзöс, сьöлöм серти ставыс, но та мында воöн сёрнитны комиöн эг и велав, кöть гöгöрвоа. Таысь некод оз öтдорт. Сиктсаяс тöдвыланыс кутöны оз сiйöс, мый ме роч, а кыдзи ола. Менам мамöй волiс жö татчö. Сылы сьöлöм вылас зэв воöма танi гырыся быдмысь картупель. Миян Кубаньын сiйö зэв посни. Полiс петны ывла вылö номъясысь: зэв пö ёна курччасьöны да зэв унаöсь. Кор челядьным вöлiны ичöтöсь, ветлывлiм саридз дорö. Нывъяслы, дерт, воис сьöлöм выланыс да казьтылöны и öнi.
Меным нимкодь, мый найö олöны карын, кöнi позьö сöвмыны водзö. Медбурыс сiйö, мый найö шудаöсь. Ми тшöкыда волывлам öта-мöд дорö, ёртасям да пыдди пуктам öта-мöдöс. Наташа нывлöн верöсыс карса да татчö волö шойччыштны, зэв сюсь морт.
Меным долыд, удж вылö локта нимкодьпырысь, челядькöд зэв на и лöсьыд. Аслам внучка пыдди пуктö спорт, а внуклы сьöлöм вылас воö шылад, ворсö быдпöлöс инструментъясöн. Öнi сылы куим арöс, а быдмас да, кыдз ме чайта, лоö шылад бура тöдысьöн. Ёна уджалö сыкöд мамыс.
Кор эм кад, гöтыркöд котралам лыжиöн. Отсала йöзлы: вöчала öдзöсъяс да öшинь рамаяс.
Гижöд да снимок Галина КЛЮЖЕВАЛÖН.