ТÒВЪЯСНЫ ПЫВСЯНЫН?

Редакцияö волìс Кебанъёльысь В.Н.Баскаков да юксис аслас шогöн. Олìс сìйö гöтырыскöд кык патераа керкаын. 2010 вося февраль 23-öд лунö сìйö сотчис, но выль оланìн эз сетны, вичмöдìсны сöмын 10 сюрс шайт. Гозъялы ковмис тöвйыны пывсянас. Виктор Николаевич да Людмила Павловна шуисны лэптыны керка. Виктор Николаевич вузалìс «Опель» машинасö, Людмила Павловна босьтìс сбербанкысь ссуда. Тшупны да кыпöдны отсалìсны В.Н.Баскаковлöн ёртъясыс.

— Миян кык ныв. Вöлì нöшта пи, но кувсьылìс, — висьталìс Виктор Николаевич. — Нывъяс олöны юркарын. Наташалöн нёль, а Настялöн кык кага. Нывъяс верöсъясныскöд да челядьныскöд волìсны быд гожöм. Медым тöрисны ставöн, вöчим лöс. Но керканымöс помöдз некыдз ог вермöй эштöдны — оз тырмы сьöм. Ме — вермытöм морт. Гöтырöй пенсиясьыс коймöд пайсö вештö ссуда. Колис вöчны йирк, лöскö каян пос, пуктыны сэтчö öшинь, вежны öдзöс, керкасö толльöн пыдди вевттьыны профнастилöн либö шиферöн. Нывъяс отсавны оз вермыны. Чукöртìм колана кабалаяс да шыöдчим районса администрацияö, медым отсалìсны сьöмöн, да вермим помавны керканымöс. Районса администрацияöн веськöдлысьöс вежысь И.В.Поповсянь воис вочакыв. И усим шогö: сьöм оз сетны. Ковмас бара тöвйыны пывсянын.

В.Н.Баскаковлöн шыöдчöм кузя ветлì гортас да видзöдлì керкасö. Виктор Николаевичлöн висьталöмыс збыльмис. Керкаыс помавтöм, колö вöчасьны ёна на, ковмас бура уна сьöм. Оз кö вичмы отсöг либö оз кö аддзыны асьныс сьöм, то тöвйыны танì гозъя оз вермыны. Кöдзыдъяс пуксьöм бöрын ковмас збыльысь петны пывсянас.

Аддзысьлì районса администрацияöн веськöдлысьöс вежысь, оланìнъяс кузя районса комиссияöн веськöдлысь И.В.Поповкöд да висьталì Баскаковъяслысь майшасьöмсö. Иван Владимирович вочавидзис тадзи:

— Июнь 25 лунö комиссияöн ветлìм Людмила Павловна да Виктор Николаевич дорö. Збыльысь, налы колö керкасö помалöм вылö сьöм. Но ми отсавны ог вермöй. Делöыс сыын, мый документъяс серти керкасö помалöма (кианыс техпаспорт) да сэнì позьö овны. В.Н.Баскаков ачыс гижлöма шыöдчöмсö техинспекциялöн бюроö. Керка кö дась, то субсидия оз сетсьы. Татшöмтор жö вöлì Улыс Вочса уна челядя семьякöд. Сулалìсны öчередын субсидия вылö, но асьныс на- дзöникöн лэптìсны керка да вуджисны овны. И öчередысь найöс киритìсны, сьöм эз чукты. Ми кö öнì отсалам сьöмöн Баскаковъяслы, то тайöн торкам закон да мыждас районса прокуратура.

Виктор Николаевичлы вöзйи шыöдчыны судö. Сìйö кö лыддяс керкасö помавтöмöн, то позяс сувтны öчередö субсидия босьтöм вылö.

Николай ЛЮТОЕВ.