Сизим во уджалiс культура керкаын, сэсся 27 во челядьлысь енби сöвмöдан керкаын, öттшöтш театрын пуктiс спектакльяс. Некымын во сайын локтiс бöр культура керкаö, сiйö лоö Помöсдiнса народнöй театрын режиссёрöн. Ёнджыка дасьтöны коми спектакльяс, йöзыслы найö матынджык. Колö пасйыны, мый коми петкöдчöмъяс пуктöны сöмын Помöсдiнса да Кöрткерöсса котыръяс.
Нина Евлогиевна висьталiс:
— Коркö лыддьöдлiм, кодъяс ворслiсны тайö 20 вонас да, буракö, сиктысь быдöн нин петкöдчылiс. Миян пыр выль артистъяс. Медводз ме лыддя пьесасö да син водзö сувтöда геройясöс да лоöмторъяссö. Артмöм серпасыс кö ясыд, вöзъя йöзлы. Медводз пукалам пызан сайын да сёрнитам, юклам, кодi кодöн лоö. Сэсся уджалам сцена вылын. Менам петкöдчысьяс зэв сямаöсь да радейтöны кöнкö вежыштны, содтыштны. Лöсялö кö петкöдчöмлöн туйвизьлы, вежам. Ме сэсся видзöда залсянь да висьтала, мый артмö, а мый вылын колö уджавны нöшта. Кор öтлаасьöны и шылад, и петкöдчöм, да видзöдiгöн кö петö синва да серам, сiдзкö, ставыс артмис. Спектакль вылын уджалам тöлысь нёль, мед пырöдчыны геройлöн олöмö, ставсö лэдзны ас пыр, велöдны кывъяс. Медым ловзьöдны, колö уна кад да лöсьöдöмтор олöмö пöртан сям. Сы бöрын сöмын петкöдлам йöз водзын. Локтöны пыр унаöн, видзöдысьяс бöрас матыстчöны да висьталöны, мый воис сьöлöм вылас, а мый эзджык. Помöсдiнсаяс окотапырысь волывлöны спектакльяс вылö. Дырджык кад кольö да пыр юалöны, кор нин мыйкö выльтор петкöдлам.

Помöсдiнса народнöй театр ветлывлö районса сикт-посёлокъясö. Тшöкыда петкöдчöны республика тшупöда вермасьöмъясын. 2017 воын Лузадор районын босьтiсны лауреатлысь ним. Пыр петкöдчылiсны коми спектакльясöн, но донъялысьяс рочöсь да, вöзйисны пуктыны роч вылын. Бöръяысьсö петкöдчылiсны «Любовь зла, или не ходи к гадалке». Öнi дасьтысьöны май 9-öд лун кежлö, лöсьöдöны «Йöлöга» спектакль.
— Кор бöръя ворсанторсö, ставсö сувтöда син водзö, и кор артмö нöшта бурджык, сiйö вайö зэв ыджыд нимкодьлун. Зэв лöсьыд уджавны йöзкöд, ыджыд аттьö ставныслы воча мунöмысь. Ми öта-мöднымöс бура гöгöрвоам. Пыр думайта спектакльяс йылысь, мöвпала весиг кысигöн да гортса уджъяс вöчигöн, мед эськö артмис сьöлöм вöрзьöданаöн, — юксис Нина Евлогиевна.
Галина КЛЮЖЕВА.
Снимок интернетысь.